.jpg)
រូប MoEYS Cambodia
ភ្នំពេញៈ រដ្ឋមន្ត្រីអប់រំអាស៊ានបូក ៣ បានចេញសេចក្តីថ្លែងការណ៍រួមគ្នា ដោយប្តេជ្ញាចិត្តពង្រឹងកិច្ចប្រតិបត្តិការ និងភាពជាដៃគូរវាងប្រទេសសមាជិកអាស៊ានបូក ៣ ដើម្បីស្តារការសិក្សាឡើងវិញ និងកសាងភាពធន់ប្រព័ន្ធអប់រំនៅក្នុង និងក្រៅតំបន់អាស៊ាន។ នេះបើយោងតាមក្រសួងអប់រំកម្ពុជា។
ក្រសួងអប់រំបញ្ជាក់ក្នុងទំព័រហ្វេសប៊ុកនាថ្ងៃទី ១៤ ខែតុលា ថា សេចក្តីថ្លែងការណ៍នេះបានលើកឡើងពីដំណើរការសាលារៀន ការស្តារការសិក្សាឡើងវិញនិងការបន្តការសិក្សារបស់សិស្ស ព្រមទាំងការធានាគុណភាពឧត្តមសិក្សាក្នុងចំណោមប្រទេសអាស៊ានបូក ៣។
សេចក្តីថ្លែងការណ៍នេះក៏បានលើកឡើងពីការលើកកម្ពស់ចល័តភាពរបស់សិស្ស គ្រូបង្រៀន បញ្ញាវ័ន្ត និងមន្ត្រីអប់រំនៅកម្រិតអប់រំចំណេះទូទៅ ឧត្តមសិក្សា និងការអប់រំវិជ្ជាជីវៈនិងបច្ចេកទេស ក្នុងប្រទេសអាស៊ានបូកបីតាមរយៈកម្មវិធីអាហារូបករណ៍ កម្មវិធីអភិវឌ្ឍសមត្ថភាព និងផ្លាស់ប្តូរបទពិសោធ។
សេចក្តីថ្លែងការណ៍នេះថែមទាំងបានលើកឡើងពីការពង្រឹងកិច្ចប្រតិបត្តិការរវាងប្រទេសអាស៊ានបូក ៣ ជាមួយស្ថាប័នអប់រំផ្សេងទៀតដូចជា បណ្តាញសាកលវិទ្យាល័យអាស៊ាន (ANU) និងក្រុមប្រឹក្សាអប់រំវិជ្ជាជីវៈ និងបច្ចេកទេស (ASEAN TVET) និង ស៊ីម៉េអូ (SEAMEO)។
លោក អ៊ុម រម្យណី រដ្ឋលេខាធិការក្រសួងអប់រំ យុវជន និងកីឡា បានដឹកនាំគណៈប្រតិភូក្រសួងអប់រំ យុវជន និងកីឡាចូលរួមកិច្ចប្រជុំរដ្ឋមន្ត្រីអប់រំអាស៊ានបូកបីលើកទី៦ នៅទីក្រុងហាយណូយ ប្រទេសវៀតណាម នាថ្ងៃទី ១៤ ខែតុលា ក្រោមមូលបទ «កិច្ចប្រឹងប្រែងរួមគ្នាដើម្បីស្តារការសិក្សាឡើងវិញ និងការកសាងភាពធន់ប្រព័ន្ធអប់រំនៅក្នុង និងក្រៅតំបន់អាស៊ាន នៅក្នុងបរិបទថ្មី»។
ហ្វេសប៊ុកក្រសួងអប់រំបញ្ជាក់ថា៖ «កិច្ចប្រជុំរដ្ឋមន្ត្រីអប់រំអាស៊ានបូកបី បានកត់សម្គាល់លើវឌ្ឍនភាពនៃការអនុវត្តផែនការសកម្មភាពអាស៊ានបូកបីស្តីពីការអប់រំឆ្នាំ ២០១៨-២០២៥ និងបានគូសបញ្ជាក់ជាថ្មីម្តងទៀតពីសារៈសំខាន់នៃកិច្ចប្រតិបត្តិការរវាងប្រទេសសមាជិកអាស៊ាន ជាមួយសាធារណរដ្ឋប្រជាមានិតចិន ជប៉ុន និងសាធារណរដ្ឋកូរ៉េ ដើម្បីដោះស្រាយវិបត្តិនៃការរៀនសូត្រ កសាងភាពធន់ និងបរិវត្តកម្មប្រព័ន្ធអប់រំ»។
កិច្ចប្រជុំរដ្ឋមន្ត្រីអប់រំអាស៊ានបូក ៣ នេះមានគោលបំណងពិនិត្យមើលឡើងវិញលើវឌ្ឍនភាព និងបញ្ហាប្រឈមនៃការអនុវត្តផែនការសកម្មភាពអាស៊ានបូកបី ស្តីពីការអប់រំឆ្នាំ ២០១៨-២០២៥។
កិច្ចប្រជុំនេះក៏មានគោលបំណងពង្រឹងកិច្ចប្រតិបត្តិការ និងភាពជាដៃគូរវាងប្រទេសសមាជិកអាស៊ាន ជាមួយនឹងប្រទេសចិន ជប៉ុន និងកូរ៉េខាងត្បូង ក្នុងការស្តារការសិក្សាឡើងវិញ និងការកសាងភាពធន់ប្រព័ន្ធអប់រំនៅក្នុង និងក្រៅតំបន់អាស៊ានក្នុងបរិបទថ្មី៕
