.jpg)
ជនសង្ស័យ៣នាក់នៅក្នុងករណីលិចទូកដ បណ្ដាលឱ្យសិស្ស១១នាក់លង់ទឹកស្លាប់។ រូបថត នគរបាល
ភ្នំពេញៈ ជនសង្ស័យ ៣ នាក់ដែលជាប់ពាក់ព័ន្ធឧប្បទ្ទវហេតុលិចទូកចម្លងស្លាប់សិស្ស ១១ នាក់ត្រូវបានដោះលែងឱ្យក្រៅឃុំជាបណ្ដោះអាសន្ន នៅថ្ងៃទី ១៧ ខែតុលា បន្ទាប់ពីសមត្ថកិច្ចបានសួរចម្លើយ និងធ្វើកំណត់ហេតុស្របតាមច្បាប់រួចរាល់ តែសំណុំរឿងនៅបន្តដើរទៅមុខ។
លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្ដាលមានប្រសាសន៍ថា «ចំពោះករណីរឿងលិចទូក គឺឯកឧត្តម ព្រះរាជអាជ្ញា អនុញ្ញាតឱ្យជនសង្ស័យទាំង ៣ នាក់ វិលត្រឡប់ទៅផ្ទះជាបណ្តោះអាសន្ន មិនមែនមានន័យថា ដោះលែង មិនចាត់ការនោះទេ ដោយធ្វើកិច្ចសន្យាត្រឹមត្រួវ ហើយសំណុំរឿងនឹងបន្តចាត់ការតាមនីតិវិធីច្បាប់»។
ការដោះលែងអ្នកទាំង ៣ ឱ្យនៅក្រៅឃុំជាបណ្ដោះអាសន្នបន្ទាប់ពីពួកគេត្រូវបានហៅមកសួរនាំ កាលពីថ្ងៃទី ១៥ ខែតុលា ក្រោយមានឧប្បទ្ទវហេតុលិចទូកចម្លង នៅឃុំកំពង់ភ្នំ ស្រុកលើកដែក នៅថ្ងៃទី ១៣ តុលា។ ជនសង្ស័យទាំង ៣ នាក់នោះ ២ នាក់ជាបងប្អូនបង្កើតជាម្ចាស់អាជីវកម្ម និងអ្នកបើកទូកម្នាក់។ អ្នកទាំង ៣ នោះមានឈ្មោះ ឆឹង វណ្ណា ភេទស្រី អាយុ ៥២ ឆ្នាំ ជាម្ចាស់ទូកដឈ្មោះ ឆឹង ស្រីនាង ភេទស្រី អាយុ ៦៩ ឆ្នាំ ជាម្ចាស់ទូកដ និង ថេត ចន្ធី ភេទប្រុស អាយុ ១៥ ឆ្នាំ ជាអ្នកបើកទូក។
នៅក្នុងសំណុំរឿងនេះសាធារណជន សង្គមស៊ីវិល អ្នកនយោបាយ ចង់ឃើញអ្នកទទួលខុសត្រូវផ្សេងទៀតចេញមុខទទួលស្គាល់ពីភាពខ្វះខាតនៃការគ្រប់គ្រងក្នុងដែនសមត្ថកិច្ចរបស់ខ្លួន។
ផ្អែកតាមសំណេរលើបណ្ដាញសង្គមហ្វេសប៊ុក លោក យឹម ស៊ីណន អ្នកគាំទ្រលោក កឹម សុខា ដែលធ្លាប់រស់នៅនិងធ្វើការនៅប្រទេសកូរ៉េខាងត្បូងបានប្រើការប្រៀបធៀបយ៉ាងដូច្នេះ៖ «នៅកូរ៉េខាងត្បូងកាលពីថ្ងៃទី ១៦ ខែមេសា ឆ្នាំ ២០១៤ ស្រឡាង Sewol ដែលធ្វើដំណើរពី Incheon ទៅ Jeju បានលិចនៅក្នុងសមុទ្រក្បែរ Jindo, Jeollanam-do ។ ក្នុងចំណោមមនុស្សជិះសរុបចំនួន ៤៧៦ នាក់ មានតែ ១៧២ នាក់ប៉ុណ្ណោះដែលនៅរស់រានមានជីវិត និង ៣០៤ នាក់ត្រូវបានស្លាប់ ឬបាត់ខ្លួន។ ចំណែកការទទួលខុសត្រូវរបស់អ្នកពាក់ព័ន្ធរួមមាន៖ នាយកវិទ្យាល័យរបស់សិស្សដែលបាត់បង់ជីវិត ត្រូវបានធ្វើអត្តឃាតសម្លាប់ខ្លួនឯង ដោយបន្សល់នូវពាក្យសោកស្តាយ និងការចូលរួមរំលែកទុក្ខដល់គ្រួសារសព។ ព្រះរាជអាជ្ញាបានស៊ើបអង្កេតចាប់ខ្លួនម្ចាស់ក្រុមហ៊ុនស្រឡាង និងអ្នកជាប់ពាក់ពន្ធ័ផ្សេងៗ។ សង្គមស៊ីវិល និងបក្សក្រៅរដ្ឋាភិបាល បានចេញមុខទាមទារសំណង និងតម្រូវឱ្យរដ្ឋាភិបាលទទួលខុសត្រូវទាំងស្រុងលើភាពកម្សោយនៃការដឹកនាំរបស់ខ្លួន»។
នៅកម្ពុជាវិញ លោក យឹម ស៊ីណន បានចោទជាសំណួរថា តើមន្ត្រីណាខ្លះអាចនឹងក្លាហានហ៊ានចេញមុខសុំទោស និងទទួលខុសត្រូវ? ដូចជាៈ ករណីជាន់គ្នាស្លាប់នៅស្ពានកោះពេជ្រករណីថ្មីៗនៃការលិចទូកបាត់បង់ជីវិតសិស្សសាលា ១១ នាក់នេះ និងករណីផ្សេងៗ។
