ភ្នំពេញៈ ប្រតិភូ គ.ជ.ប នឹងអញ្ជើញចូលរួមមហាសន្និបាត លើកទី ៥ របស់សមាគមស្ថាប័នរៀបចំ ការបោះឆ្នោត ពិភពលោក (A-WEB) និងសន្និសីទអន្តរជាតិ នៅប្រទេសអាហ្វ្រិកខាងត្បូងរយៈពេល ៦ ថ្ងៃ ចាប់ពីថ្ងៃទី ១៧ ដល់ថ្ងៃទី ២២ ខែតុលានេះ។
សេចក្តីជូនដំណឹងរបស់គណៈកម្មាធិការជាតិរៀបចំការបោះឆ្នោត គ.ជ.ប នៅថ្ងៃទី ១៥ ខែតុលានេះបានឱ្យដឹងថា តបតាមការអញ្ជើញរបស់សមាគមស្ថាប័ន រៀបចំការបោះឆ្នោតពិភពលោក ហៅកាត់ថា A-WEB ប្រតិភូគណៈកម្មាធិការជាតិរៀបចំការបោះឆ្នោត (គ.ជ.ប) នៃព្រះរាជាណាចក្រកម្ពុជា ដឹកនាំដោយ លោក ឌឹម សុវណ្ណារុំ សមាជិក គ.ជ.ប និងជាប្រធានក្រុមប្រតិកម្មព័ត៌មាននៃ គ.ជ.ប នឹងអញ្ជើញ ចូលរួមមហាសន្និបាត លើកទី ៥ និងសន្និសីទអន្តរជាតិស្តីពី «កិច្ចការពារស្ថាប័នគ្រប់គ្រងការបោះឆ្នោត ក្នុងសម័យកាលដែលលទ្ធិប្រជាធិបតេយ្យសកលលោកមានការធ្លាក់ចុះ» ដែលនឹងប្រព្រឹត្តទៅនៅ ទីក្រុង Cape Town ប្រទេសអាហ្វ្រិកខាងត្បូងរយៈពេល ៦ ថ្ងៃ ចាប់ពីថ្ងៃទី ១៧ ដល់ថ្ងៃទី ២២ ខែតុលា ឆ្នាំ ២០២២ ជាមួយប្រទេសដែលជាសមាជិក A-WEB សរុប ១០៩ ប្រទេស។
គណៈប្រតិភូ គ.ជ.ប នៃព្រះរាជាណាចក្រកម្ពុជានឹងចេញដំណើរនៅថ្ងៃទី ១៦ ខែតុលា ឆ្នាំ ២០២២ ហើយឆ្លៀតក្នុងឱកាសចេញ ដំណើរនោះ លោក ឌឹម សុវណ្ណារុំ ប្រធានប្រតិភូ គ.ជ.ប នឹងធ្វើសន្និសីទសារព័ត៌មាន ដើម្បីជម្រាបជូនពីសារៈសំខាន់នៃព្រឹត្តិការណ៍ខាងលើនេះ វេលាម៉ោង ៦ ល្ងាច នៅអាកាសយានដ្ឋានអន្តរជាតិភ្នំពេញ (ច្រក VIP) ៕