.jpg)
លោក ហ៊ុន សែន និងមន្ត្រីពេលចុះជួបប្រជាពលរដ្ឋរងគ្រោះដោយទឹកជំនន់នៅបន្ទាយមានជ័យកន្លងមក ។ រូបថត SPM
ភ្នំពេញៈលោកនាយករដ្ឋមន្ត្រី ហ៊ុន សែន ដាក់បញ្ជាដល់អាជ្ញាធរខេត្តពាក់ព័ន្ធ និងក្រសួងកសិកម្មរុក្ខាប្រមាញ់ និងនេសាទឱ្យធ្វើអន្តរាគមន៍បន្ទាន់ ដោយផ្គត់ផ្គង់ស្រូវពូជ និងពូជដំណាំដទៃដល់ប្រជាពលរដ្ឋដែលរងការខូចខាត ដោយសារទឹកជំនន់ ហើយលោកក៏បានអំពាវនាវដល់គ្រឹះស្ថានហិរញ្ញវត្ថុផ្តល់ការអនុគ្រោះដល់អ្នក ដែលទទួលផលប៉ះពាល់ពីគ្រោះទឹកជំនន់តាមរយៈការពន្យារពេលសងឥណទានផងដែរ។
ជាមួយគ្នានេះលោកបានផ្តាំដល់អាជ្ញាធរពាក់ព័ន្ធធ្វើការវាយតម្លៃជាបន្ទាន់ពីការខូចខាតដំណាំស្រូវនិងដំណាំផ្សេងៗ ដោយសារគ្រោះទឹកជំនន់ ដើម្បីផ្គត់ផ្គង់ស្រូវពូជនិងពូជដំណាំដទៃឱ្យបានទាន់ពេល សម្រាប់ការបង្កបង្កើនផលរបស់ប្រជាពលរដ្ឋ។ កន្លែងណាដែលវាយតម្លៃរួចត្រូវដឹកស្រូវពូជឬពូជដំណាំដទៃទៀតទៅចែកជូនតែម្តង ដោយឥតត្រូវរង់ចាំនោះទេ។
ក្នុងពិធីប្រគល់សញ្ញាបត្រជូននិស្សិតសាកលវិទ្យាល័យជាតិគ្រប់គ្រងជាង ៦ ពាន់នាក់ នាថ្ងៃទី ១៧ ខែតុលា លោក ហ៊ុន សែន ថ្លែងថា កន្លែងណាដែលវាយតម្លៃពីការខូចខាតបានមុនគឺត្រូវដឹកជញ្ជូនពូជទាំងនោះទៅឱ្យប្រជាជន។ កន្លែងណាដែលអាចធ្វើស្រូវបានឡើងវិញក៏ធ្វើស្រូវ តែកន្លែងណាដែលមិនអាចធ្វើស្រូវបានឡើងវិញ ត្រូវផ្គត់ផ្គង់ពូជទាំងនោះដើម្បីឱ្យពួកគាត់អាចមានលទ្ធភាពនឹងស្តារឡើងវិញ។
លោកបញ្ជាក់ថា៖ «ហ្នឹងជាវិធីដើម្បីដោះស្រាយ ហើយអត់រង់ចាំថា ចាំវាយតម្លៃរួច ១ ស្រុក បានរាយការណ៍ អត់ទេ។វាយតម្លៃបាន ១ ឃុំគឺបញ្ជូនទិន្នន័យ ១ ឃុំ ដឹកទៅតែម្តង យកទៅឱ្យប្រជាពលរដ្ឋ។ មិនត្រូវឱ្យប្រជាពលរដ្ឋរត់ដើររកស្រូវពូជទេ។ពិតហើយមានប្រជាពលរដ្ឋខ្លះគាត់មានពូជទុកខ្លួនឯង ស្រគួរខ្លួនឯង តែមានប្រជាជនភាគច្រើនគាត់អត់បានបម្រុងទុក»។
លោកនាយករដ្ឋមន្ត្រីបានប្រាប់ដល់អាជ្ញាធរខេត្តជាប់ពាក់ព័ន្ធត្រូវនៅកៀកកិតនឹងប្រជាជនហើយក្រសួងកសិកម្មរុក្ខាប្រមាញ់ និងនេសាទត្រូវតែធ្វើសកម្មភាពនេះឱ្យបានលឿនជាមួយនឹងគណៈកម្មការគោលនយោបាយសេដ្ឋកិច្ច ដែលក្នុងនោះមានក្រសួងសេដ្ឋកិច្ច និងហិរញ្ញវត្ថុផងដែរ ដើម្បីវាយតម្លៃអំពីការខូចខាត ហើយផ្គត់ផ្គង់ពូជភ្លាមសម្រាប់ប្រជាជន។
លោកបន្តថា៖ «ហើយសូមផ្ដាំទៅមន្ត្រីកសិកម្មទាំងអស់ ក៏ដូចជាអាជ្ញាធរដែនដី មិនមែនជិះសេះមើលផ្កាទេ ត្រូវនៅឱ្យជាប់ជាមួយប្រជាពលរដ្ឋ វាយតម្លៃឱ្យត្រូវហើយនៅកៀកកិតជាមួយគាត់។ ចួនកាលពូជដាក់ទៅវាមិនដុះ ព្រោះចូនកាលវាអាច ពូជខ្លះវាមានទិញមុនទិញក្រោយ វាមិនដុះ។ បើវាមិនដុះត្រូវដោះស្រាយម៉េចទៀត?។ អ៊ីចឹងបានកាលៈទេសៈ ទាមទារឱ្យផ្នែកវិស័យកសិកម្មយកចិត្តទុកដាក់ធ្វើអន្តរាគមន៍បន្ទាន់ អត់មានពេលត្រូវរង់ចាំនេះ រង់ចាំនោះធ្វើផងមិនធ្វើផងអត់ទេ»។
