សៀមរាបៈ លោកនាយករដ្ឋមន្ត្រី ហ៊ុន សែន ថ្លែងថា អគ្គិសនីកម្ពុជា (EDC) នឹងមិនយកថ្លៃតភ្ជាប់ចរន្តអគ្គិសនីទៅកាន់ផ្ទះរបស់ប្រជាពលរដ្ឋនៅក្នុងតំបន់អភិវឌ្ឍន៍រុនតាឯក និងពាក់ស្នែង នៃខេត្តសៀមរាប នោះទេ ដែលនេះធ្វើឱ្យប្រជាពលរដ្ឋអាចចំណេញថវិកាប្រមាណពី ៣ ម៉ឺនរៀលដល់ជាង ៣ លានរៀន។
លោកថ្លែងថា EDC បានកសាងអគ្គិសនីនៅតំបន់នេះ ហើយតម្លៃសម្រាប់ការសាងសង់អគ្គិសនី ប្រើថវិកាប្រមាណ ៦ លានដុល្លារអាមេរិក ប៉ុន្តែដើម្បីសម្រាលដល់ថវិកាជាតិ ក្រុមហ៊ុនអគ្គិសនីមិនទាមទារប្រាក់ពីរាជរដ្ឋាភិបាលនោះទេ។ ក្រុមហ៊ុនអគ្គិសនីគឺជួយក្នុងការចេញថវិកាទាំងនោះដើម្បីកសាងហេដ្ឋារចនាសម្ព័ន្ធទាញខ្សែភ្លើងចូលទៅក្នុងតំបន់នេះ។
ក្នុងពិធីជួបសំណេះសំណាលជាមួយប្រជាពលរដ្ឋ ដែលបានស្ម័គ្រចិត្តរើលំនៅឋាន និងសំណង់ផ្សេងៗចេញពីតំបន់រមណីយដ្ឋានអង្គរ និងតំបន់ស្ថិតក្រោមការគ្រប់គ្រងរបស់អាជ្ញាធរជាតិអប្សរា មករស់នៅតំបន់អភិវឌ្ឍន៍ថ្មី រុនតាឯក ខេត្តសៀមរាប នាថ្ងៃទី ២១ ខែតុលា លោក ហ៊ុន សែន បញ្ជាក់ថា ក្រុមហ៊ុនអគ្គិសនីនឹងមានទីស្នាក់ការនៅក្នុងតំបន់នេះ ដែលត្រូវបានប្រគល់ដីឱ្យចំនួនជាងកន្លះហិកតា ដើម្បីប្រតិបត្តិការអគ្គិសនីនៅក្នុងតំបន់នេះ។
លោកថ្លែងថា៖ «ដើម្បីសម្រួលដល់បងប្អូនប្រជាពលរដ្ឋនៅតំបន់រុនតាឯក និងតំបន់ពាក់ស្នែង អគ្គិសនីកម្ពុជានឹងមិនយកថ្លៃភ្ជាប់ចរន្ត ទោះជាសម្រាប់អ្នកប្រើកម្លាំងតូចត្រឹម ៥ អំពែរ ឬអ្នកប្រើប្រាស់ធំដល់ ១០០ អំពែរ គឺប្រជាជនយើងអាចចំណេញបានពី ៣ ១០០០ រៀលរហូតដល់ ៣ ៣០០ ០០០ រៀល»៕