សៀមរាបៈ សិស្សានុសិស្សចំនួន ១៨២ នាក់ ក្នុងនោះមានសិស្សថ្នាក់ទី ៥ ចំនួន ២ ថ្នាក់ និងសិស្សថ្នាក់ទី ៦ ចំនួន ២ ថ្នាក់ នៃសាលាបឋមសិក្សាក្របីរៀល ស្ថិតក្នុងសង្កាត់ក្របីរៀល ក្រុងសៀមរាបបានទៅទស្សនកិច្ចសិក្សាអំពីកិច្ចការងារអភិរក្សប្រាសាទអង្គរវត្តរបស់អាជ្ញាធរជាតិអប្សរាកាលពីព្រឹកថ្ងៃទី ២០ តុលា ខណៈបច្ចុប្បន្ន ភ្ញៀវទេសចរចូលទៅទស្សនារមណីយដ្ឋានអង្គរចាប់ផ្តើមមានកំណើនឡើងវិញ។
បើតាមហ្វេសប៊ុករបស់អាជ្ញាធរជាតិអប្សរានេះជាលើកទី ១ ហើយ ដែលសិស្សានុសិស្សមកពីសាលាបឋមសិក្សាក្របីរៀលបានចូលមកទស្សនកិច្ចសិក្សានៅតំបន់រមណីយដ្ឋានអង្គរ បន្ទាប់ពីអាជ្ញាធរជាតិអប្សរាសហការណ៍ជាមួយអាជ្ញាធរក្នុងតំបន់បានរៀបចំវគ្គបណ្តុះបណ្តាលស្តីពីអប់រំបេតិកភណ្ឌ កាលពីខែឧសភា ឆ្នាំ ២០២២ ។
អាជ្ញាធរជាតិអប្សរាបានឱ្យដឹងថា ដើម្បីបណ្តុះគំនិតយុវជនជំនាន់ក្រោយឱ្យបានយល់ដឹងអំពីការថែរក្សាបេតិកភណ្ឌចាប់តាំងពីឆ្នាំ ២០០៧ មក ក៏មានវគ្គបណ្តុះបណ្តាល ១ ដល់សិស្សានុសិស្សរស់នៅតំបន់បេតិកភណ្ឌមានក្នុងខេត្តឧត្តរមានជ័យ បន្ទាយមានជ័យ សៀមរាប ព្រះវិហារ និងខេត្តកំពង់ធំ។
សូមបញ្ជាក់ផងដែរថា នាពេលបច្ចុប្បន្ន ភ្ញៀវទេសចរចូលទៅទស្សនារមណីយដ្ឋានអង្គរចាប់ផ្តើមមានកំណើនឡើងវិញជាបន្តបន្ទាប់ហើយ ដែលនេះជាសញ្ញាមួយបញ្ជាក់ថា កំណើននៃភ្ញៀវទេសចរនឹងវិលត្រឡប់មករកស្ថានភាពល្អប្រសើឡើងវិញ បន្ទាប់ពីស្ងប់ស្ងាត់ ភ្ញៀវទេសចរអស់រយៈពេលប្រមាណជាង ២ ឆ្នាំកន្លងមក ដោយសារការរាតត្បាតជាសកលនៃជំងឺកូវីដ ១៩ ។ នេះបើយោងតាមអាជ្ញាធរជាតិអប្សរា៕