ភ្នំពេញៈ អង្គការយូនីសេហ្វ (UNICEF) អំពាវនាវដល់សាធារណជនកុំបន្តចែករំលែក ផ្ញើរូបភាព ឬវីដេអូ ដែលបង្ហាញហេតុការណ៍បាត់បង់ជីវិតកុមារនៅក្នុងឧបទ្ទវហេតុលិចទូកចម្លងនៅខេត្តកណ្តាលលើបណ្តាញសង្គម ពីព្រោះវានឹងបង្កផលប៉ះពាល់អវិជ្ជមានទៅលើកុមារ គ្រួសារជនរងគ្រោះ និងមនុស្សជាទីស្រឡាញ់របស់ពួកគេ។
ឧបទ្ទវហេតុលិចទូកចម្លងបានកើតឡើងកាលពីវេលាម៉ោង ៧ យប់ ថ្ងៃទី ១៣ ខែតុលា ស្ថិតនៅចំណុចទូកដទទឹង នៅភូមិកោះចំរើន ឃុំកំពង់ភ្នំ ស្រុកលើកដែក ខេត្តកណ្តាល។
យោងតាមរបាយការណ៍ស្នងការដ្ឋាននគរបាលខេត្តកណ្តាលបានឱ្យដឹងថា ចំនួនអ្នកស្លាប់ក្នុងហេតុការណ៍លិចទូកចម្លងនេះបានកើនដល់ ១០ នាក់ គិតត្រឹមម៉ោងប្រមាណ ២ រសៀល ថ្ងៃទី ១៤ ខែតុលា នេះ ខណៈក្រុមកម្លាំងចម្រុះបានបន្តស្វែងរកអ្នកដែលបាត់ខ្លួនដែលនៅសល់ចំនួន ១ នាក់ទៀត។
អង្គការយូនីសេហ្វបានសម្ដែងអារម្មណ៍ក្រៀមក្រំ និងតក់ស្លុតជាខ្លាំងចំពោះការបាត់បង់ជីវិតកុមារនៅក្នុងឧបទ្ទវហេតុលិចទូកចម្លងនេះ និងបានចូលរួមរំលែកទុក្ខដ៏ក្រៀមក្រំបំផុតជាមួយក្រុមគ្រួសារ ដែលបានបាត់បង់កូនៗជាទីស្រឡាញ់ និងគ្រួសារដែលមានកូនៗកំពុងបាត់ខ្លួននៅក្នុងឧបទ្ទវហេតុនេះ។
អង្គការយូនីសេហ្វបង្ហោះសារក្នុងហ្វេសប៊ុកនាថ្ងៃទី ១៤ ខែតុលា ថា៖ «យូនីសេហ្វ សូមអំពាវនាវដល់សាធារណជន មេត្តាកុំបន្តចែករំលែក ឬផ្ញើរូបភាព ឬវីដេអូ ដែលបង្ហាញហេតុការណ៍ដ៏អកុសលនេះលើបណ្តាញសង្គម ពីព្រោះទង្វើនេះ នឹងបង្កផលប៉ះពាល់អវិជ្ជមានទៅលើកុមារ គ្រួសារជនរងគ្រោះ និងមនុស្សជាទីស្រឡាញ់របស់ពួកគេ»៕