.jpg)
ក្រុមយុវជនទំនើងដែលត្រូវបានសមត្ថកិច្ចចាប់បញ្ជូនទៅតុលាការ។ រូបថត នគរបាល
ភ្នំពេញៈ យុវជនសង្ស័យដែលជាក្មេងទំនើងចំនួន ៨ នាក់ក្នុងនោះជាសិស្សសាលា ៥ នាក់ ត្រូវបាននគរបាលការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ ចាប់បញ្ជូនទៅសាលាដំបូងរាជធានីភ្នំពេញកាលពីថ្ងៃទី ២០ ខែតុលា ពាក់ព័ន្ធករណីព្រួតគ្នាវ៉ៃ កាប់យុវជនម្នាក់បណ្តាលឱ្យរងរបួសធ្ងន់។
ក្មេងទំនើងទាំងនេះត្រូវបានចាប់ឃាត់ខ្លួនជាបន្តបន្ទាប់ ១ ថ្ងៃបន្ទាប់ពីពួកគេបានប្រើប្រាស់កាំបិតនិងដាវកែច្នៃកាប់ទៅលើក្មេង ១ ក្រុមទៀត បណ្តាលឱ្យរងរបួសធ្ងន់ ១ នាក់ ខណៈក្មេងទំនើងទាំង ២ ក្រុមជិះម៉ូតូមើលមុខឌឺដាក់គ្នា នៅក្នុងភូមិសាស្ត្រខណ្ឌដូនពេញ រាជធានីភ្នំពេញ។
យោងតាមរបាយការណ៍របស់ លោកវរសេនីយ៍ឯក ប៊ុន សត្យា នាយការិយាល័យនគរបាលព្រហ្មទណ្ឌកម្រិតស្រាល ប្រាប់ឱ្យដឹងថា ការបង្ក្រាបចាប់ខ្លួនជនសង្ស័យក្មេងទំនើង ៨ នាក់នេះ គឺកម្លាំងនគរបាលអនុវត្តតាមបទបញ្ជាផ្ទាល់ពីសំណាក់លោក ឧត្តមសេនីយ៍ឯក ស ថេត អគ្គស្នងការរងនគរបាលជាតិនិងជាស្នងការនគរបាលរាជធានីភ្នំពេញ ក្រោយពីអាណាព្យាបាលជនរងគ្រោះ ១ នាក់ បានដាក់ពាក្យប្តឹងក្រុមជនសង្ស័យនៅការិយាល័យនគរបាលព្រហ្មទណ្ឌកម្រិតស្រាល រាជធានីភ្នំពេញ។
លោកប៊ុន សត្យា ប្រាប់ឱ្យដឹងទៀតថា នៅល្ងាចថ្ងៃទី ១៧ ខែតុលា ឆ្នាំ ២០២២ គឺមានក្មេងទំនើង ១ ក្រុមជិះម៉ូតូ ៥ គ្រឿងមានគ្នា ១៣ នាក់ បាននាំគ្នាជិះម៉ូតូចេញពីម្តុំស្ថានីយទូរទស្សន៍ប៉ុស្តិ៍លេខ ៩ ក្នុងសង្កាត់បឹងកក់ ២ ខណ្ឌទួលគោក ក្នុងគោលបំណង ទៅលេងនៅចំណុចអគារអ៊ីដេនហ្គាដេន ក្នុងសង្កាត់ស្រះចក ខណ្ឌដូនពេញ។
នៅពេលជនសង្ស័យជិះម៉ូតូមកដល់ចំណុចអគារអ៊ីដេនហ្គាដេនក៏ជួបទល់មុខគ្នានឹងក្រុមក្មេងទំនើងជនរងគ្រោះដែលជិះម៉ូតូ ៤ គ្រឿង មានគ្នា ៨ នាក់។
នៅពេលនោះពួកគេទាំង ២ ក្រុមបានមើលមុខគ្នារបៀបឌឺដងដាក់គ្នា រំពេចក៏ស្រាប់តែ ក្រុមក្មេងបង្កបានជិះម៉ូតូដេញតាមក្រុមក្មេងរងគ្រោះ។
នៅពេលនោះក៏មានម៉ូតូ ១ គ្រឿងរបស់ក្មេងរងគ្រោះបានដួល ហើយក្រុមក្មេងបង្កក៏ទាញកាំបិតបុ័ងតោនិងដាវកែច្នៃ ដំបងរលាស់ ព្រួតគ្នាវាយនឹងកាប់ទៅលើក្មេងរងគ្រោះ ១ នាក់មានឈ្មោះ អឿន សៀងហែ ភេទប្រុសអាយុ ១៩ ឆ្នាំ ត្រូវចំដៃម្ខាង នឹងចំក្បាលបណ្តាលឱ្យរងរបួសធ្ងន់ ហើយក្រុមក្មេងទំនើងដែលបង្កក៏ដេញកាប់ទៅលើក្រុមក្មេងរងគ្រោះផ្សេងទៀតបណ្តាលឱ្យរងរបួសជាបន្តបន្ទាប់ទៀត។
ក្រោយពីបង្កការវាយដំរួច ក្រុមក្មេងបង្កបាននាំគ្នាជិះម៉ូតូគេចខ្លួនបាត់អស់។
លោកវរសេនីយ៍ឯក ប៊ុន សត្យា បានឱ្យដឹងទៀតថា ក្រោយពីកើតហេតុនោះហើយ ជនរងគ្រោះត្រូវបានមិត្តភក្តិដឹកយកទៅសង្គ្រោះព្យាបាលនៅមន្ទីរពេទ្យមិត្តភាពខ្មែរ-ចិន។
លុះដល់ថ្ងៃទី១៨ ខែតុលា ឆ្នាំ ២០២២ ក្រុមជនសង្ស័យដែលជាអ្នកបង្កក៏ត្រូវបានកម្លាំងនគរបាលការិយាល័យព្រហ្មទណ្ឌកម្រិតស្រាល ស្រាវជ្រាវនឹងបង្ក្រាបបានជាបន្តបន្ទាប់នៅក្នុងភូមិសាស្ត្ររាជធានីភ្នំពេញ សរុបចំនួន ៨ នាក់ ក្នុងនោះដកហូតបានវត្ថុតាង ដាវកែច្នៃ ១ ដើម កាំបិតបុ័ងតោ ២ ដើម និងដំបងរលាស់ ១ ដើម។ក្នុងចំណោមជនសង្ស័យក្មេងបង្ក ៨ នាក់ គឺមាន ៥ នាក់ជាសិស្សរៀននៅវិទ្យាល័យសន្ធរម៉ុក វិទ្យាល័យ ជាស៊ីម សាមគ្គី វិទ្យាល័យជំម្ពូរវ័ន្ត និងវិទ្យាល័យអូរបែកក្អម។
ចំណែកបក្ខពួកដែលគេចខ្លួនផ្សេងទៀត កម្លាំងនគរបាលកំពុងបន្តស្វែងរកចាប់ខ្លួនយកមកអនុវត្តតាមច្បាប់៕
