ត្បូងឃ្មុំៈ លោកនាយករដ្ឋមន្ត្រី ហ៊ុន សែន នឹងធ្វើដំណើរទៅកាន់បណ្ដាខេត្តនានាជាប់បឹងទន្លេសាបដែលរងផលប៉ះពាល់ដោយសារទឹកជំនន់ចាប់ពីថ្ងៃ ២១ ខែតុលា តទៅ ដើម្បីជួបប្រជាជនដែលរងគ្រោះដោយទឹកជំនន់ និងដោះស្រាយបញ្ហាជូនពួកគាត់។
លោកថ្លែងថា៖ «ប្រជាពលរដ្ឋកំពុងតែវេទនា កំពុងតែជួបការលំបាក។ តើឱ្យនាយករដ្ឋមន្ត្រីដេកផ្ទះនៅស្ងៀម មើលប្រជាពលរដ្ឋ ហើយដោយខ្លាចគេចោទថា ជាការឃោសនាបោះឆ្នោតយ៉ាងម៉េចទៅកើត? អ៊ីចឹងនាយករដ្ឋមន្ត្រីមិនចាំបាច់ធ្វើអីទេ!»។
លោក ហ៊ុន សែន ថ្លែងដូច្នេះ គឺជាការឆ្លើយតបទៅនឹងសំណួរអ្នកសារព័ត៌មានក្នុងឱកាសលោកធ្វើការកែតម្រូវព័ត៌មានថ្ងៃខែឆ្នាំកំណើតក្នុងបញ្ជីឈ្មោះបោះឆ្នោត នៅសាលាសង្កាត់តាខ្មៅ ក្រុងតាខ្មៅ ខេត្តកណ្ដាល នៅថ្ងៃទី ២០ ខែតុលា។
លោកបន្តថា គម្រោងធ្វើដំណើរទៅកាន់បណ្ដាខេត្តនានាជាប់បឹងទន្លេសាបនេះមិនមែនជាការឃោសនាបោះឆ្នោតនោះទេ ខណៈទេសរដ្ឋមន្ត្រី និងរដ្ឋមន្ត្រីកំពុងតែធ្វើដំណើរនៅជុំវិញប្រទេសដើម្បីចែកស្រូវពូជ និងស្បៀងអាហារជូនដល់ប្រជាពលរដ្ឋដែលកំពុងតែជួបការលំបាក។
លោកថ្លែងថា៖ «ខ្ញុំមិនបានសួរថា ប្រជាពលរដ្ឋនៅបក្ស ណា ខ្ញុំយកទៅចែកនេះ ចែកស្រូវពូជផង ចែកស្បៀងផង ឱ្យប្រជាពលរដ្ឋ នេះគឺខ្ញុំអត់បានសួរថា អ្នកឯងបោះឆ្នោតឱ្យបក្ស ណាទេ។ អ៊ីចឹង អ្នកឯងគួរតែដឹងគុណខ្ញុំទៅព្រោះក្នុងចំណោមអ្នកដែលខ្ញុំចែកនេះ ច្បាស់ជាមានមនុស្សអ្នកដែលបោះឆ្នោតឱ្យបក្សដទៃហើយ»។
លោក គន់ គីម អនុប្រធានទី ១ នៃគណៈកម្មាធិការជាតិគ្រប់គ្រងគ្រោះមហន្តរាយ (NCDM) នៅថ្ងៃទី ២០ ខែតុលា បានចុះពិនិត្យទីតាំងត្រៀមរៀបចំពិធីចែកពូជស្រូវជូនកសិករក្នុងខេត្តពោធិ៍សាត់ និងខេត្តបាត់ដំបង ក្រោមអធិបតីភាពលោកនាយករដ្ឋមន្ត្រី ហ៊ុន សែន។
