.jpg)
លោក ហ៊ុន សែន ក្នុងជំនួបជាមួយលោក José Manuel Ramos-Horta នៅទីស្នាក់ការអង្គការសហប្រជាជាតិកាលពីថ្ងៃទី ២៣ កញ្ញា ឆ្នាំ ២០២២។ រូបថត SPM
ភ្នំពេញៈ ប្រធានាធិបតីប្រទេសទីម័រខាងកើតលោក ចូហ្សេ ម៉ានូអែល រ៉ាមូស អរតា (José Manuel Ramos-Horta) នឹងចាប់ផ្តើមមកបំពេញទស្សនកិច្ចផ្លូវរដ្ឋនៅកម្ពុជានាថ្ងៃទី ១៩ ខែតុលា ហើយគ្រោងនឹងបញ្ចប់នៅថ្ងៃទី ២១ ខែតុលាតបតាមការអញ្ជើញរបស់ព្រះមហាក្សត្រ។
ក្រសួងការបរទេសកម្ពុជាបញ្ជាក់ក្នុងសេចក្តីប្រកាសព័ត៌មាននាថ្ងៃទី ១៨ ខែតុលា ថា ក្នុងអំឡុងពេលទស្សនកិច្ចផ្លូវរដ្ឋនេះ លោក José Manuel Ramos-Horta នឹងចូលក្រាបបង្គំគាល់ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា នៅព្រះបរមរាជវាំង។
លោកនឹងមានជំនួបដោយឡែកពីគ្នាជាមួយលោក សាយ ឈុំ ប្រធានព្រឹទ្ធសភា លោក ហេង សំរិន ប្រធានរដ្ឋសភា និងលោកនាយករដ្ឋមន្ត្រី ហ៊ុន សែន។
សេចក្តីប្រកាសព័ត៌មានបញ្ជាក់ថា៖ «សម្តេចតេជោនាយករដ្ឋមន្រ្តី និង ឯកឧត្តមប្រធានាធិបតីទីម័រខាងកើត នឹងអញ្ជើញជាអធិបតី ដ៏ខ្ពង់ខ្ពស់ ក្នុងពិធីចុះហត្ថលេខាលើឯកសារទ្វេភាគីដ៏មានសារៈសំខាន់ចំនួន២ រួមមាន កិច្ចព្រមព្រៀង សេវាកម្មអាកាសចរណ៍ និងអនុស្សរណៈនៃការយោគយល់ស្តីពីពាណិជ្ជកម្មស្រូវរវាងរាជរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាលនៃសាធារណរដ្ឋប្រជាធិបតេយ្យទីម័រខាងកើត»។
លោក José Manuel Ramos-Horta នឹងដាក់កម្រងផ្កាគោរពវិញ្ញាណក្ខន្ធ នៅវិមានឯករាជ្យ និងកន្រ្តកផ្កានៅមណ្ឌលព្រះបរមរូប ព្រះករុណា ព្រះបាទសម្តេចព្រះ នរោត្តម សីហនុ «ព្រះបរមរតនកោដ្ឋ» អតីតព្រះមហាក្សត្រនៃព្រះរាជាណាចក្រកម្ពុជា។
ក្នុងអំឡុងពេលស្នាក់នៅរាជធានីភ្នំពេញ លោកនឹងជួបជាមួយលោក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោក,ធ្វើបាឋកថាសាធារណៈនៅសាកលវិទ្យាល័យល្បីៗនៅរាជធានីភ្នំពេញ, ផ្តល់បទសម្ភាសដល់ស្ថាប័នព័ត៌មានក្នុងប្រទេស ក៏ដូចជា ថ្លែងសុន្ទរកថា នៅក្នុងវេទិកាកម្ពុជា-ទីម័រខាងកើត លើកទី ១ ស្តីពីទេសចរណ៍ និងធុរកិច្ច ដើម្បីការអភិវឌ្ឍ និងសន្តិភាពប្រកបដោយចីរភាព ផងដែរ។
