.jpg)
លោក ឌិត ទីណា, លោក គន់ គីម និងមន្ត្រីផ្សេងទៀត ក្នុងពិធីចែកស្រូវពូជដល់ពលរដ្ឋនៅខេត្តក្រចេះ ម្សិលមិញ។ រូបថត NCDM
ក្រចេះ: លោក ឌិត ទីណា រដ្ឋមន្ដ្រីថ្មី នៃក្រសួងកសិកម្ម រុក្ខាប្រមាញ់ និងនេសាទ នៅព្រឹកថ្ងៃទី ១៩ ខែតុលា បានចាប់ផ្ដើមចុះបេសកកម្មទៅតាមបណ្ដាខេត្តនានា ដើម្បីចែកពូជស្រូវដល់កសិករដែលរងគ្រោះដោយទឹកជំនន់ ដោយលោកបានគូសបញ្ជាក់ថា បញ្ហាទីផ្សារតម្លៃស្រូវគឺជារឿងដែលត្រូវដោះស្រាយ ដោយមានការជជែកគ្នា និងមិនអាចធ្វើការមើលតែ ១ ជ្រុងនោះទេ។
នៅលើទំព័រហ្វេសប៊ុកផ្លូវការ រដ្ឋមន្ដ្រីថ្មីនៃក្រសួងកសិកម្ម លោក ឌិត ទីណា បានបង្ហោះរូបភាពនៅវេលាម៉ោង ៦ កន្លះព្រឹក ដែលបង្ហាញពីរូបលោក និងលោក គន់ គីម ទេសរដ្ឋមន្រ្តីទទួលបន្ទុកបេសកកម្មពិសេស និងជាអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ ឆ្ពោះទៅជួបប្រជាកសិកររងគ្រោះដោយជំនន់ទឹកភ្លៀង នៅខេត្តក្រចេះ។
ការចុះបេសកកម្មរបស់លោករដ្ឋមន្ដ្រី វ័យក្មេងរូបនេះ ធ្វើឡើងតែ ២ ថ្ងៃប៉ុណ្ណោះ ក្រោយពេលដែលលោកបានឡើងកាន់តំណែងជារដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ ជាផ្លូវការ កាលពីថ្ងៃចន្ទ ទី១៧ ខែតុលា ឆ្នាំ ២០២២។
នៅក្នុងសន្និសីទកាសែតកាលពីថ្ងៃទី ១៧ ខែតុលានោះលោក ឌិត ទីណា បានបញ្ជាក់ថា ការងារបន្ទាន់នៅចំពោះមុខ ដែលលោកត្រូវដោះស្រាយក្នុងជំហានដំបូង បន្ទាប់ពីប្រកាសចូលកាន់តំណែងជារដ្ឋមន្ត្រីក្រសួងកសិកម្ម គឺដោះស្រាយបញ្ហារបស់ប្រជាកសិករ ដែលកំពុងរងផលប៉ះពាល់ពីគ្រោះទឹកជំនន់ ដោយសហការជាមួយស្ថាប័នពាក់ព័ន្ធ ពិនិត្យ និងដោះស្រាយផលប៉ះពាល់ដែលបង្កដោយទឹកជំនន់ ដែលបានបំផ្លាញដំណាំប្រជាពលរដ្ឋជាច្រើននៅទូទាំងប្រទេស ផ្តល់ពូជស្រូវ និងពូជដំណាំជាបន្ទាន់ដល់កសិករ ដើម្បីស្តារការដាំដុះឡើងវិញ។
បើតាមលោក ឌិត ទីណា ការផ្ដល់ពូជស្រូវ និងពូជដំណាំជាបន្ទាន់ដល់ប្រជាកសិករ គឺជារឿងសំខាន់ និងចាំបាច់ខ្លាំងណាស់ ដើម្បីធានាថា ប្រជាកសិករខ្មែរ បានទទួលពូជស្រូវសម្រាប់ដាំដុះឡើងវិញទាន់ពេលវេលា នៅពេលដែលទឹកចាប់ស្រកទៅវិញ។
ខេត្តដំបូងនៃបេសកកម្មរបស់លោក ឌិត ទីណា គឺខេត្តក្រចេះ និងត្បូងឃ្មុំ ហើយអាចបន្តទៅកាន់បណ្ដាខេត្តផ្សេងទៀតផងដែរ ដោយនៅខេត្តខ្លះ ការចុះជួបប្រជាកសិកររងគ្រោះដោយសារទឹកជំនន់នឹងធ្វើឡើងក្រោមអធិបតីភាពលោកនាយករដ្ឋមន្ដ្រី ហ៊ុន សែន ផងដែរដូចជានៅខេត្តបន្ទាយមានជ័យ បាត់ដំបង ពោធិ៍សាត់ និងខេត្តកំពង់ឆ្នាំង។
យោងរបាយការណ៍គណៈកម្មាធិការជាតិគ្រប់គ្រងគ្រោះមហន្តរាយ (NCDM) បានឱ្យដឹងថា នាព្រឹកថ្ងៃទី ១៩ ខែតុលា លោក គន់ គីម ទេសរដ្ឋមន្ត្រី ទទួលបន្ទុកបេសកកម្មពិសេស ជាអនុប្រធានទី១ នៃ NCDM និងលោក ឌិត ទីណា បានចុះចែកស្រូវពូជ របស់រាជរដ្ឋាភិបាល ជូនកសិករដែលរងការខូចខាតដោយគ្រោះទឹកជំនន់ ដែលត្រូវការស្ដារឡើងវិញចំនួន ២ ៧០២ គ្រួសារ ស្មើនឹងប្រមាណជាង ២០ ម៉ឺនគីឡូក្រាម មកពី ៥ ក្រុង-ស្រុក រួមមាន ស្រុកឆ្លូង ស្រុកព្រែកប្រសព្វ ស្រុកសំបូរ ស្រុកចិត្របុរី និងក្រុងក្រចេះ ដែលពិធីចែកពូជស្រូវនេះធ្វើនៅបរិវេណមន្ទីរវប្បធម៌ និងវិចិត្រសិល្បៈខេត្ត។
