ភ្នំពេញៈ លោកនាយករដ្ឋមន្ត្រី ហ៊ុន សែន ប្រកាសថា លោកនឹងធ្វើដំណើរទៅកាន់ខេត្តចំនួន ៤ ដែលរងផលប៉ះពាល់ ដោយសារទឹកជំនន់ គឺសៀមរាប បន្ទាយមានជ័យ បាត់ដំបង និងពោធិ៍សាត់រយៈពេល ៥ ថ្ងៃ ដោយចាប់ផ្តើមពីថ្ងៃទី ២០ ខែតុលា ដើម្បីជួបប្រជាពលរដ្ឋ ដែលរងគ្រោះដោយទឹកជំនន់ និងដោះស្រាយបញ្ហាជូនពួកគាត់។
លោកបានសរសេរនៅលើហ្វេសប៊ុកនៅថ្ងៃទី ១៨ ខែតុលា ថា៖ «បន្ទាប់ពីទទួលប្រធានាធិបតីទីម័រឡេស្តថ្ងៃ ២០ តុលា ខ្ញុំនឹងធ្វើដំណើរទៅកាន់ខេត្តចំនួន ៤ គឺសៀមរាប បន្ទាយមានជ័យ បាត់ដំបង និងពោធិ៍សាត់ ដោយប្រើពេល ៥ ថ្ងៃ ៤ យប់»។
លោកបន្ថែមថា៖ «ដំណើរទៅលើកនេះសំខាន់ជួប និងដោះស្រាយជូនប្រជាជនដែលរងគ្រោះ ដោយជំនន់ទឹកភ្លៀង។ ត្រៀមខ្លួនហត់នឿយកិច្ចការក្នុងប្រទេសមុននឹងហត់កិច្ចការអន្តរជាតិដែលមាន ASEAN G20 APEC ក្នុងខែវិច្ឆិកា ខាងមុខ»។
ការប្រកាសរបស់លោក ហ៊ុន សែន ធ្វើឡើង ១ ថ្ងៃបន្ទាប់ពីលោកបានដាក់បញ្ជាដល់អាជ្ញាធរខេត្តពាក់ព័ន្ធ និងក្រសួងកសិកម្ម រុក្ខាប្រមាញ់ និងនេសាទឱ្យធ្វើអន្តរាគមន៍បន្ទាន់ ដោយផ្គត់ផ្គង់ស្រូវពូជ និងពូជដំណាំដទៃដល់ប្រជាពលរដ្ឋដែលរងការខូចខាតដោយសារទឹកជំនន់។
នៅក្នុងពិធីប្រគល់សញ្ញាបត្រជូននិស្សិតសាកលវិទ្យាល័យជាតិគ្រប់គ្រងកាលពីថ្ងៃទី ១៧ ខែតុលា លោកបានប្រាប់ដល់អាជ្ញាធរពាក់ព័ន្ធឱ្យពន្លឿនការវាយតម្លៃផលប៉ះពាល់ ដោយសារទឹកជំនន់ និងផ្តល់ពូជស្រូវជូនកសិករឱ្យបានឆាប់បំផុត។ លោកក៏បានផ្តាំដល់មន្ត្រីកសិកម្មទាំងអស់ «កុំជិះសេះមើលផ្កា» ត្រូវគិតគូរពីការលំបាករបស់កសិករនៅក្នុងអំឡុងពេលនៃគ្រោះធម្មជាតិទឹកជំនន់ដែលបានប៉ះពាល់ដល់ផលដំណាំរបស់ពួកគាត់។
លោក លី សារី អភិបាលរងខេត្តបន្ទាយមានជ័យប្រាប់ភ្នំពេញប៉ុស្តិ៍នៅថ្ងៃទី ១៨ ខែតុលាថា ខេត្តបន្ទាយមានជ័យ បានទទួលអំណោយនៅមុនប្រជាជនរងគ្រោះ ដោយសារទឹកជំនន់ដោយបានស្តុកទុកនៅក្នុងឃ្លាំង ហើយបានចែកដល់ប្រជាពលរដ្ឋដែលរងផលប៉ះពាល់នៅតាមស្រុកទាំងអស់។
