.jpg)
លោកនាយករដ្ឋមន្ត្រី ហ៊ុន សែន អញ្ជើញទៅកែតម្រូវព័ត៌មានថ្ងៃខែឆ្នាំកំណើតក្នុងបញ្ជីឈ្មោះបោះឆ្នោត នាថ្ងៃនេះ។ រូបថត ក្រសួងព័ត៌មាន
ភ្នំពេញៈ លោកនាយករដ្ឋមន្ត្រី ហ៊ុន សែន កែតម្រូវព័ត៌មានថ្ងៃខែឆ្នាំកំណើតក្នុងបញ្ជីឈ្មោះបោះឆ្នោត ដោយប្តូរពីថ្ងៃទី ៤ ខែមេសា ឆ្នាំ ១៩៥១ ទៅថ្ងៃទី ៥ ខែសីហា ឆ្នាំ ១៩៥២ នៅសង្កាត់តាខ្មៅ ក្រុងតាខ្មៅ ខេត្តកណ្ដាល។
លោកបានថ្លែងក្នុងឱកាសប្តូរព័ត៌មានថ្ងៃខែឆ្នាំកំណើតក្នុងបញ្ជីឈ្មោះបោះឆ្នោតនេះនាថ្ងៃទី ២០ ខែតុលាថា ការកែតម្រូវនេះ គឺមិនមែនជាឈុតឆាកដើម្បីបង្ហាញជូនប្រជាពលរដ្ឋ ឬជនបរទេសអំពីរបៀបដំណើរការប្រជាធិបតេយ្យរបស់កម្ពុជានោះដែរ។ នេះមិនមែនជាទីកន្លែងមួយដែលសម្រាប់តែនាយករដ្ឋមន្ត្រីចុះឈ្មោះនោះទេ ប៉ុន្តែសម្រាប់ប្រជាពលរដ្ឋទូទៅដែលចុះឈ្មោះបោះឆ្នោត ដែលស្ថានភាពបែបនេះគឺមានគ្រប់ទីកន្លែង។
លោកថ្លែងថា៖ «ថ្ងៃនេះខ្ញុំបានមកចុះឈ្មោះកែតម្រូវនូវអាយុកំណើតពិតប្រាកដរបស់ខ្ញុំ។ ខ្ញុំអរគុណចំពោះតុលាការ ដែលបានចេញសាលដីកាសម្រាប់ការកែសម្រួលនោះ ដោយខ្ញុំបានកែអស់ហើយនូវអត្រានុកូលដ្ឋាន ឬក៏ផ្នែកពាក់ព័ន្ធដទៃទៀត លើកលែងតែករណីនៃការចុះឈ្មោះបោះឆ្នោតតែប៉ុណ្ណោះ ដែលខ្ញុំត្រូវតែបំពេញកាតព្វកិច្ចនេះឱ្យចប់ចុងចប់ដើម បើទោះបីជាយើងមានឋានៈណាក៏ដោយ ក៏ប៉ុន្តែច្បាប់ គឺជាច្បាប់ ដែលត្រូវតែមានការគោរពឱ្យបានហ្មត់ចត់»។
លោកបានអំពាវនាវដល់ប្រជាពលរដ្ឋឱ្យចុះឈ្មោះឆ្នោតដើម្បីប្រើប្រាស់សិទ្ធិក្នុងការអនុវត្តលទ្ធិប្រជាធិបតេយ្យគឺការជ្រើសរើសអ្នកដឹកនាំររបស់ខ្លួន។ ការចុះឈ្មោះគឺធ្វើឡើងដោយភាពហ្មត់ចត់បំផុត ហើយមិនមែនគ្រាន់តែធ្វើកាចុះឈ្មោះបោះឆ្នោតសម្រាប់អ្នកដែលដល់អាយុបោះឆ្នោតទេ។ ប៉ុន្តែអ្នកដទៃដែលមិនទាន់បានចុះឈ្មោះក៏ត្រូវតែចុះឈ្មោះ ឬក៏ចង់ផ្លាស់ប្តូរទីលំនៅ ឬចង់កែតម្រូវក៏អាចប្រើប្រាស់ពេលវេលានេះ ដែលគណៈកម្មាធិការជាតិរៀបចំការបោះឆ្នោតរៀបចំក្នុងរយៈពេល៥០ថ្ងៃ ដែលជាពេលល្មមគ្រប់គ្រាន់សម្រាប់ឱ្យពលរដ្ឋធ្វើការចុះឈ្មោះ និងអាចធ្វើការផ្ទេរពីកន្លែងមួយទៅកាន់កន្លែងមួយ។
