.jpg)
លោកនាយករដ្ឋមន្ត្រី ហ៊ុន សែន។ SPM
ភ្នំពេញៈ លោកនាយករដ្ឋមន្ត្រី ហ៊ុន សែន ផ្ញើសារចូលរួមរំលែកទុក្ខដល់ក្រុមគ្រួសារដែលបានបាត់បង់កូន និងចៅនៅក្នុងឧបទ្ទវហេតុលិចទូកចម្លងដឹកសិស្សចេញពីសាលារៀនទៅផ្ទះស្ថិតនៅឃុំកំពង់ភ្នំ ស្រុកលើកដែក ខេត្តកណ្តាល។
លោកបានសរសេរនៅទំព័រហ្វេសប៊ុកនាថ្ងៃទី ១៤ ខែតុលា ថា៖ «ខ្ញុំសូមចូលរួមរំលែកទុក្ខយ៉ាងក្រំបំផុតជាមួយបងប្អូនក្រុមគ្រួសារដែលបានបាត់បង់កូនៗ និងចៅៗជាទីស្រឡាញ់នៅក្នុងឧបទ្ទវហេតុលិចទូកចម្លងដឹកសិស្សានុសិស្សចេញពីសាលាទៅផ្ទះស្ថិតនៅឃុំកំពង់ភ្នំ ស្រុកលើកដែក ខេត្តកណ្តាល កាលពីយប់ថ្ងៃទី ១៣ ខែតុលា ឆ្នាំ ២០២២ ដែលបានបណ្តាលឱ្យស្លាប់ជាច្រើននាក់ និងមួយចំនួនត្រូវបានជួយសង្គ្រោះបន្ទាន់នៅមន្ទីរពេទ្យ និងមួយចំនួនទៀតនៅកំពុងបាត់ខ្លួននៅឡើយ»។
លោកនាយករដ្ឋមន្ត្រីអំពាវនាវដល់សមត្ថកិច្ច និងអាជ្ញាធរពាក់ព័ន្ធទាំងអស់ចូលរួមបន្តស្វែងរកអ្នករងគ្រោះ និងចូលរួមដោះជួយដល់ក្រុមគ្រួសារនៃសពនិងជនរងគ្រោះឱ្យបានទាន់ពេលវេលា «ដ៏លំបាកបំផុតនេះ»។
លោកអំពាវនាវដល់ប្រជាពលរដ្ឋ ជាពិសេសអ្នកដែលរស់នៅតាមមាត់ទន្លេមានការប្រុងប្រយ័ត្នខ្ពស់ក្នុងពេលដែលស្ថានភាពទឹកជំនន់កំពុងកើនឡើង។
ស្នងការដ្ឋាននគរបាលខេត្តកណ្តាលបានឱ្យដឹងក្នុងហ្វេសប៊ុកនាថ្ងៃទី ១៤ ខែតុលា ថា គិតត្រឹម ម៉ោង ៨ ព្រឹក ថ្ងៃទី ១៤ ខែតុលា នេះ ក្រុមកម្លាំងចម្រុះបានរកឃើញសពជនរងគ្រោះចំនួន ២ នាក់បន្ថែមទៀត ដែលនាំឱ្យចំនួនអ្នកស្លាប់កើនដល់ ៨ នាក់ ក្នុងឧបទ្ទវហេតុលិចទូកដរ កាលពីវេលាម៉ោង ៧ យប់ ថ្ងៃទី ១៣ ខែតុលា ស្ថិតនៅចំណុចទូកដរទទឹង នៅភូមិកោះចំរើន ឃុំកំពង់ភ្នំ ស្រុកលើកដែក ខេត្តកណ្តាល។
ក្រុមកម្លាំងចម្រុះបានបន្តស្រាវជ្រាវរុករកជនរងគ្រោះដែលបាត់ខ្លួនចំនួន ៣ នាក់បន្តទៀត។
ស្នងការដ្ឋាននគរបាលខេត្តកណ្តាលបញ្ជាក់ថា ហេតុការណ៍លិចទូកដរទទឹងនេះបណ្តាលឱ្យបាត់ខ្លួនសិស្សសាលា ប្រហែល ១៤ ទៅ ១៥ នាក់ ដែលមានទីលំនៅនៅភូមិកោះចំរើន។ ករណីនេះបណ្ដាលមកពីម្ចាស់ទូកដាក់លើសចំណុះ ធ្វេសប្រហែស និងមិនប្រុងប្រយ័ត្ន ហើយគ្មានអាវពោងសម្រាប់ការពារ៕
