.jpg)
ធនាគារជាតិនៃកម្ពុជា នៅក្នុងខណ្ឌសែនសុខ រាជធានីភ្នំពេញ។ ហេង ជីវ័ន
ភ្នំពេញៈ ធនាគារជាតិនៃកម្ពុជា បានអះអាងថា ឥណទានខុសច្បាប់ ផ្ដល់ផលប៉ះពាល់អាក្រក់ដល់ជីវភាពរស់នៅរបស់ប្រជាពលរដ្ឋ និងជាកត្តាបង្កឱ្យមានអសន្តិសុខសង្គម ដែលត្រូវរួមគ្នាចាត់វិធានការ ទប់ស្កាត់ បង្ក្រាប និងលុបបំបាត់ បន្ទាប់ពីរកឃើញថា ជនខិលខូចនៅតែបន្តសកម្មភាពល្មើសយ៉ាងបើកចំហ។
ការអះអាងបែបនេះ បានធ្វើឡើងនៅក្នុងសិក្ខាសាលាផ្សព្វផ្សាយស្ដីពី “វិធានការនិងការបង្ក្រាប សកម្មភាពផ្សព្វផ្សាយ និងផ្តល់ឥណទានដោយខុសច្បាប់” ដែលមានការសហការពីអគ្គស្នងការដ្ឋាននគរបាលជាតិ និងក្រសួងយុត្តិធម៌ ដែលមានអ្នកចូលរួម ១២០ រូប មកពីក្រសួងស្ថាប័នពាក់ព័ន្ធ នៅសណ្ឋាគាររ៉ាហ្វល ឡឺរ៉ូយ៉ាល់។
ក្នុងឱកាសនោះ លោក រ័ត្ន សុវណ្ណនរៈ ឧបការីទេសាភិបាល និងជាអគ្គនាយកត្រួតពិនិត្យធនាគារជាតិនៃកម្ពុជា បានអះអាងថា ធនាគារជាតិនៃកម្ពុជា នៅតែសង្កេតឃើញថា មានជនខិលខូចមួយចំនួននៅ បន្តធ្វើការផ្សព្វផ្សាយយ៉ាងបើកចំហ ស្តីពីការផ្តល់ឥណទានដល់ប្រជាពលរដ្ឋតាមរូរភាពផ្សេងៗ ជាច្រើន ដូចជា ប្រព័ន្ធអនឡាញ បណ្តាញសង្គម ការផ្សព្វផ្សាយតាមខិត្តប័ណ្ណ និងការបិទផ្សាយ តាមទីកន្លែងសាធារណៈនានា ជាដើម។
លោក បានបញ្ជាក់ថា៖ «ប្រជាពលរដ្ឋនៅតាមជនបទ ពុំទាន់យល់ច្បាស់អំពីកាតព្វកិច្ច និងការប្រើប្រាស់ សេវាហិរញ្ញវត្ថុ ព្រមទាំងពុំទាន់អាចទទួលព័ត៌មានហិរញ្ញវត្ថុបានពេញលេញ និង មានការលំបាកក្នុងការស្វែងរកការពន្យល់បញ្ជាក់នៅពេលមានបញ្ហា ឬចម្ងល់ផ្សេងៗ ទាក់ទងនឹងការប្រើប្រាស់សេវាហិរញ្ញវត្ថុ។ អាជ្ញាធរមូលដ្ឋាន មានការលំបាកក្នុងការកំណត់ឱ្យច្បាស់រវាងគ្រឹះស្ថានធនាគារ និងហិរញ្ញវត្ថុ ដែលស្របច្បាប់ និងមិនស្របច្បាប់ និងមានក្រុមជនខិលខូចមួយចំនួន បាននិងកំពុងធ្វើប្រតិបត្តិការធនាគារ នៅតាមមូលដ្ឋាន ស្រុក-ឃុំ ទាំងសេវាផ្តល់ប្រាក់កម្ចីនិងសេវាប្រមូលប្រាក់បញ្ញើ ដោយពុំមានច្បាប់ អនុញ្ញាតត្រឹមត្រូវ និងមានលក្ខណៈកេងប្រវ័ញ្ច»។
លោក រ័ត្ន សុវណ្ណនរៈ បានលើកឡើងថា ការផ្តល់សេវាឥណទានដោយគ្មានអាជ្ញាប័ណ្ណពីធនាគារជាតិនៃកម្ពុជា គឺខុសនឹងមាត្រា ៩ នៃច្បាប់ស្តីពីគ្រឹះស្ថានធនាគារ និងហិរញ្ញវត្ថុ។ លោកថា ការផ្តល់ឥណទានខុសច្បាប់នេះ ក៏ផ្ដល់ផលប៉ះពាល់ដល់ជីវភាពរស់នៅរបស់ប្រជាពលរដ្ឋ និងអាចបង្កឱ្យមានបំណុលច្រើនលើសលុប តាមរយៈការយកអត្រាការប្រាក់ខ្ពស់ហួសហេតុ។
