កណ្តាលៈ ក្រុមកម្លាំងចម្រុះបានរកឃើញសពជនរងគ្រោះចំនួន ២ នាក់បន្ថែមទៀត ដែលនាំឱ្យចំនួនអ្នកស្លាប់កើនដល់ ៨ នាក់ ក្នុងឧបទ្ទវហេតុលិចទូកដ កាលពីវេលាម៉ោង ៧ យប់ ថ្ងៃទី ១៣ ខែតុលា ស្ថិតនៅចំណុចទូកដរទទឹង នៅភូមិកោះចំរើន ឃុំកំពង់ភ្នំ ស្រុកលើកដែក ខេត្តកណ្តាល។
ស្នងការដ្ឋាននគរបាលខេត្តកណ្តាល បញ្ជាក់ក្នុងហ្វេសប៊ុកនាថ្ងៃទី ១៤ ខែតុលា ថា៖ «គិតត្រឹមថ្ងៃទី ១៤ ខែតុលា ឆ្នាំ ២០២២ វេលាម៉ោង ៨:០០ នាទីព្រឹក មកដល់ពេលនេះ បានរកឃើញសពជនរងគ្រោះចំនួន ២ នាក់ បន្ថែមទៀត។ រកឃើញសរុបចំនួន ១២ នាក់ ស្លាប់ ៨ នាក់ (ស្រី ១ នាក់)»។
ក្រុមកម្លាំងចម្រុះបានបន្តស្រាវជ្រាវរុករកជនរងគ្រោះដែលបាត់ខ្លួនចំនួន ៣ នាក់បន្តទៀត។
ស្នងការដ្ឋាននគរបាលខេត្តកណ្តាលបញ្ជាក់ថា ហេតុការណ៍លិចទូកដទទឹងនេះ បណ្តាលឱ្យបាត់ខ្លួនសិស្សសាលា ប្រហែល ១៤ ទៅ ១៥ នាក់ ដែលមានទីលំនៅនៅភូមិកោះចំរើន។ ករណីនេះបណ្ដាលមកពីម្ចាស់ទូកដាក់លើសចំណុះ ធ្វេសប្រហែស និងមិនប្រុងប្រយ័ត្ន ហើយគ្មានអាវពោងសម្រាប់ការពារ៕