ភ្នំពេញៈ រថយន្តជិត ២០ ម៉ឺនគ្រឿង បានបើកបរនៅលើផ្លូវល្បឿនលឿន ភ្នំពេញ-ព្រះសីហនុ ក្នុងរយៈពេល ១៥ ថ្ងៃ ក្រោយពីបានបើកឱ្យសាកល្បងដោយមិនបង់ប្រាក់កាលពីដើមខែតុលានេះ ដើម្បីស្វែងយល់ពីការធ្វើចរាចរណ៍ និងបញ្ហានានាដែលកើតមាននៅលើផ្លូវថ្មី ១ នេះ។ ទន្ទឹមនេះដែរ ក្រសួងសាធារណការ និងដឹកជញ្ជូន បានទទូចជាថ្មីឱ្យអ្នកបើកបរ ចូលរួមគោរពច្បាប់ ដោយប្រើប្រាស់គន្លងផ្លូវឱ្យបានត្រឹមត្រូវ និងគោរពល្បឿនកំណត់។ យោងតាម លោក ហ៊ាង សុធាយុត្តិ អ្នកនាំពាក្យក្រសួងសាធារណការ និងដឹកជញ្ចូន បានប្រាប់ភ្នំពេញប៉ុស្តិ៍ នៅថ្ងៃទី ១៧ តុលា។
លោក បានបញ្ជាក់ថា៖ «យើងឃើញមានបញ្ហាមួយចំនួន ដូចជាការកកស្ទះនៅច្រកចូល ទោះមិនកកស្ទះពេញ ១ ថ្ងៃ ប៉ុន្តែមានការកកស្ទះនៅម៉ោងមមាញឹក ដោយសារកត្តាទី ១ ច្រកផ្លូវល្បឿនលឿន គឺបងប្អូនយើងចំណាយពេលណែនាំច្រើន ដើម្បីធានានូវសុវត្ថិភាពចរាចរណ៍។ ទី ២ គឺបងប្អូនយើងបើកបំពានគន្លង។ ក្រៅពីនេះ ដោយសារចំនួនបញ្ជររបស់យើងបើកមិនទាន់អស់ ព្រោះជាការបើកសាកល្បង»។
លោក សុធាយុត្តិ បានអះអាងថា បញ្ហាបើកលើសល្បឿន នៅតែបន្តកើតមាន នៅពេលដែលអ្នកបើកបរ បានបើកលើសល្បឿន ហើយជ្រុលទៅបុកប៉ះជាមួយរនាំងដែកដែលអមសងខាងផ្លូវ ខណៈរបាយការណ៍ មិនមានហេតុការគ្រោះថ្នាក់ចរាចរណ៍ណាមួយ ដែលកើតមានឡើងបណ្តាលឱ្យមានគ្រោះថ្នាក់បាត់បង់ជីវិតនោះឡើយ។
លោក បានថ្លែងដោយអំពាវនាវដល់ប្រជាពលរដ្ឋមិនត្រូវលែងសត្វពាហនៈឱ្យឡើងមកលើផ្លូវដូចជាសត្វឆ្កែ សត្វចិញ្ចឹមផ្សេងៗ ដើម្បីរក្សាសុវត្ថិភាពសាធារណៈ។
លោក ហ៊ាង សុធាយុត្តិ ថ្លែងថា៖ «ក្រសួង កំពុងបន្តតាមដាន និងវាយតម្លៃក្រុមហ៊ុន ទៅលើការអនុវត្ត ការធ្វើអាជិវកម្មរបស់ក្រុមហ៊ុន ដោយធ្វើយ៉ាងណា ឱ្យក្រុមហ៊ុន បន្តយកចិត្តទុកដាក់ក្នុងការផ្តល់សេវា និងដោះស្រាយបញ្ហាដែលកើតមាននៅផ្លូវល្បឿនលឿននេះ»។
ក្រសួងសាធារណការ និងដឹកជញ្ជូន បានប្រកាសជាថ្មីម្តងទៀត ដោយក្រើនរំឭកដល់អ្នកបើកបរលើផ្លូវល្បឿនលឿន ត្រូវបើកបរតាមគន្លងផ្លូវសម្រាប់ចរាចរណ៍ធម្មតា ដោយទុកគន្លងវ៉ាជែង ដែលជាគន្លងស្ថិតនៅខាងឆ្វេងដៃបំផុត សម្រាប់ប្រើប្រាស់ក្នុងការវ៉ាជែងតែប៉ុណ្ណោះ។
ក្រសួងបានណែនាំដែរថា ក្នុងករណីសុំជែង អ្នកបើកបរយានយន្តត្រូវឱ្យសញ្ញាប្ដូរទិសខាងឆ្វេងយ៉ាងតិច ៥ វិនាទី ហើយត្រូវងាកទៅគន្លងផ្លូវខាងឆ្វេងនៃផ្លូវល្បឿនលឿនដែលជាគន្លងផ្លូវសម្រាប់ជែង។ នៅពេលជែងផុត អ្នកបើកបរត្រូវឱ្យសញ្ញាប្ដូរទិសខាងស្ដាំដើម្បីងាកចូលគន្លងផ្លូវសម្រាប់ចរាចរណ៍ធម្មតាវិញ។
ក្រសួងបានបញ្ជាក់ថា៖ «ក្នុងករណីចរាចរណ៍មមាញឹក អ្នកបើកបរយានយន្តអាចប្រើប្រាស់គន្លងផ្លូវទាំង ២ បាន ដោយឡែករថយន្តធុនធ្ងន់ត្រូវប្រកាន់យកគន្លងផ្លូវ សម្រាប់ចរាចរណ៍ធម្មតាដដែល។ ក្នុងករណីនេះ យានយន្តនៅតាមគន្លងផ្លូវណាមួយបើកបរលឿនជាង មិនចាត់ទុកជាការជែងឡើយ ហើយយានយន្តដែលស្ថិតនៅក្រោយគេត្រូវប្រើភ្លើងសញ្ញាអាសន្នជាដំណឹង»។
តាមការណែនាំរបស់ក្រសួង គន្លងផ្លូវសម្រាប់ឈប់បន្ទាន់ គឺជាគន្លងផ្លូវសម្រាប់ឈប់ ក្នុងករណីយានយន្តខូច ឬមានបញ្ហាផ្សេងៗ ដែលអ្នកបើកបរទាំងអស់ត្រូវអនុវត្តដើម្បីសុវត្ថិភាពក្នុងការធ្វើដំណើរទាំងអស់គ្នា។
តាមរដ្ឋបាលខេត្តព្រះសីហនុ បានដឹងនៅថ្ងៃទី ១៦ ខែតុលាថា មានភ្ញៀវទេសចរជាតិ និងអន្តរជាតិ ដើរលេងកម្សាន្ត នៅខេត្តព្រះសីហនុនៅថ្ងៃចុងសប្ដាហ៍ រយៈពេល ២ ថ្ងៃ (ថ្ងៃសៅរ៍ និងថ្ងៃអាទិត្យ) ចំនួន ១២៥ ០០០ នាក់ ខណៈកាលពីសប្តាហ៍ទី ១ នៃខែតុលា មានភ្ញៀវទេសចរជាតិ និងអន្តរជាតិសរុបជាង ១២ ម៉ឺននាក់៕