កណ្តាលៈ រយៈពេល ២ យប់ ៣ ថ្ងៃ គិតចាប់ពីយប់ថ្ងៃទី ១៣ ដល់ថ្ងៃទី ១៥ ខែតុលា នេះ កិច្ចសហប្រតិបត្តិការស្រាវជ្រាវសង្គ្រោះជនរងគ្រោះក្នុងឧបទ្ទវហេតុលិចទូកដ ស្ថិតនៅភូមិកោះចំរើន ឃុំកំពង់ភ្នំ ស្រុកលើកដែក ខេត្តកណ្ដាល អាជ្ញាធរបានរកឃើញអ្នកបាត់ខ្លួនឃើញទាំងអស់ និងបានបញ្ចប់បេសកកម្មហើយ។
កម្លាំងស្នងការនគរបាលខេត្តកណ្តាលក្រោមការដឹកនាំរបស់លោក គន់ គីម ទេសរដ្ឋមន្ត្រី ទទួលបន្ទុកបេសកកម្មពិសេសជាអនុប្រធានទី ១ នៃគណៈកម្មាធិការជាតិគ្រប់គ្រងគ្រោះមហន្តរាយ និងលោក គង់ សោភ័ណ្ឌ អភិបាលនៃគណៈអភិបាលខេត្តកណ្តាល ដោយមានការចូលរួមសហការពីអាជ្ញាធរគ្រប់លំដាប់ថ្នាក់ បានស្រាវជ្រាវរុករកឃើញជនរងគ្រោះដែលបាត់ខ្លួនអស់ហើយ នៅថ្ងៃទី ១៥ ខែតុលានេះ។
តាមលទ្ធផលនៃការរុករកឃើញថា ជនរងគ្រោះសរុបមានចំនួន ១៥ នាក់ ស្រី ៤ នាក់ ក្នុងនោះស្លាប់ ១១ នាក់ ស្រី ០៣ នាក់។
អាជ្ញាធរគ្រប់លំដាប់ថ្នាក់បានសម្តែងការសោកស្តាយ រកទីបំផុតគ្មានក្នុងសោកនាដកម្ម ដែលបានកើតឡើងនេះ និងសូមចូលរួមរំលែកមរណទុក្ខដល់ក្រុមគ្រួសារជនរងគ្រោះទាំង ១១ នាក់ ដែលបានស្លាប់ និងសូមបួងសួងឱ្យវិញាណក្ខន្ធក្មួយៗទាំង ១១ នាក់ បានដល់ឋានសុគតិភព៕