.jpg)
ទិដ្ឋភាពក្រុងសៀមរាបនាពេលបច្ចុប្បន្ន។ រូបថត រដ្ឋបាលខេត្តសៀមរាប
សៀមរាបៈ រដ្ឋបាលខេត្តសៀមរាបបានបើកកិច្ចប្រជុំពិភាក្សាស្តីអំពីការដាក់ឱ្យដំណើរការក្នុងការត្រួតពិនិត្យអំពូលតាមប្រព័ន្ធ CMS សម្រាប់គម្រោងស្ថាបនាផ្លូវទាំង ៣៨ ខ្សែ និងគម្រោង ៥០០ អំពូល ក្នុងក្រុងសៀមរាប ដោយអត្ថប្រយោជន៍នៃគម្រោងប្រើប្រាស់អំពូលនេះ គឺជួយសន្សំសំចែថាមពលអគ្គិសនី និងកាត់បន្ថយការបំភាយឧស្ម័ន (co2)។ នេះបើយោងតាមទំព័រហ្វេសប៊ុករដ្ឋបាលខេត្តសៀមរាបចុះផ្សាយនៅថ្ងៃទី ១៤ តុលា។
កិច្ចប្រជុំកាលពីរសៀលថ្ងៃទី ១៣ តុលានេះត្រូវបានធ្វើឡើងក្រោមអធិបតីភាព លោក សុខ ថុល អភិបាលរងខេត្តសៀមរាប និងមានការអញ្ជើញចូលរួមពីលោកតាកាហ្ស៊ី អាអុគិ ប្រធានផ្នែកលក់នៃក្រុមហ៊ុនមីនេបៀ ( ខេមបូឌា) លោក ថៃ ប៊ុនណាត វិស្វករ លោក លន សុភ័ក្ត្រ ប្រធានគម្រោងទីក្រុងវៃឆ្លាតខេត្តសៀមរាប និងមន្ត្រីជំនាញពាក់ព័ន្ធផ្សេងទៀត។
ក្នុងកិច្ចប្រជុំគឺបានពិភាក្សាគ្នាអំពីតម្លៃនៃសេវាកម្ម O&M និងបានស្នើឱ្យក្រុមហ៊ុនពិនិត្យលទ្ធភាពកំណត់តម្លៃនៃសេវាកម្មឡើងវិញដោយបច្ចុប្បន្នតម្លៃក្នុងរដ្ឋបាលខេត្ត ត្រូវទូទាត់ជូនក្រុមហ៊ុនមីនេបៀ (ខេមបូឌា) មិនទាន់មានតម្លៃជាគោលនៅឡើយ ដោយខាងក្រុមហ៊ុនធ្វើការកំណត់តម្លៃតាមចំនួនអំពូលដែលបានដំឡើងរួច និងផ្អែកតាមគម្រោងនីមួយៗ។
បើតាមរដ្ឋបាលខេត្តសៀមរាប សេវាកម្ម ការដាក់ឱ្យដំណើរការ និងការត្រួតពិនិត្យអំពូលតាមប្រព័ន្ធ O&M ឬសេវាកម្ម O&M នេះនឹងបង្កើតអត្ថប្រយោជន៍មួយចំនួន ដល់រដ្ឋបាលខេត្តសៀមរាប ហើយអត្ថប្រយោជន៍នោះ គឺការសន្សំសំចៃថាមពលអគ្គិសនី និងកាត់បន្ថយការបំភាយឧស្ម័ន (co2) ដោយមុខការងារបន្ថែមបន្ថយពន្លឺ។
បច្ចុប្បន្នក្រុមហ៊ុនបានដំឡើងអំពូលឆ្លាតវៃសរុបបានប្រមាណជា ១៨ ៨៨០ អំពូល នៅទូទាំងប្រទេសកម្ពុជា ព្រមទាំងបានចូលរួមសន្សំសំចៃថ្លៃអគ្គិសនីបានប្រមាណជាង ១ លានដុល្លារសហរដ្ឋអាមេរិកក្នុង ១ ឆ្នាំ សម្រាប់រាជរដ្ឋាភិបាលកម្ពុជាផងដែរ៕