លោក មឿន តុលា នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ថ្លែងថា បើមើលមួយភ្លែតម្ចាស់ទូកដពិតជាទទួលខុសត្រូវលើការស្លាប់ជីវិតមនុស្ស។ លោកបន្ថែមថា៖« ប៉ុន្តែយើងត្រូវពិនិត្យមើលឱ្យជ្រៅជាងនេះ ពេលដែលគាត់បើកអាជីវកម្មទូកដហ្នឹង អាជ្ញាធរមានបានមកណែនាំ ឬតម្រូវឱ្យគាត់ត្រូវមានសម្ភារសុវត្ថិភាពទេ ស្តង់ដា គុណភាពទូក ត្រឹមត្រូវទេ។ អ៊ីចឹងបើសិនជាចាប់ម្ចាស់ទូក គប្បីចាប់អាជ្ញាធរពាក់ព័ន្ធដែររាប់ចាប់តាំងពីភូមិដល់ខេត្តដែលខ្លួនឯងបានធ្វេសប្រហែសបណ្ដោយឱ្យមានអាជីវកម្មបែបនេះជាបន្តរហូតមក ដល់ពេលមានគ្រោះថ្នាក់ដាក់បន្ទុកតែទៅលើអាជីវករតូចតាច ដែលខ្ញុំយល់ថា មិនមែនជារឿងត្រឹមត្រូវទេ»។
ជុំវិញរលករិះគន់នេះ មិនទាន់ឃើញមានអ្នកនៅក្នុងស្ថាប័នណាមួយចេញមុខបំភ្លឺនោះទេ។ អភិបាលខេត្តកណ្ដាលនៅថ្ងៃទី ១៨ ខែតុលានេះបានប្រាប់ថា លោកកំពុងជាប់ប្រជុំមិនអាចនិយាយអ្វីបានទេ។
លោក ផៃ ស៊ីផាន ប្រធានអង្គភាពអ្នកនាំពាក្យរដ្ឋាភិបាលថ្លែងថា៖ «យើងមិនអាចទៅប្រឆាំងការរិះគន់ និងការបន្ទោសរបស់គេបានទេ យើងស្វាគមន៍ការបន្ទោស ក៏ប៉ុន្តែយើងនឹងរកមធ្យោបាយ ដើម្បីឆ្លើយតបតម្រូវការជាក់ស្ដែងដែលយើងចង់បានទាំងអស់គ្នា ទាំងអាណាព្យាបាល ប្រជាពលរដ្ឋ សាលា និងរដ្ឋាភិបាល ដោះស្រាយការធ្វើដំណើររបស់សិស្សប្រកបដោយសុវត្ថិភាព។ ឧទាហរណ៍ការដឹកជញ្ជូនកម្មករ កម្មករជាអ្នកទទួលខុសត្រូវសន្តិសុខសុវត្ថិភាពផ្ទាល់ខ្លួនហើយថៅកែរោងចក្រទទួលខុសត្រូវកម្រិតណា»។
ចំពោះការប្រៀបធៀបការទទួលខុសត្រូវរវាងអាជ្ញាធរប្រទេសកូរ៉េ និងអាជ្ញាធរប្រទេសកម្ពុជាអ្នកនាំពាក្យរូបនេះការពារថា៖ «ខ្មែរផ្សេង កូរ៉េផ្សេង យើងមើលពីចំណូលរបស់បុគ្គលម្នាក់ថា ខុសគ្នាយ៉ាងម៉េច? កាលណាយើងយកស្តង់ដា យើងទៅប្រៀបធៀបជាមួយគេ វាមិនដូចគ្នាទេ»។
ដំណាលគ្នានេះ អង្គការ Save the Children ប្រចាំប្រទេសកម្ពុជា នៅថ្ងៃទី ១៧ ខែតុលា បានចេញអំពាវនាវដល់អាជ្ញាធរ និងស្ថាប័នពាក់ព័ន្ធនៅទូទាំងប្រទេស ចូលរួម និងពង្រឹងការអនុវត្ត ក្របខ័ណ្ឌរួមស្ដីពីសាលារៀនសុវត្ថិភាព ដើម្បីធានាថា កុមារមានសុវត្ថិភាពទាំងក្នុង និងក្រៅសាលារៀន រួមមានទាំងសុខសុវត្ថិភាពរបស់កុមារក្នុងការធ្វើដំណើរទៅ-មកពីផ្ទះទៅសាលារៀន ដើម្បីធានាថាកុមារគ្រប់រូប អាចរស់រានមានជីវិត ទទួលបានការអប់រំ និងត្រូវបានការពារពេញលេញ។
នៅក្រោយឧប្បទ្ទវហេតុលិចទឹកទូកចម្លងអាជ្ញាធរស្រុកលើកដែក ខេត្តកណ្តាល បានចេញសេចក្តីណែនាំតម្រូវឱ្យម្ចាស់អាជីវកម្មទូកដទាំងអស់ ត្រូវមានអាវពោងសុវត្ថិភាព សម្រាប់អ្នកដំណើរ និងហាមដាច់ខាតចំពោះការដឹកលើសចំណុះ ឬការប្រើប្រាស់មធ្យោបាយទូកចម្លង ដែលចាស់ទ្រុឌទ្រោម៕
វីដេអូ៖