លោក បន្ថែមថា បញ្ហាកង្វះក្រមសីលធម៌ និងយន្តការការពារអតិថិជន អាចជំរុញឱ្យមានអំពើហិង្សា ការបាត់បង់ទ្រព្យធានា និងអាចកើតមាននូវអសន្តិសុខសង្គម (ចោរកម្ម) ផងដែរ ហើយស្ថានភាពនេះ ក៏បន្តជះឥទ្ធិពលអវិជ្ជមានមកដល់គ្រឹះស្ថានធនាគារ និងហិរញ្ញវត្ថុ ដែលកំពុងផ្តល់សេវាធនាគារជាផ្លូវការ។
លោក បានបញ្ជាក់ថា៖ «ធនាគារជាតិនៃកម្ពុជា បាននិងកំពុងផ្តល់កិច្ចសហការជាមួយក្រសួងយុត្តិធម៌ ស្ថាប័នតុលាការខេត្ត-ក្រុង ក្រសួងការបរទេស និងសហប្រតិបត្តិការអន្តរជាតិ ក្រសួងសេដ្ឋកិច្ចនិងហិរញ្ញវត្ថុ ក្រសួងមហាផ្ទៃ អគ្គស្នងការដ្ឋាននគរបាលជាតិ និងអគ្គនាយកដ្ឋានពន្ធដារ ក្នុងការចូលរួមគាំទ្រដល់ការប្រមូលពន្ធដារជូនរដ្ឋាភិបាល ការប្រយុទ្ធប្រឆាំងនឹងការសម្អាតប្រាក់និងហិរញ្ញប្បទានភេរវកម្ម និងការជួញដូរខុសច្បាប់»។
កាលពីថ្ងៃទី ២៥ ខែសីហា ឆ្នាំ ២០២២ ធនាគារជាតិនៃកម្ពុជា បានចេញសេចក្ដីប្រកាសព័ត៌មានស្តីពី “ការផ្សព្វផ្សាយ និងផ្តល់ឥណទានដោយខុសច្បាប់" ដើម្បីផ្ដល់សារបន្ថែមដល់សាធារណជនអំពីគ្រឹះស្ថានស្របច្បាប់និងផ្លូវការ ដែលផ្តល់សេវាឥណទាន និង/ឬ សេវាពាក់ព័ន្ធផ្សេងទៀត ព្រមទាំងស្នើបង្កើនការប្រុងប្រយ័ត្នឱ្យបានខ្ពស់បំផុតចំពោះអ្នកផ្តល់សេវា ឥណទានខុសច្បាប់ និង/ឬក្រៅផ្លូវការ។
លោក រ័ត្ន សុវណ្ណនរៈ បានអះអាងទៀតថា សិក្ខាសាលាផ្សព្វផ្សាយស្ដីពី “វិធានការនិងការបង្ក្រាប សកម្មភាពផ្សព្វផ្សាយ និងផ្តល់ឥណទានដោយខុសច្បាប់នេះ នឹងបញ្ជ្រាបការយល់ដឹង បន្ថែមដល់ភាគីពាក់ព័ន្ធអំពីវិធានការផ្លូវច្បាប់ចំពោះការផ្សព្វផ្សាយនិងផ្តល់ឥណទានខុសច្បាប់។ បន្ថែមពីនេះ លោក ថា សិក្ខាសាលានេះ ក៏បង្កឱកាសឱ្យភាគីពាក់ព័ន្ធ រួមគ្នាដាក់ចេញនូវវិធានការអប់រំ ឬណែនាំដល់ប្រជាពលរដ្ឋឱ្យយល់ច្បាស់ពីសេវាធនាគារផ្លូវការ និងចាត់វិធានការតាមផ្លូវច្បាប់ចំពោះអ្នកផ្តល់សេវាធនាគារមិនមានច្បាប់អនុញ្ញាតផងដែរ។
លោក បានបញ្ជាក់ថា៖ «ជាទិសដៅបន្ទាប់ ធនាគារជាតិនៃកម្ពុជា អគ្គស្នងការដ្ឋាននគរបាលជាតិ និងក្រសួងយុត្តិធម៌ នឹងរៀបចំចេញសេចក្តីប្រកាសព័ត៌មាន រួមគ្នាអំពីលទ្ធផលនៃសិក្ខាសាលា ក៏ដូចជាជំហរនៃកិច្ចសហការគ្នាទៅវិញទៅមក ក្នុងការចាត់ វិធានការឱ្យទាន់ពេលវេលាសំដៅបង្ការ ទប់ស្កាត់ បង្ក្រាប និងលុបបំបាត់សកម្មភាពផ្សព្វផ្សាយ និងផ្តល់ឥណទានខុសច្បាប់»។
តាមយុទ្ធសាស្ត្រជាតិ ស្តីពីបរិយាប័ន្នហិរញ្ញវត្ថុឆ្នាំ ២០១៩-២០២៥ ធនាគារជាតិនៃកម្ពុជា បានប្រកាសថា កិច្ចគាំពារអតិថិជន និងការលើកកម្ពស់ចំណេះដឹងផ្នែកហិរញ្ញវត្ថុជូនដល់ប្រជាពលរដ្ឋ ក្នុងការទទួលបានសេវាធនាគារតាមតម្រូវការ ទាន់ពេលវេលា មានតម្លៃសមរម្យ និងមានកិច្ចគាំពារ តាមផ្លូវច្បាប់ គឺជារបៀបវារៈស្នូលរបស់ រាជរដ្ឋាភិបាល៕
