ភ្នំពេញៈ រាជរដ្ឋាភិបាលត្រៀមចំណាយថវិកាជាតិប្រមាណជាង ២ លានដុល្លារ ជួយដល់ប្រជាពលរដ្ឋជិត ២ ម៉ឺននាក់ ដែលបានរងគ្រោះដោយសារទឹកជនន់ ហើយមន្ត្រីជំនាញត្រូវវាយតម្លៃឱ្យទាន់ពេលវេលា និងជាក់ស្ដែង ដើម្បីដោះស្រាយទៅតាមស្ថានភាពនៃតំបន់នីមួយៗ នៅតាមបណ្ដាខេត្តនានាចំនួន ២៣ ខេត្ត។
នៅក្នុងពិធីប្រគល់សញ្ញាបត្រដល់និស្សិតនៃសាកលវិទ្យាល័យជាតិគ្រប់គ្រងនៅថ្ងៃទី ១៧ ខែតុលា នៅមជ្ឈមណ្ឌល ពាណិជ្ជកម្ម និងពិព័រណ៍ជ្រោយចង្វារ រាជធានីភ្នំពេញ លោក ហ៊ុន សែន ថ្លែងថា ប្រជាពលរដ្ឋរងផលប៉ះពាល់ប្រមាណ ១៩ ៣៩៧ គ្រួសារ ក្នុងចំណោមពលរដ្ឋរងគ្រោះជាង ១០៧ ០០០ គ្រួសារនឹងទទួលបានប្រាក់ឧបត្ថម្ភជាមធ្យម ៤២ ដុល្លារក្នុង ១ គ្រួសារ ក្នុងរយៈពេល ៣ ខែ ខណៈលោកអះអាងថា រដ្ឋាភិបាលត្រូវចំណាយប្រាក់សរុប ២ លាន ៤ សែនដុល្លារ សម្រាប់បើកផ្តល់ជូនគ្រួសាររងគ្រោះទាំងនោះ។ អាជ្ញាធរនៅតាមមូលដ្ឋានដែលទទួលរងផលប៉ះពាល់ ដោយសារគ្រោះទឹកជំនន់ត្រូវធ្វើការវាយតម្លៃឱ្យទាន់ ពេលវេលា ដើម្បីចុះចែកជូននូវស្រូវពូជ និងពូជដំណាំតាមស្ថានភាពជាក់ស្តែងរបស់ប្រជាពលរដ្ឋដែលកំពុងរងគ្រោះ។
លោកថ្លែងថា ប្រជាពលរដ្ឋដែលរងផលប៉ះពាល់ប្រមាណ ១៩ ៣៩៧ គ្រួសារ ក្នុងចំណោមពលរដ្ឋរងគ្រោះជាង ១០៧ ០០០ គ្រួសារ នឹងទទួលបានប្រាក់ឧបត្ថម្ភជាមធ្យម ៤២ ដុល្លារ ក្នុង ១ គ្រួសារ ក្នុងរយៈពេល ៣ ខែ ខណៈលោកអះអាងថា រដ្ឋាភិបាលត្រូវចំណាយប្រាក់សរុប ២ លាន ៤ សែនដុល្លារ សម្រាប់បើកផ្តល់ជូនគ្រួសាររងគ្រោះទាំងនោះ។
លោកបានបញ្ជាក់ទៀតថា៖ «មានប៉ុន្មានគ្រួសារ ដែលគាត់មិនមែនជាអ្នកក្រីក្រទេ ប៉ុន្តែគាត់ទទួលរងផលប៉ះពាល់ ដោយសារទឹកជំនន់នេះ។ អ៊ីចឹងទេ យើងអាចជួយឧបត្ថម្ភគាត់ក្នុងរយៈពេល ៣ ខែ ដែលចាត់ទុកថា នៅក្នុងជំពូកហានិភ័យនៃអតិផរណា។ ប៉ុន្តែចំពោះហានិភ័យនៃអតិផរណាអាចទៅ ៣ ខែ បើកឱ្យតែម្តង។ សម្រាប់អ្នកទាំងនេះ គឺអាចបើកជូនលឿនជាងនេះ ព្រោះមិនមែនជាប្រភេទបណ្ណក្រីក្រទេ គឺគាត់ជួបប្រទះមហន្តរាយទឹកជំនន់»។
លោកថា៖ «យើងអន្តរាគមន៍ផ្តល់ពូជសម្រាប់ពួកគាត់ ស្តារឡើងវិញជាពូជស្រូវ ឬពូជដំណាំ។ យើងអន្តរាគមន៍អ្នកនៅនោះ ច្បាស់ជាមានអ្នកដែលកំពុងទទួលផលប្រយោជន៍ពីបណ្ណក្រីក្រ។ អ្នកដែលទទួលផលប្រយោជន៍ពីបណ្ណក្រីក្រ គឺត្រូវបន្តទទួលតទៅទៀត ដោយយើងបានដាក់រយៈពេល ៣ ខែ។ ប៉ុន្តែយើងកំពុងធ្វើការវាយតម្លៃ សម្រាប់អ្នករងផលប៉ះពាល់ជាអតិបរមា។ សូមឱ្យក្រសួងផែនការ និងបសស ចូលរួមធ្វើការវាយតម្លៃនៅក្នុងក្របខ័ណ្ឌជាង ១០ ម៉ឺនគ្រួសារ ដែលទទួលផលប៉ះពាល់នេះ ដែលអាចនឹងទទួលបានរយៈពេល ៣ ខែ នៃជំនួយ»។
