.jpg)
លោក ខៀវ សុភ័គ រដ្ឋលេខាធិការ និងជាអ្នកនាំពាក្យក្រសួងមហាផ្ទៃ។ រូបភាព ក្រសួងមហាផ្ទៃ
ភ្នំពេញៈ មន្ត្រីបានឱ្យដឹងថា ក្នុងរយៈពេលប្រមាណ ៤ ឆ្នាំ គិតត្រឹមខែកក្កដា ឆ្នាំ ២០២២ អង្គភាពច្រកចេញចូលតែមួយរាជធានី-ខេត្ត នៅទូទាំងប្រទេសបានផ្ដល់សេវាសាធារណៈជូនដល់ប្រជាពលរដ្ឋបានជាង ២ លានសេវា ដែលមាន ១៤ វិស័យ និងទទួលបានចំណូលសរុបចំនួនជាង ៣០ ម៉ឺនលានរៀល ឬជាង ៧៥ លានដុល្លារអាមេរិក។
ហ្វេសប៊ុកក្រសួងមហាផ្ទៃបានដកស្រង់សម្ដីលោក ខៀវ សុភ័គ រដ្ឋលេខាធិការ និងជាអ្នកនាំពាក្យក្រសួងមហាផ្ទៃ ដែលបានថ្លែងថា «គិតចាប់ពីពេលដាក់ឱ្យដំណើរការរហូតដល់ខែកក្កដា ឆ្នាំ ២០២២ អង្គភាពច្រកចេញ ចូលតែមួយរាជធានី ខេត្តទាំង ២៥ ផ្តល់សេវាបានចំនួន ២ ១០០ ៨៤៤ សេវា លើ ១៤ វិស័យ ទទួលបានចំណូលសរុប ៣០៣ ០៣៤ ៨២៤ ១០៩ រៀល»។
ក្នុងសន្និសីទសារព័ត៌មានស្ដីពី «សមិទ្ធផលសម្រេចបានរយៈពេល ៥ ឆ្នាំកន្លងមក របស់ក្រសួងមហាផ្ទៃ» នាថ្ងៃទី ១៤ ខែតុលា លោកបានបញ្ជាក់ថា អង្គភាពច្រកចេញចូលតែមួយរាជធានី-ខេត្តនេះ ត្រូវបានដាក់ឱ្យដំណើរការនៅពាក់កណ្តាលឆ្នាំ ២០១៨។
លោក ខៀវ សុភ័គ បន្ថែមថា ចំណែកការិយាល័យច្រកចេញចូលតែមួយក្រុង ស្រុក ខណ្ឌ ដែលបច្ចុប្បន្នមានចំនួន ២០៤ ការិយាល័យ។ គិតពីឆ្នាំ ២០១៨ ដល់ ខែកក្កដា ឆ្នាំ ២០២២ ការិយាល័យទាំងនេះបានផ្តល់សេវាបានជាង ៧,៦ លានសេវាដែលមាន ១៧ វិស័យ និងទទួលបានចំណូលសរុបជាង ៧ ម៉ឺនលានរៀល ឬជាង ១៩ លានដុល្លារអាមេរិក។
លោកលើកឡើងថា ក្រសួងមហាផ្ទៃក៏បានពិនិត្យ និងផ្តល់អនុលោមភាពលើគម្រោងអភិវឌ្ឍន៍រាជធានី-ខេត្ត សរុបចំនួន ១ ៨៨៦ គម្រោង ដែលភាគច្រើនជាគម្រោងជួសជុលសាងសង់ហេដ្ឋារចនាសម្ព័ន្ធរូបវ័ន្តដូចជា ផ្លូវថ្នល់ សួនច្បារសាធារណៈ អគាររដ្ឋបាល បណ្តាញអគ្គិសនី គំនូសចរាចរណ៍ និងសំណង់សិល្បការនានា។
អ្នកនាំពាក្យរូបនេះបន្ថែមថា រដ្ឋបាលថ្នាក់ក្រោមជាតិនៅទូទាំងប្រទេសបានអនុវត្តគម្រោងមូលនិធិក្រុង ស្រុកចំនួន ២ ៣៦១ គម្រោង និងគម្រោងមូលនិធិ ឃុំ សង្កាត់ចំនួន ៩ ៤៤៣ គម្រោង។ លើសពីនេះ ក្រោមក្របខ័ណ្ឌមូលនិធិទ្រទ្រង់ថវិកាឆ្នាំ ២០១៦-២០១៩ ពីធនាគារអភិវឌ្ឍន៍អាស៊ាន (ADB) ក្រសួងមហាផ្ទៃបានសម្របសម្រួល និងគាំទ្រការកសាងអគាររដ្ឋបាល និងអគារសាលប្រជុំសាលាស្រុកចំនួន ៧ និងអគាររដ្ឋបាលឃុំ សង្កាត់ចំនួន ១២៥ ដោយចំណាយថវិកាសរុបអស់ ១០ លានដុល្លារ៕