ក្រៅពីនោះ លោក ហ៊ុន សែន បានអរគុណដល់សប្បុរសជននានា ដែលរួមមានទាំងកាកបាទក្រហមកម្ពុជា ដែលបានចែកជូនជាជំនួយ និងអង្ករដល់អ្នកដែលមានផលប៉ះពាល់ព្រោះបើប្រៀបធៀបស្ថានភាពក្នុងឆ្នាំ ២០២០ និងឆ្នាំ ២០២២ នេះ គឺវាមិនដូចគ្នានោះទេ ដោយលោកបញ្ជាក់ថា៖ «ឆ្នាំ ២០២០ យើងធ្វើអន្តរាគមន៍ទូទៅតែម្តង ព្រោះវាលិចទាំងអស់គ្នា តែឥឡូវលិចដែរ ក៏ប៉ុន្តែ មានអ្នកដែលធ្ងន់ធ្ងរ អ្នកដែលមិនធ្ងន់ធ្ងរ។ យើងធ្វើអន្តរាគមន៍អ្នកដែលធ្ងន់ធ្ងរ ហើយដែលខ្វះខាត។ យើងមិនធ្វើអន្តរាគមន៍ទូទៅទេ»។
ជាមួយគ្នានេះលោកបានប្រាប់ដល់ធនាគារជាតិនៃកម្ពុជាធ្វើការប្រជុំមួយជាមួយនឹងម្ចាស់គ្រឹះស្ថានហិរញ្ញវត្ថុ ដើម្បីឱ្យគ្រឹះស្ថានហិរញ្ញវត្ថុផ្តល់ការអនុគ្រោះដល់អ្នកដែលទទួលផលប៉ះពាល់ពីគ្រោះទឹកជំនន់នេះតាមរយៈពន្យារពេលសងឥណទាន ហើយលោកក៏បានអំពាវនាវត្រង់ដល់គ្រឹះស្ថានហិរញ្ញវត្ថុទាំងអស់ចូលរួមសម្រាលបន្ទុកដោយត្រូវផ្តល់ការអនុគ្រោះដល់អ្នកខ្ចីឥណទាន ដែលរងផលប៉ះពាល់នេះតាមរយៈពន្យារពេលសង បន្ធូរបន្ថយអត្រាការប្រាក់ និងរៀបចំឥណទានឡើងវិញ។
លោក ហ៊ុន សែន បញ្ជាក់ថា៖ «ខ្ញុំព្រះករុណាខ្ញុំសូមអំពាវនាវចំពោះផ្នែកធនាគារ និងមីក្រូហិរញ្ញវត្ថុផ្តល់នូវការអនុគ្រោះ សម្រាប់អ្នកដែលទទួលផលប៉ះពាល់ពីគ្រោះទឹកជំនន់នេះតាមរយៈនៃការពន្យារពេលសម្រាប់ការសងបន្ធូរបន្ថយការប្រាក់ឬតាមរយៈការរៀបចំឥណទានឡើងវិញ។ សូមយោគយល់ចំពោះការលំបាករបស់ប្រជាពលរដ្ឋ ដែលលិចលង់ហើយយើងទៅរឹបអូសផ្ទះសំបែងដីធ្លីរបស់គាត់តាមកិច្ចសន្យាដើមវាអត់ត្រូវទេ»។
តាមរបាយការណ៍គណៈកម្មាធិការជាតិគ្រប់គ្រងគ្រោះមហន្តរាយ (NCDM) បានឱ្យដឹងថា ប្រជាកសិករចំនួន ១ ៤២៦ គ្រួសារនៅក្នុងខេត្តកំពង់ធំដែលរងការខូតខាតដំណាំស្រូវដោយសារតែគ្រោះធម្មជាតិជំនន់ទឹកភ្លៀង ត្រូវបានទទួលពូជស្រូវរបស់រាជរដ្ឋាភិបាលចំនួន ១០ ម៉ឺនគីឡូក្រាមកាលពីថ្ងៃទី១៦ខែតុលា ដើម្បីស្តារការដាំដុះឡើងវិញនៅពេលទឹកជំនន់បានស្រក។
គួររំឭកថា កាលពីថ្ងៃទី ៨ ខែតុលា លោកនាយករដ្ឋមន្ត្រី ហ៊ុន សែន ដាក់ចេញបទបញ្ជាឱ្យលោក អូនព័ន្ធមុនីរ័ត្ន រដ្ឋមន្ត្រីស្តីទីក្រសួងកសិកម្មចាត់មន្ត្រីជំនាញក្រសួងចុះវាយតម្លៃការខូចខាតដំណាំស្រូវឱ្យបានឆាប់បំផុត ដើម្បីរាជរដ្ឋាភិបាលអាចបញ្ចេញពូជស្រូវឱ្យបានយ៉ាងលឿនទៅកាន់គោលដៅស្រូវដែលខូចខាតបន្ទាប់ពីឃុំចំនួនជាង ៧០០ បានលិចលង់ដោយសារទឹកជំនន់៕