រីឯលោក សួស សុភ័ក្ត្រ ប្រធានមន្ទីរព័ត៌មានខេត្តបាត់ដំបង ប្រាប់ភ្នំពេញប៉ុស្តិ៍ដែរថា កន្លងមក អភិបាលខេត្តបាត់ដំបង លោក សុខ លូ បានចុះចែកជំនួយជាបន្តបន្ទាប់ទៅតាមស្រុកដែលរងគ្រោះ ដោយសារទឹកជំនន់ទាំងអំណោយមនុស្សធម៌របស់កាកបាតក្រហមកម្ពុជា ទាំងអំណោយរបស់ប្រមុខរាជរដ្ឋាភិបាល។
លោក ជាវ តាយ អភិបាលខេត្តពោធិ៍សាត់មិនអាចទាក់ទង ដើម្បីសុំបញ្ជាក់ពីបញ្ហាជនរងគ្រោះដោយទឹកជំនន់បានទេនៅថ្ងៃទី ១៨ តុលា ដោយទូរស័ព្ទលោកពុំមានអ្នកទទួល។
លោកបញ្ជាក់ថា៖ «នៅថ្ងៃទី ២៤ [ខែតុលា] ព្រឹកហ្នឹង សម្តេចចុះចែកស្រូវពូជជាង ១ ម៉ឺនគ្រួសារទៀតនៅខេត្តបាត់ដំបងយើង»។
លោក ឌិត ទីណា រដ្ឋមន្ត្រីកសិកម្ម រុក្ខាប្រមាញ់ និងនេសាទថ្មីបានថ្លែងក្នុងសន្និសីទកាសែត បន្ទាប់ពីបិទបញ្ចប់ពិធីប្រកាសចូលកាន់តំណែងរបស់លោកកាលពីថ្ងៃទី ១៧ ខែតុលា ថា ប្រហែលជាថ្ងៃទី ១៩ ខែតុលា លោកនឹងត្រូវចុះទៅតាមបណ្តាទីតាំងនៅតាមខេត្តដែលមានប្រជាពលរដ្ឋរងគ្រោះ ដោយសារគ្រោះទឹកជំនន់ ដើម្បីចែកជាជំនួយសម្រាប់ការស្តារឡើងវិញ សម្រាប់ប្រជាពលរដ្ឋ។
លោក អូន ព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានថ្លែងនៅក្នុងពិធីនោះដែរថា ផ្អែកតាមការវាយតម្លៃបឋមគិតត្រឹមថ្ងៃទី ១២ ខែតុលា ដំណាំស្រូវដែលទទួលរងផលប៉ះពាល់ ដោយសារទឹកជំនន់មានចំនួនប្រមាណជាង ២ សែនហិកតា ផ្ទៃដីដំណាំស្រូវដែលរងការខូចខាតមានចំនួនជាង ៨៥ ពាន់ហិកតា និងផ្ទៃដីដំណាំស្រូវដែលអាចស្តារឡើងវិញមានចំនួនជាង ៤៨ ពាន់ហិកតា។
កាលពីថ្ងៃទី ១៧ ខែតុលា លោក គន់ គីម អនុប្រធានទី ១ នៃគណៈកម្មាធិការជាតិគ្រប់គ្រងគ្រោះមហន្តរាយ បានចុះចែកពូជស្រូវចំនួនជាង ១០ ម៉ឺនគីឡូក្រាម ជាប្រព័ន្ធស្បៀងបម្រុងកម្ពុជាដល់ប្រជាពលរដ្ឋដែលទទួលរងផលប៉ះពាល់ដោយទឹកជំនន់ទឹកទន្លេមេគង្គចំនួន ១ ៤៤៦ គ្រួសារ មកពីឃុំចំនួន ៦ ក្នុងស្រុកស្ទឹងត្រង់ ខេត្តកំពង់ចាម ដើម្បីធ្វើការដាំដុះឡើងវិញ។
នៅថ្ងៃនោះដែរលោក គន់ គីម បានបន្តចែកស្រូវពូជចំនួន ៣៧៧ តោនដល់កសិករចំនួន ២ ៥៩៤ គ្រួសារ មកពីស្រុកស្រីស្នំ និងស្រុកក្រឡាញ់ ខេត្តសៀមរាប ដើម្បីដាំដុះឡើងវិញ ក្រោយពេលទឹកស្រក។ ក្រៅពីនោះក៏បានផ្តល់ជាជំនួយសង្គ្រោះបន្ទាន់ជូនដល់ពលរដ្ឋរងគ្រោះចំនួន១ ០០០គ្រួសារ មកពី១០ឃុំក្នុងស្រុកក្រឡាញ់ផងដែរ៕