ភ្នំពេញៈ លោកនាយករដ្ឋមន្ត្រី ហ៊ុន សែន បានរំឭកគុណ ព្រះបរមរតនកោដ្ឋដែលបានបូជាព្រះកាយពលដ៏ធំធេងបំផុតចំពោះជាតិមាតុភូមិកម្ពុជា ហើយមន្ត្រីរាជការ និងកងកម្លាំងប្រដាប់អាវុធ ព្រមទាំងប្រជារាស្ត្រ ក៏បានរឭកឃើញគុណព្រះអង្គ និង ថ្វាយព្រះរាជកុសលដល់អតីតព្រះមហាក្សត្រខ្មែរអង្គនេះសូមស្តេចយាងបដិសន្ឋិក្នុងព្រះបរមសុគតិភព។
ថ្លែងក្នុងព្រះរាជពិធីរំឭកខួប ១០ ឆ្នាំនៃការយាងសោយទិវង្គតរបស់សម្តេចព្រះបិតាឯករាជ្យជាតិ “ព្រះបរមរតនកោដ្ឋ” នៅលើហ្វេសប៊ុកលោកនាយករដ្ឋមន្ត្រី ហ៊ុន សែន សរសេរថា៖ «នៅថ្ងៃនេះ ប្រជារាស្ត្រទូទាំងប្រទេស ព្រមទាំងមន្ត្រីរាជការ កងកម្លាំងប្រដាប់អាវុធគ្រប់ជាន់ថ្នាក់ សូមសម្តែងនូវការគោរពដឹងគុណដ៏ខ្ពង់ខ្ពស់បំផុតថ្វាយចំពោះ ព្រះបរមរតនកោដ្ឋ ដែលព្រះអង្គបានលះបង់ និងបូជាព្រះកាយពលដ៏ធំធេងបំផុតចំពោះជាតិមាតុភូមិកម្ពុជា»។
លោកនាយករដ្ឋមន្ត្រីបន្តទៀតថា កូនចៅប្រជារាស្ត្រទូទាំងប្រទេស និងមន្ត្រីរាជការ សូមថ្វាយព្រះរាជកុសលព្រះវិញ្ញាណក្ខន្ឋព្រះបរមសព ព្រះករុណា ព្រះបាទសម្តេចព្រះ នរោត្តម សីហនុ សូមស្តេចយាងបដិសន្ឋិក្នុងព្រះបរមសុគតិភពកុំបីឃ្លាងឃ្លាតឡើយ។
នៅព្រឹកថ្ងៃទី ១៥ ខែតុលា នេះដែរ លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍បានដឹកនាំប្រតិភូក្រសួង ចូលរួមថ្វាយកម្រងផ្កាគោរពព្រះវិញ្ញាណក្ខន្ធ ព្រះមហាវីរក្សត្រ គម្រប់ខួប ១០ ឆ្នាំ នាព្រះមណ្ឌបសួនច្បារខាងកើតវិមានឯករាជ្យ រាជធានីភ្នំពេញ។
លោករដ្ឋមន្ត្រីបញ្ជាក់ថា៖ «យើងខ្ញុំទាំងអស់គ្នា សូមសម្តែងនូវការគោរពដឹងគុណដ៏ខ្ពង់ខ្ពស់បំផុតថ្វាយចំពោះ ព្រះបរមរតនកោដ្ឋ ដែលព្រះអង្គបានលះបង់ និងបូជាព្រះកាយពលដ៏ធំធេងបំផុតចំពោះជាតិមាតុភូមិកម្ពុជា។ សូមថ្វាយមហាព្រះរាជកុសលថ្វាយព្រះបរមវិញ្ញាណក្ខន្ឋ ព្រះករុណា ព្រះបាទ សម្តេចព្រះ នរោត្តម សីហនុ សូមស្តេចយាងបដិសន្ឋិក្នុងព្រះបរមសុគតិភពកុំបីឃ្លៀងឃ្លាតឡើយ»។
ជាមួយគ្នានោះ លោក អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ ក៏បានដឹកនាំគណៈប្រតិភូក្រសួង អញ្ជើញចូលរួមថ្វាយកម្រងផ្កាគោរពព្រះវិញ្ញាណក្ខន្ធ ព្រះករុណាព្រះបាទសម្ដេចព្រះនរោត្តម សីហនុ ព្រះមហាវីរក្សត្រ ព្រះវរាជបិតាឯករាជ្យ បូរណភាពទឹកដី និងឯកភាពជាតិខ្មែរ ព្រះបរមរតនកោដ្ឋ គម្រប់ខួប ១០ ឆ្នាំ នៅសួនច្បារខាងកើតវិមានឯករាជ្យផងដែរ។
ចំណែក ប្រជាពលរដ្ឋក៏បានសម្តែងការរឭកនឹកឃើញអង្គព្រះមហាក្សត្រ និងបានបង្ហោះសារថ្វាយព្រះរាជកុសលដល់ព្រះបរមរនកោដ្ឋតាមបណ្តាញសង្គមហ្វេសប៊ុក និងក្រុមបណ្តាញសង្គមផ្សេងៗផងដែរ៕