ភ្នំពេញៈ គណ:កម្មការទី៣ (គណៈកម្មការផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹក) នៃរដ្ឋសភា នៅព្រឹកថ្ងៃទី ១៤ តុលានេះ បានបើកសិក្ខាសាលាស្តីពី «តួនាទីសភាក្នុងការងារប្រែប្រួលអាកាសធាតុ» ដើម្បីផ្សារភ្ជាប់ទំនាក់ទំនង និងធ្វើបច្ចុប្បន្នភាពការងារការប្រែប្រួលអាកាសធាតុរវាងក្រសួងសាម៉ីជាមួយរដ្ឋសភា។
សិក្ខាសាលាដែលធ្វើឡើងនៅវិមានរដ្ឋសភានេះ ត្រូវបានរៀបចំធ្វើដោយគណៈកម្មការទី៣ នៃរដ្ឋសភា និងក្រសួងបរិស្ថាន ក្រោមការជួយឧបត្ថម្ភគាំទ្រពីគម្រោងកម្មវិធីអភិវឌ្ឍន៍សហប្រជាជាតិប្រចាំកម្ពុជា (UNDP) និងប្រទេសស៊ុយអែត។
ទំព័រហ្វេសប៊ុករដ្ឋសភាបានចុះផ្សាយថា សិក្ខាសាលានេះក៏មានការអញ្ជើញចូលរួមពីសំណាក់ លោក សាយ សំអាល់ រដ្ឋមន្ត្រីក្រសួងបរិស្ថាន និងលោក លោកស្រី ជាសមាជិក សមាជិកាគណៈកម្មការនានា នៃរដ្ឋសភា ព្រឹទ្ធសភា ព្រមទាំងលោក លោកស្រីជាវាគ្មិន សំខាន់ៗ និងមន្ត្រីអង្គការក្រៅរដ្ឋាភិបាលមួយចំនួនផងដែរ។
បើតាមអគ្គលេខាធិការដ្ឋានរដ្ឋសភា សិក្ខាសាលានេះ ធ្វើឡើងក្នុងគោលបំណង ៣ សំខាន់ៗ ១- គឺដើម្បីផ្សារភ្ជាប់ទំនាក់ទំនង និងធ្វើបច្ចុប្បន្នភាពការងារការប្រែប្រួលអាកាសធាតុរវាងក្រសួងសាម៉ីជាមួយសភា ជាពិសេសគណ:កម្មការទី៣។
២-ដើម្បីស្វែងយល់ពីសកម្មភាពអង្គការក្រៅរដ្ឋាភិបាល ក្នុងកិច្ចគាំពារការប្រែប្រួលអាកាសធាតុ និង៣-គឺដើម្បីស្វែងយល់ និងផ្តល់មតិយោបល់ លើសេចក្តីព្រាងសៀវភៅណែនាំសម្រាប់សភា ជាពិសេសតួនាទីរបស់សភាស្តីពីការប្រែប្រួលអាកាសធាតុ៕