លោក ហ៊ុន សែន ក៏បានអះអាងដែរថា លោកនឹងអន្តរាគមន៍ទៅបណ្តាធនាគារទាំងអស់ តាមរយៈធនាគារជាតិកម្ពុជា ដើម្បីបន្ធូរបន្ថយការប្រាក់ និងរៀបចំផែនការនៃការសងត្រឡប់របស់ពលរដ្ឋដែលកំពុងរងគ្រោះដោយសារគ្រោះទឹកជំនន់ទាំងនោះផងដែរ។
លោកបានបញ្ជាក់ថា៖ «ខ្ញុំសុំឱ្យធនាគារជាតិនៃកម្ពុជា ធ្វើការប្រជុំមួយជាមួយនឹងម្ចាស់គ្រឹះស្ថានហិរញ្ញវត្ថុ ដើម្បីឱ្យគ្រឹះស្ថានហិរញ្ញវត្ថុ ហើយខ្ញុំ ក៏អំពាវនាវត្រង់ទៅកាន់គ្រឹះស្ថានហិរញ្ញវត្ថុទាំងអស់ ចូលរួមសម្រាលបន្ទុក ដោយផ្តល់ការអនុគ្រោះដល់អ្នកខ្ចីឥណទានដែលរងផលប៉ះពាល់ តាមរយៈពន្យារពេលសង បន្ធូរបន្ថយអត្រាការប្រាក់ និងការរៀបចំឥណទានឡើងវិញ»។
តាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ ស្ថានភាពជំនន់ទឹកភ្លៀងបានប៉ះពាល់ប្រជាពលរដ្ឋនៅក្នុងមូលដ្ឋាននានា ១០៥ ស្រុកខណ្ឌ និង ៤៣៥ ឃុំ-សង្កាត់ នៅតាមបណ្ដាខេត្តចំនួន ២៣ ខេត្ត។ ខេត្តដែលរងផលប៉ះពាល់ធ្ងន់ជាងគេ គឺមានខេត្តកំពង់ធំ សៀមរាប បន្ទាយមានជ័យ និងបាត់ដំបង។ មានដំណាំស្រូវជាង ១៩ ម៉ឺនហិកតាបានរងការជន់លិចក្នុងនោះមានជាង ៦ ម៉ឺនហិកតាបានរងការខូចខាត និងធ្វើឱ្យពលរដ្ឋប្រមាណ ១១២ ៧៦០ គ្រួសារ ស្មើនឹង ៥០៧ ៤០០ នាក់ រងផលប៉ះពាល់ ដោយសារទឹកជំនន់។
កញ្ញា សេង រាសី នាយិកាប្រតិបត្តិអង្គការសីលការបានប្រាប់ភ្នំពេញប៉ុស្តិ៍នៅថ្ងៃទី ១៧ ខែតុលាថា ការប្រកាសពង្រីកផ្តល់ការឧបត្ថម្ភដល់ពលរដ្ឋរងគ្រោះដទៃទៀតរបស់រដ្ឋាភិបាល គឺជាការប្រសើរ ខណៈបញ្ហាទាំងនេះ គឺជាកត្តាព្រួយបារម្ភ និងការចង់បានរបស់បណ្តាញអង្គការសង្គមស៊ីវិល ដើម្បីឱ្យមានការយកចិត្តទុកដាក់។
កញ្ញាថា៖ «យើងមើលឃើញការខិតខំប្រឹងប្រែងរបស់រដ្ឋាភិបាល ក្នុងការពង្រីកវិសាលភាពក្នុងការផ្តល់ការគាំទ្រអ្នក ដែលគាត់កំពុងរងគ្រោះ និងងាយរងគ្រោះ»។
កញ្ញាថា រដ្ឋាភិបាលគួរមានការគិតគូរទៅដល់ប្រជាពលរដ្ឋកំពុងប្រកបរបរក្នុងវិស័យសេដ្ឋកិច្ចក្រៅប្រព័ន្ធ និងអ្នកកំពុងធ្វើសកម្មភាពស្វ័យវិនិយោគលើមុខរបរនានានៅក្នុងប្រទេសឱ្យទទួលបានការគាំទ្រពីរដ្ឋាភិបាល តាមរយៈជំនួយសង្គម និងបសសផងដែរ៕