.jpg)
លោក ខៀវ សុភ័គ ក្នុងសន្និសីទកាសែតនៅថ្ងៃទី ១៤ តុលាឆ្នាំ ២០២២ ។ រូបថត ក្រសួងមហាផ្ទៃ
ភ្នំពេញៈ លោក ខៀវ សុភ័គ រដ្ឋលេខាធិការ និងជាអ្នកនាំពាក្យក្រសួងមហាផ្ទៃបានថ្លែងថា គណបក្សនយោបាយដែលបានចុះបញ្ជីនៅក្រសួងមហាផ្ទៃ គឺមានសិទ្ធិធ្វើសកម្មភាពដោយសេរី គ្មានការរើសអើង ឬទទួលរងនូវការគាបសង្កត់អ្វីឡើយ ខណៈគិតត្រឹមខែកញ្ញាឆ្នាំ ២០២២ មានគណបក្សសរុបចំនួន ៤៥ បានចុះបញ្ជីនៅក្រសួងមហាផ្ទៃ។
លោក ខៀវ សុភ័គ បានថ្លែងបែបនេះ នាឱកាសអញ្ជើញជាវាគ្មិនក្នុងសន្និសីទសារព័ត៌មានស្ដីពី «សមិទ្ធផលសម្រេចបានរយៈពេល ៥ ឆ្នាំកន្លងមករបស់ក្រសួងមហាផ្ទៃ» នាថ្ងៃទី ១៤ ខែតុលា ឆ្នាំ ២០២២ នៅទីស្ដីការគណៈរដ្ឋមន្ដ្រី។
លោកលើកឡើងថា បច្ចុប្បន្ន (គិតត្រឹមខែកញ្ញា) គណបក្សនយោបាយដែលបានចុះឈ្មោះក្នុងបញ្ជីនៅក្រសួងមហាផ្ទៃមានសរុបចំនួន ៤៥ គណបក្ស ខណៈពីឆ្នាំ ២០១៨ ដល់ឆ្នាំ ២០២២ ក្រសួងបានសម្រេចអនុញ្ញាតឱ្យបង្កើតគណបក្សនយោបាយចំនួន ៩ ចុះឈ្មោះក្នុងបញ្ជីគណបក្សចំនួន ១៧ និងលុបឈ្មោះចេញពី បញ្ជីគណបក្សចំនួន ៨។
លោក ខៀវ សុភ័គ បញ្ជាក់ថា៖ «ជារួម គណបក្សនយោបាយដែលបានចុះបញ្ជីនៅក្រសួងមហាផ្ទៃ គឺមានសិទ្ធិ ធ្វើសកម្មភាពដោយសេរី គ្មានការរើសអើង ឬទទួលរងនូវការគាបសង្កត់អ្វីឡើយ។ ជាក់ស្តែង ក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី ៥ កន្លងទៅនេះ មានគណបក្សនយោបាយចូលរួមប្រកួតប្រជែងរហូតដល់ ១៧ គណបក្ស ដោយមានបេក្ខជនឈរឈ្មោះសរុបចំនួន ៨៦ ០៩២ នាក់»។
បើតាមក្រសួងមហាផ្ទៃ ការបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី ៥ មានប្រជាពលរដ្ឋបានទៅបោះឆ្នោតចំនួន ៧ ៣៨២ ៤៤៩ នាក់ ស្មើ ៨០,១៩% នៃអ្នកដែលមានឈ្មោះក្នុងបញ្ជីបោះឆ្នោត ហើយជាលទ្ធផលមានគណបក្សនយោបាយចំនួន ៩ ទទួលបានអាសនៈក្នុងក្រុមប្រឹក្សាឃុំ សង្កាត់៕