លោកថ្លែងថា៖ «ខ្ញុំសូមអំពាវចំពោះប្រជាពលរដ្ឋរបស់យើងដើម្បីចូលរួមជាមួយនឹងការចុះឈ្មោះបោះឆ្នោតផង ជាមួយនឹងការដែលត្រូវផ្ទេរឈ្មោះទៅកាន់ទីតាំងដែលខ្លួនត្រូវបោះឆ្នោត»។
គណៈកម្មាធិការជាតិរៀបចំការបោះឆ្នោត បានប្រកាសជាសាធារណៈ កាលពីថ្ងៃទី១៩ ខែតុលា ស្ដីអំពីការបើកដំណើរការនៃការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២២ មានរយៈពេល៥០ថ្ងៃ ចាប់ពីថ្ងៃទី២០ ខែតុលា ដល់ថ្ងៃទី៨ ខែធ្នូ ឆ្នាំ២០២២។ ដំណើរការនៃការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២២ ធ្វើនៅតាមសាលាឃុំ សង្កាត់ និងទីតាំងមួយចំនួនក្នុងឃុំ សង្កាត់។
លោកនាយករដ្ឋមន្ត្រី ថ្លែងបញ្ជាក់ថា ប្រទេសកម្ពុជាអនុវត្តដោយហ្មត់ចត់បំផុតនូវដំណើរការប្រជាធិបតេយ្យដោយទៀងទាត់បំផុត ដែលពាក្យទៀងទាត់នេះលោកសំដៅដល់ការបញ្ជាក់អំពីការចងរបស់រដ្ឋធម្មនុញ្ញដែលមិនអនុញ្ញាតឱ្យនាយករដ្ឋមន្ត្រីស្នើទៅព្រះមហាក្សត្ររំលាយសភានោះទេ ដូចករណីដែលទើបតែបានកើតក្នុងរយៈ២សប្តាហ៍មុននៅប្រទេសម៉ាឡេស៊ី ដែលនាយករដ្ឋមន្ត្រីស្នើទៅព្រះមហាក្សត្រហើយអនុញ្ញាតឱ្យរំលាយសភា និងបោះឆ្នោតមុនអាណត្តិ។
លោក ហ៊ុន សែន ថ្លែងថា៖ «មូលហេតុគឺសូមបញ្ជាក់នៅក្នុងរដ្ឋធម្មនុញ្ញបានបញ្ជាក់ជំពូកទាក់ទិនជាមួយនឹងសភា។ សភាមាននីតិកាល៥ឆ្នាំ។ សភាមិនអាចរំលាយមុនអាណត្តិបានទេ លើកលែងតែសភារំលាយរដ្ឋាភិបាល២ដងក្នុងរយៈពេល១២ខែ។ ចំណុចនោះហើយដែលបញ្ជាក់ថា នាយករដ្ឋមន្ត្រីកម្ពុជាគ្មានសិទ្ធិដូចនាយករដ្ឋមន្ត្រីនៃប្រទេសដទៃដែលរំលាយសភាមុនអាណត្តិនៅពេលដែលឃើញថាគណបក្សរបស់ខ្លួនមានប្រៀបគឺបែរជារំលាយសភា ប៉ុន្តែកម្ពុជាគឺអត់ដូច្នោះ»៕
