.jpg)
កម្លាំងចម្រុះ និងក្រុមការងារ ដែលចុះរុករកសពជនរងគ្រោះ។ រូបភាព ស្នងការដ្ឋាននគរបាលខេត្តកណ្តាល
កណ្តាលៈ ចំនួនអ្នកស្លាប់ក្នុងហេតុការណ៍លិចទូកដនៅខេត្តកណ្តាលកើនដល់ ១០ នាក់ ខណៈក្រុមកម្លាំងចម្រុះបានបន្តស្វែងរកអ្នកដែលបាត់ខ្លួនដែលនៅសល់ចំនួន ១ នាក់ទៀត។
ឧបទ្ទវហេតុលិចទូកដបានកើតឡើងកាលពីវេលាម៉ោង ៧ យប់ ថ្ងៃទី ១៣ ខែតុលា ស្ថិតនៅចំណុចទូកដទទឹងនៅភូមិកោះចំរើន ឃុំកំពង់ភ្នំ ស្រុកលើកដែក ខេត្តកណ្តាល។
ស្នងការដ្ឋាននគរបាលខេត្តកណ្តាលបញ្ជាក់ក្នុងហ្វេសប៊ុកនាថ្ងៃទី ១៤ ខែតុលា ថា៖ «គិតត្រឹមថ្ងៃទី ១៤ ខែតុលា ឆ្នាំ ២០២២ វេលាម៉ោង ១៣:៤៥ នាទី កម្លាំងចម្រុះ និងក្រុមការងារចុះរុករកសពជនរងគ្រោះបានចំនួន ១ នាក់ បន្ថែមទៀត អាយុ ១២ ឆ្នាំ មុខរបរសិស្ស។ មកដល់ពេលនេះបានរកឃើញសរុបចំនួន ១៤ នាក់ ស្លាប់ ១០ នាក់ (ស្រី ៣ នាក់) នៅសល់ចំនួន ១ នាក់»។
បើតាមស្នងការដ្ឋាននគរបាលខេត្តកណ្តាល ហេតុការណ៍លិចទូកដនេះបណ្តាលឱ្យបាត់ខ្លួនសិស្សសាលាប្រហែល ១៤ ទៅ ១៥ នាក់ ដែលមានទីលំនៅនៅភូមិកោះចំរើន។ ករណីនេះបណ្ដាលមកពីម្ចាស់ទូកដាក់លើសចំណុះ ធ្វេសប្រហែស និងមិនប្រុងប្រយ័ត្ន ហើយគ្មានអាវពោងសម្រាប់ការពារ៕