លោក វ៉ា ថន អភិបាលខេត្តក្រចេះ ប្រាប់ ភ្នំពេញ ប៉ុស្តិ៍ ថា ប្រជាជនដែលរងផលប៉ះពាល់ដោយសារទឹកជំនន់នៅក្នុងខេត្តក្រចេះមានចំនួន ៣ ៦៧៦ គ្រួសារ ហើយខេត្តបានចែកស្រូវពូជគ្រប់ចំនួនអស់ហើយសម្រាប់អ្នកដែលត្រូវស្តារឡើងវិញ ប៉ុន្តែមានផ្ទៃដីចំនួន ៣៤ ហិកតាដែលមិនបានស្តារឡើងវិញ ដោយសារផ្ទៃដីខ្ពស់ និងមិនមានប្រភពទឹក ហើយប្រជាពលរដ្ឋក៏មិនស្នើសុំស្រូវពូជដែរ។
លោកបានបន្តថា កាលពីថ្ងៃទី ១៧ ខែតុលា ខេត្តបានទទួលស្រូវពូជចំនួន ៧៦ តោន និងលោកផ្ទាល់បានចុះចែកដល់ប្រជាជនរួចហើយ។ លោកថា លោក ឌិត ទីណា បានចុះទៅដល់ទីតាំងថ្នាលស្រូវស្រែដែលកសិករបង្កបង្កើនផល និងបានបញ្ចប់ការងារនៅម៉ោង ១១ និង ៣០ នាទីព្រឹកថ្ងៃទី ១៩ តុលា ដោយចុះមើល ២ គោលដៅនៅសង្កាត់រកាកណ្ដាល ស្ថិតនៅទីរួមខេត្ត ១ គោលដៅ និងនៅឃុំបុសលាវ ក្នុងស្រុកចិត្របុរី ១ គោលដៅ។
លោក វ៉ា ថន បានថ្លែងថា៖ «អ៊ីចឹងបានមើលអស់ហើយពិនិត្យហើយលោកបានសន្យាថា នៅពេលខាងមុខឆាប់ៗហ្នឹងប្រហែល ១ ខែទៅ ១ ខែតិចតួចទៀតហ្នឹង បន្ទាប់ពីលោកដើរចែកស្រូវពូជជុំអស់ហើយ លោកនឹងមកពិនិត្យអាស្រូវដែលវាចាប់ផ្តើមដុះនេះឡើងវិញតាមគោលដៅមួយចំនួន គ្រប់ខេត្តទាំងអស់ នេះបើតាមប្រសាសន៍លោក។ លោកចប់ពីហ្នឹងទៅ លោកអញ្ជើញទៅត្បូងឃ្មុំ ទៅចែកស្រូវពូជនៅត្បូងឃ្មុំបន្តទៀតល្ងាចហ្នឹង»។
លោក ឌិត ទីណា បានផ្តល់កិច្ចសម្ភាសន៍ដល់សារព័ត៌មានក្នុងស្រុកនៅក្នុងឱកាសដែលលោកបានចុះចែកស្រូវពូជនេះថា បញ្ហាទីផ្សារតម្លៃស្រូវគឺជារឿងដែលត្រូវដោះស្រាយ ដោយមានការជជែកគ្នា និងមិនអាចធ្វើការដោយមើលតែ ១ ជ្រុងបានទេ។
លោកបានបញ្ជាក់ថា៖ «កុំភ្លេចថា ប្រជាពលរដ្ឋយើងទាំងអស់សុទ្ធតែអ្នកហូបបាយ។ អ៊ីចឹង តម្លៃស្រូវឡើងថ្លៃខ្ពស់ មានន័យថា បាយក៏វាថ្លៃដែរ។ អ៊ីចឹង យើងនឹងពិនិត្យមើលឡើងវិញទាំងអស់គ្នា។ ចំណុចសំខាន់ មិនសំខាន់ថា តើតម្លៃស្រូវថ្លៃ ឬក៏ថោកនោះទេ សំខាន់ថាតើអ្នកផលិត កសិកររបស់យើងនឹងបានចំណេញប៉ុនណា គឺយើង មើលជ្រុងនេះវិញសំខាន់ជាង»។
លោកបានបន្ថែមទៀតថា៖ «បើយើងកាត់បន្ថយចំណាយ ហើយយើងព្យាយាមធ្វើម៉េចឱ្យចំណូលរបស់គាត់ បានលើសហ្នឹង ពង្រីកកម្រិតនៃការចំណេញរបស់គាត់ គឺគ្រប់គ្រាន់ហើយមិនត្រូវនិយាយថា ត្រូវតែឡើងថ្លៃ ឬចុះថ្លៃទេ ពីព្រោះស្រូវឡើង-ថ្លៃ អង្ករឡើងថ្លៃ អ្នកហូបនឹងពិបាក។ អ៊ីចឹងទាំងអស់ហ្នឹង ត្រូវមើលជារួមជាមួយគ្នា ហើយសំណួរត្រឡប់មកវិញ ថាតើយើងរករូបមន្តណា ដើម្បីចំណេញទាំងអស់គ្នា មិនមែនតែសម្រាប់ផ្នែកណាមួយនៃវិស័យកសិកម្មនោះទេ»៕
