ភ្នំពេញៈ លោក ស៊ុន ចាន់ថុល ទេសរដ្ឋមន្ត្រី និងជារដ្ឋមន្ត្រីក្រសួងសាធារណការ និងដឹកជញ្ជូនបានជំរុញឱ្យក្រុមហ៊ុន ដែលធ្វើការសិក្សាលើគម្រោងប្រព័ន្ធផ្លូវនាវាចរណ៍ និងប្រព័ន្ធភ័ស្ដុភារកម្មទន្លេបាសាក់ ត្រូវបញ្ចប់ការសិក្សាគម្រោងនេះយ៉ាងយូរបំផុតនៅត្រឹមខែមករា ឆ្នាំ ២០២៣។
លោក ស៊ុន ចាន់ថុល បានជំរុញបែបនេះ នៅថ្ងៃទី ១៤ តុលា ក្នុងពេលដែលលោកបានដឹកនាំកិច្ចប្រជុំពិនិត្យពីវឌ្ឍនភាពការងារ គម្រោងសិក្សាផ្លូវនាវាចរណ៍ និងប្រព័ន្ធភ័ស្ដុភារកម្មទន្លេបាសាក់ជាមួយតំណាងក្រុមហ៊ុនសាជីវកម្មស្ពាន និងថ្នល់ចិន (CRBC) និងជំនាញការរបស់ក្រុមហ៊ុន CCCC Water Transport Consultant ដោយមានការចូលរួមពីថ្នាក់ដឹកនាំក្រសួង និងមន្ត្រីជំនាញពាក់ព័ន្ធជាច្រើនរូប។
កិច្ចប្រជុំនេះរៀបចំឡើងដើម្បីពិនិត្យពីវឌ្ឍនភាពការងារ និងស្វែងរកដំណោះស្រាយលើកិច្ចការបច្ចេកទេសសំខាន់ៗមួយចំនួន ដែលស្នើឡើងដោយមន្ត្រីបច្ចេកទេសរបស់ក្រសួង ដើម្បីជួយជំរុញល្បឿននៃការសិក្សានេះឱ្យបានលឿន និងអាចបញ្ចប់នាពេលដ៏ខ្លីខាងមុខ ប្រកបដោយគុណភាព និងប្រសិទ្ធភាពខ្ពស់ ជាពិសេសទទួលបានលទ្ធផលគ្រប់ជ្រុងជ្រោយតាមផែនការដែលបានរំពឹងទុក។
បើតាមក្រសួងសាធារណការ គម្រោងផ្លូវនាវាចរណ៍ និងប្រព័ន្ធភ័ស្ដុភារកម្មទន្លេបាសាក់នេះនឹងជួយជំរុញការដឹកជញ្ជូនតាមផ្លូវទឹក និងភ័ស្តុភារកម្មនៅកម្ពុជាឱ្យកាន់តែមានប្រសិទ្ធភាពថែមមួយកម្រិតទៀត ជាពិសេសអាចជួយកាត់បន្ថយការចំណាយ និងថ្លៃដើមនៃការដឹកជញ្ជូនឱ្យកាន់តែទាបជាងមុន ព្រមទាំងផ្ដល់ភាពងាយស្រួលក្នុងការធ្វើសមាហរណកម្មវិស័យដឹកជញ្ជូនតាមផ្លូវទឹកផ្ទៃក្នុងប្រទេសផង និងអាចតភ្ជាប់ជាមួយអន្តរជាតិឱ្យបានកាន់តែងាយស្រួលផងដែរ។
ភាគីទាំង ២ បានពិភាក្សាយ៉ាងផុសផុល និងផ្លាស់ប្ដូរមតិយោបល់លើទិន្នន័យ និងព័ត៌មានទាក់ទងនឹងការងារបច្ចេកទេសផ្លូវទឹក ការសិក្សា និងការវាយតម្លៃចាំបាច់លើផ្នែកបរិស្ថាន សង្គម និងសេដ្ឋកិច្ចផងដែរ។
លោក ស៊ុន ចាន់ថុល បានស្នើសុំឱ្យភាគីក្រុមហ៊ុនទាំង ២ យកចិត្តទុកដាក់បន្ថែមទៀតលើការសិក្សាបច្ចេកទេស លម្អិតដើម្បីឱ្យមានគុណភាពខ្ពស់ និងត្រូវសហការកាន់តែជិតស្និទ្ធបន្ថែមទៀតជាមួយមន្ត្រីបច្ចេកទេសក្រសួង ដើម្បីពន្លឿនគម្រោងសិក្សានេះឱ្យបានចប់សព្វគ្រប់ និងគ្រប់ជ្រុងជ្រោយយ៉ាងយូរនៅត្រឹមខែមករា ឆ្នាំ ២០២៣៕