សេចក្តីប្រកាសព័ត៌មានដដែលបញ្ជាក់ថា៖ «ដំណើរទស្សនកិច្ចផ្លូវរដ្ឋរបស់ ឯកឧត្តមបណ្ឌិត ចូហ្សេ ម៉ានូអែល រ៉ាមូស អរតា មកកាន់កម្ពុជា នឹងបន្តពង្រឹងនិងធ្វើឱ្យកាន់តែស៊ីជម្រៅបន្ថែមទៀតនូវទំនាក់ទំនងនិងកិច្ចសហប្រតិបត្តិការ ទាំងនៅក្នុងក្របខ័ណ្ឌទ្វេភាគី និងពហុភាគី ដើម្បីផលប្រយោជន៍ទៅវិញទៅមកនៃប្រទេសទាំង ២ »។
លោក ថុង ម៉េងដាវិត អ្នកសិក្សាស្រាវជ្រាវនៅមជ្ឈមណ្ឌលមេគង្គ សម្រាប់ការសិក្សាយុទ្ធសាស្ត្រ នៃវិទ្យាស្ថានចក្ខុវិស័យអាស៊ី (AVI) ប្រាប់ភ្នំពេញប៉ុស្តិ៍ថា កម្ពុជាជាប្រទេសតូចតែមានបេះដូងធំ ហើយកម្ពុជាគឺជាអ្នកគាំទ្រទីម័រខាងកើតចូលជាសមាជិកអាស៊ានផងដែរ។ ជំនួបរវាងលោក José Manuel Ramos-Horta និងលោក ហ៊ុន សែន នឹងពិភាក្សាគ្នាអំពីកិច្ចប្រតិបត្តិការសេដ្ឋកិច្ច សង្គមវប្បធម៌ នយោបាយនិងសន្តិសុខជាដើម។
លោកថ្លែងថា៖ «ប៉ុន្តែអ្វីដែលសំខាន់គឺការជួយជ្រោមជ្រែងទីម័រខាងកើតឱ្យចូលជាសមាជិកអាស៊ានកាន់តែឆាប់រហ័ស។ ទីម័រខាងកើត នឹងទទួលបានប្រយោជន៍ជាច្រើន ពីសមាជិកភាពអាស៊ាននេះ តាមរយៈការហក់ចូលទីផ្សារជិត ៧០០ លាននាក់ ការដោះដូរពាណិជ្ជកម្ម និងវិនិយោគជាដើម។ កម្ពុជានឹងដើរតួនាទីសំខាន់ក្នុងនាមជាប្រធានអាស៊ានក្នុងកិច្ចប្រជុំធំនាខែវិច្ឆិកាខាងមុខ ក្នុងការជួយទីម័រឱ្យក្លាយជាសមាជិក១ក្នុងគ្រួសារអាស៊ាននាពេលខាងមុខឆាប់ៗនេះ»។
ថ្លែងក្នុងសម័យប្រជុំលើកទី ៧៧ នៃមហាសន្និបាតអង្គការសហប្រជាជាតិ (UN) កាលពីខែកញ្ញាលោក José Manuel Ramos-Horta សង្ឃឹមថា ទីម័រខាងកើត នឹងក្លាយជាសមាជិកអាស៊ានទី ១១ នៅឆ្នាំ ២០២៣។
ថ្លែងក្នុងពិធីបើកកិច្ចប្រជុំរដ្ឋមន្ត្រីការបរទេសអាស៊ាននៅរាជធានីភ្នំពេញកាលពីដើមខែសីហា លោកនាយករដ្ឋមន្ត្រី ហ៊ុន សែន បង្ហាញសុទិដ្ឋិនិយមថា ប្រទេសទីម័រខាងកើត នឹងអាចចូលជាសមាជិកអាស៊ានយ៉ាងយូរនៅត្រឹមឆ្នាំ ២០២៣ ដោយលោកបញ្ជាក់ថា៖ «ដំណើរការនៃការចូលជាសមាជិកអាស៊ានរបស់ទីម័រឡេស្ត កំពុងមានវឌ្ឍនភាពយ៉ាងល្អ ហើយខ្ញុំមានសុទិដ្ឋិនិយមថា យើងនឹងអាចស្វាគមន៍ប្រទេសនេះមកកាន់គ្រួសារអាស៊ាន បានយ៉ាងយូរនៅត្រឹមឆ្នាំក្រោយ»។
កម្ពុជាគ្រោងរៀបចំកិច្ចប្រជុំកំពូលអាស៊ានលើកទី ៤០ និង ៤១ និងកិច្ចប្រជុំពាក់ព័ន្ធ ចាប់ពីថ្ងៃទី ៨-១៣ ខែវិច្ឆិកា នៅរាជធានីភ្នំពេញ ហើយបានផ្ញើលិខិតអញ្ជើញទៅកាន់រដ្ឋជាសមាជិកអាស៊ានទាំងអស់ លើកលែងតែប្រទេសមីយ៉ាន់ម៉ា ដែលស្នើសុំឱ្យបញ្ជូនតំណាងមិននយោបាយ៕