ជាមួយគ្នានេះ រដ្ឋមន្ត្រីកសិកម្មដែលទើបចូលកាន់តំណែង លោក ឌិត ទីណា បានបន្តចុះចែកស្រូវពូជជាង ៦ ម៉ឺនគីឡូក្រាមដល់កសិករជាង ៨០០ គ្រួសារនៅក្នុងខេត្តត្បូងឃ្មុំ និងខេត្តកំពង់ចាម ដែលទទួលផលប៉ះពាល់ដោយសារទឹកជំនន់ដើម្បីធ្វើការដាំដុះឡើងវិញ។
របាយការណ៍ NCDM បានឱ្យដឹងថា នៅព្រឹកថ្ងៃទី ២០ ខែតុលា លោក ឡាំ ហេងហួត រដ្ឋមន្ត្រីប្រតិភូអមនាយករដ្ឋមន្ត្រី និងជាអនុប្រធាន NCDM បានចូលរួមជាមួយលោក ឌិត ទីណា ដោយនាំយកគ្រាប់ពូជស្រូវរបស់រាជរដ្ឋាភិបាលចែកជូនកសិករ ដែលទទួលរងការខូចខាតដោយគ្រោះទឹកជំនន់ ហើយមានលទ្ធភាពស្ដារឡើងវិញ ដើម្បីធ្វើការដាំដុះបន្ទាប់ពីទឹកបានស្រកទៅវិញ ដែលពិធីចែកនេះធ្វើឡើងនៅក្នុងបរិវេណវត្ត អម្ពវនារាម (រំចេក) ក្នុងស្រុកកំពង់សៀម ខេត្តកំពង់ចាម។
របាយការណ៍បញ្ជាក់ថា៖ «ប្រជាកសិករដែលត្រូវទទួលផល មានចំនួន ៤៩៧ គ្រួសារ មកពីឃុំចំនួន ៤ មានឃុំកៀនជ្រៃ ឃុំហាន់ជ័យ ឃុំគគរ និងឃុំរំចេក ក្នុងស្រុកកំពង់សៀម ខេត្តកំពង់ចាម ស្មើនឹងពូជស្រូវសរុបចំនួន ៣៣ ៦៥០ គីឡូក្រាម»។
ប្រភពដដែលបន្តថា កាលពីរសៀលថ្ងៃទី ១៩ ខែតុលា លោក ឡាំ ហេងហួត និងលោក ឌិត ទីណា បាននាំយកគ្រាប់ពូជស្រូវចំនួនជិត ៣ ម៉ឺនគីឡូក្រាម ចែកជូនប្រជាពលរដ្ឋចំនួន ៣៥១ គ្រួសារ មកពីឃុំចំនួន ៣ រួមមានឃុំទន្លេបិទ ឃុំជីរោទ៍ទី១ និងឃុំជីរោទ៍ទី ២ ក្នុងស្រុកត្បូងឃ្មុំ ខេត្តត្បូងឃ្មុំ ដើម្បីដាំដុះឡើងវិញ បន្ទាប់ពីទទួលរងផលប៉ះពាល់ដោយសារទឹកជំនន់ ដែលពិធីចែកនេះធ្វើនៅក្នុងបរិវេណវត្តសុវណ្ណមាលីទន្លេបិទ។
រដ្ឋមន្ដ្រីកសិកម្មថ្មីលោក ឌិត ទីណា បានចាប់ផ្ដើមចុះបេសកកម្មទៅតាមបណ្ដាខេត្តនានាក្នុងប្រទេសកម្ពុជាកាលពីថ្ងៃទី ១៩ ខែតុលា ដើម្បីចែកពូជស្រូវដល់កសិកររងគ្រោះ ដោយទឹកជំនន់ដោយបានជ្រើសរើសយកខេត្តក្រចេះ ជាខេត្តចុះបេសកកម្មដំបូង ហើយបានចែកពូជស្រូវជាង ២០ ម៉ឺនគីឡូក្រាមដល់ប្រជាពលរដ្ឋ ២៧០២ គ្រួសារមកពី ៥ ក្រុង ស្រុកនៃខេត្តក្រចេះ៕