.jpg)
ជនសង្ស័យចំនួន ១៤ នាក់ដែលត្រូវបានសមត្ថកិច្ចចាប់ឃាត់ខ្លួនករណីធាក់ប្លន់ម៉ូតូនៅតាមដងផ្លូវ។ រូបថត នគរបាល
ភ្នំពេញៈ កម្លាំងសមត្ថកិច្ចនគរបាលខណ្ឌដង្កោកាលពីរសៀលថ្ងៃទី ១៣ តុលា បានបង្ក្រាបឃាត់ខ្លួនជនសង្ស័យចំនួន ១៤ នាក់ជាបន្តបន្ទាប់ ពាក់ព័ន្ធករណីធាក់ប្លន់ម៉ូតូ និងប៉ុនប៉ងប្លន់ម៉ូតូជាបន្តបន្ទាប់នៅតាមដងផ្លូវមួយចំនួនក្នុងរាជធានីភ្នំពេញ ចាប់តាំងពីថ្ងៃទី ១ ខែតុលាមក។
បើតាមទំព័រហ្វេសប៊ុកអគ្គស្នងការដ្ឋាននគរបាលជាតិ ជាមួយនឹងការឃាត់ខ្លួននេះ សមត្ថកិច្ចបានដកហូតម៉ូតូចំនួន ៥ គ្រឿង, កាំបិតប៉័ងតោចំនួន ១, ទូរស័ព្ទដៃចំនួន ៣ គ្រឿង និងកាំបិតកែច្នៃប្រវែង ១៧ សង់ទីម៉ែត្រចំនួន ១ ដើម។
នៅចំពោះមុខសមត្ថកិច្ច ជនសង្ស័យបានឆ្លើយសារភាពថា ពួកគេ (ជនសង្ស័យទាំង ១៤ នាក់) បានធ្វើសកម្មភាព ប្លន់នៅក្នុងភូមិសាស្ត្រខណ្ឌដង្កោចំនួន ៣ ករណី ទី១ ករណីប៉ុនប៉ងលួចមានស្ថានទម្ងន់ទោស (ប្លន់ម៉ូតូ) នៅចំណុចស្តុបទួលពង្រ ផ្លូវ ៥០ ម៉ែត្រ ស្ថិតនៅភូមិ ២៤ សង្កាត់ព្រៃស ខណ្ឌដង្កោ រាជធានីភ្នំពេញ កាលពីថ្ងៃទី ១៣ ខែតុលា ឆ្នាំ ២០២២ វេលាម៉ោង ០៣ និង ០០ នាទី (ប៉ុនប៉ង)។
ទី២ ករណីលួចមានស្ថានទម្ងន់ទោស ដោយការប្រើអំពើហិង្សា (ធាក់ប្លន់យកម៉ូតូ) ត្រង់ចំណុចខាងមុខតូបលក់ទឹកត្នោតជូរ ផ្លូវ ៥០ ម៉ែត្រ ស្ថិតនៅភូមិប្រការ សង្កាត់ព្រៃស ខណ្ឌដង្កោ រាជធានីភ្នំពេញ កាលពីថ្ងៃទី ១០ ខែតុលា ឆ្នាំ ២០២២ វេលាម៉ោង ០០ និង ៤០ នាទី (បានសម្រេច) និងទី ០៣ ករណី លួចមានស្ថានទម្ងន់ទោស ដោយការប្រើអំពើហិង្សា (ធាក់ប្លន់ម៉ូតូ) នៅផ្លូវជាតិលេខ ២ ភូមិកណ្តាល សង្កាត់រលួស ខណ្ឌដង្កោ រាជធានីភ្នំពេញ កាលពីថ្ងៃទី ១ ខែតុលា ឆ្នាំ ២០២២ វេលាម៉ោង ១ និង ៣០ នាទី (បានសម្រេច)។
ក្រៅពីនេះមានបទល្មើសហិង្សាដោយចេតនាមានស្ថានទម្ងន់ទោស (ប្រើកាំបិតប៉័ងតោកាប់) ចំនួន ២ ករណីទី១ បទល្មើស ហិង្សាដោយចេតនាមានស្ថានទម្ងន់ទោស (ប្រើកាំបិតប៉័ងតោកាប់) ត្រង់ចំណុចបុរីពិភពថ្មី ២ ផ្ទះលេខ ១២៣ ផ្លូវលេខ ៩ ភូមិព្រៃកីខ សង្កាត់ពងទឹក ខណ្ឌដង្កោ រាជធានីភ្នំពេញ កាលពីថ្ងៃទី ៤ ខែតុលា ឆ្នាំ ២០២២ វេលាម៉ោង ១៩ និង ២២ នាទី និងទី២ បទល្មើស ហិង្សាដោយចេតនាមានស្ថានទម្ងន់ទោស (ប្រើកាំបិតប៉័ងតោកាប់) ត្រង់ចំណុចមុខវត្តសំបួរ ផ្លូវ ២១៧ ភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ។
ក្រោយពីមានចម្លើយសារភាពរបស់ជនសង្ស័យទាំង ១៤ នាក់នេះ ហើយមានការសម្របសម្រួលពីលោក លឹម ប៊ុនហេង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បានអនុញ្ញាតឱ្យសមត្ថកិច្ចឃាត់ខ្លួនជនសង្ស័យ ដើម្បីចាត់ការតាមផ្លូវច្បាប់៕
