.jpg)
លោកស្រី ស៊ុន សូលីដា ពេលផ្ដល់បទសម្ភាសថ្មីៗនេះ។ រូបថត យូសុះ អាប់ឌុលរ៉ាស់ហ៊ីម
ភ្នំពេញៈ អង្គការ TPO គឺជាអង្គការមួយដែលបាន ធ្វើសកម្មភាពជាច្រើនដើម្បីឆ្លើយតបនឹងបញ្ហាជំងឺ ផ្លូវចិត្តនៅកម្ពុជា។ អង្គការនេះ មានគោលដៅជួយទប់ស្កាត់ និងលើកកម្ពស់សុខភាពផ្លូវចិត្តតាមរយៈការផ្តល់ការប្រឹក្សាដោយឥតគិតថ្លៃ។ ជុំវិញបញ្ហានេះ ភ្នំពេញ ប៉ុស្តិ៍ បានធ្វើបទសម្ភាសជាមួយលោកស្រី ស៊ុន សូលីដា អ្នកចិត្តសាស្ត្រនៃអង្គការ TPO កម្ពុជា ដែលបានអះអាងថា រយៈពេល ៩ ខែឆ្នាំនេះ គ្លីនិក TPO បានផ្តល់សេវាប្រឹក្សា និងព្យាបាលជំងឺផ្លូវចិត្តជាង ១ ០០០ នាក់ ដែលចំនួននេះមានការកើនឡើងបើធៀបនឹងឆ្នាំមុន។
តើបច្ចុប្បន្នអង្គការ TPO មានសកម្មភាពយ៉ាងណាខ្លះ ក្នុងការចូលរួមទប់ស្កាត់ជំងឺផ្លូវចិត្ត ជាពិសេសការជួយប្រជាជនខ្មែរពីជំងឺផ្លូវចិត្ត?
អង្គការ TPO មានបេសកកម្មជាច្រើនកន្លងមក ដើម្បីជួយទប់ស្កាត់ ក៏ដូចជាលើកកម្ពស់សុខភាពផ្លូវចិត្ត។ ទាំងអស់នោះគឺមាន ៣ ចំណុចធំៗរួមមាន ការអប់រំផ្សព្វផ្សាយអំពីបញ្ហាសុខភាពនៅតាមសហគមន៍ និងបណ្តាញសង្គម។ ការផ្តល់ប្រឹក្សាដោយឥតគិតថ្លៃតាមរយៈទូរស័ព្ទ និងតាមឆាតហ្វេសប៊ុកផេចរបស់អង្គការ TPO ។ យើងក៏មានផ្តល់វគ្គបណ្តុះបណ្តាលតាមសហគមន៍ និងជនបង្គោល ដូចជា បុគ្គលិកសុខាភិបាល មន្ត្រីនគរបាល មេភូមិ មេប៉ុស្តិ៍ និងក្រុមនារីឃុំជាដើម។
សម្រាប់ឆ្នាំនេះ តើអង្គការ TPO បានផ្តល់ការប្រឹក្សា និងព្យាបាលជំងឺផ្លូវចិត្តដល់ពលរដ្ឋប៉ុន្មាននាក់?
កាលពីឆ្នាំ ២០២១ គិតចាប់ពីថ្ងៃទី ១ ខែមករា ដល់ថ្ងៃទី ៣០ ខែធ្នូ គឺអង្គការ TPO បានផ្តល់ការប្រឹក្សា និងព្យាបាលជំងឺផ្លូវចិត្តសរុបចំនួន ១ ១៨០ នាក់។ សម្រាប់ឆ្នាំនេះ ដោយគិតចាប់ពីថ្ងៃទី ១ ខែមករា មកដល់ត្រឹមខែកញ្ញា មានចំនួន ១ ១៦៩ នាក់ទៅហើយ ដែលទិន្នន័យបង្ហាញឱ្យឃើញថា មានការកើនឡើង បើធៀបនឹងរយៈពេលដូចគ្នាកាលពីឆ្នាំមុន។ ទិន្នន័យនេះ វានឹងកើនឡើងបន្ថែមទៀត ក្នុងរយៈពេល ៣ ខែទៅមុខទៀត។ នេះគ្រាន់ទិន្នន័យដែលបានដកស្រង់ចេញពីគ្លីនិក ហើយយើងមានទិន្នន័យផ្សេងទៀតដែលប្រមូលពីខាងគម្រោង និងតាមរយៈទូរស័ព្ទ តែមិនទាន់បានបូកបញ្ចូល។
ប្រជាពលរដ្ឋយើង មានការកើនឡើងនូវការប្រើប្រាស់សេវាប្រឹក្សា និងព្យាបាលនៅអង្គការ TPO ហើយការកើនឡើងនេះ អាចមានកត្តារួមផ្សំ ដោយការយល់ដឹងរបស់ពលរដ្ឋ ហើយការដែលមានកំណើននៃការកើតជំងឺផ្លូវចិត្តក៏ជាកត្តា ១ ដែរ។ជាពិសេសនោះ គឺក្នុងអំឡុងកូវីដនេះ យើងមើលឃើញថា ប្រជាជនជាច្រើន មិនថាអ្នកនៅផ្ទះ អ្នកធ្វើការ ឬអ្នកនៅក្នុងកម្រិតណានោះទេ គឺមានតម្រូវការផ្នែកសុខភាពផ្លូវចិត្ត។ អ៊ីចឹងទេការផ្សព្វផ្សាយបន្តរបស់អង្គការ TPO គឺបានជួយជំរុញឱ្យពួកគាត់ស្វែងរកបន្ថែម ហើយឱ្យគាត់យល់ថា ជំងឺផ្លូវចិត្តគឺជាអ្វី?
ពាក់ព័ន្ធនឹងជំងឺផ្លូវចិត្តវិញ តើលោកស្រីអាចជម្រាបបានទេថា អ្វីជាជំងឺផ្លូវចិត្ត?
ជំងឺផ្លូវចិត្ត គឺដូចទៅនឹងជំងឺលើរាងកាយអ៊ីចឹង ជាជំងឺម្យ៉ាងដែលវាប៉ះពាល់ដល់អារម្មណ៍ ការគិត និងអាកប្បកិរិយារបស់យើង ហើយវាអាចធ្វើឱ្យជំនឿរបស់យើងផ្លាស់ប្តូរ និងធ្វើឱ្យបុគ្គលិកលក្ខណៈរបស់យើងប្រែប្រួល។ ជំងឺនេះ នឹងធ្វើឱ្យប៉ះពាល់ទៅដល់មុខងារបំពេញការងារប្រចាំថ្ងៃរបស់យើង ទាំងបុគ្គលផ្ទាល់ និងក្រុមគ្រួសារផងដែរ។
ជំងឺផ្លូវចិត្តគឺមាន ២ ប្រភេទ ទី១ គឺជាជំងឺពាក់ព័ន្ធនឹងការគិត អាចនិយាយបានថា ពាក់ព័ន្ធនឹងជំងឺធ្លាក់ទឹកចិត្ត។ ទី២ គឺជំងឺផ្នែកអារម្មណ៍ ដែលពាក់ព័ន្ធនឹងជំងឺថប់អារម្មណ៍។ ក្នុងផ្នែកទាំងនោះ គឺមានជំងឺផ្សេងៗទៀតដែលយើងអាចកំណត់រោគវិនិច្ឆ័យនីមួយៗបាន លុះត្រាឆ្លងកាត់ពីអ្នកប្រឹក្សា និងក្រុមវេជ្ជបណ្ឌិតចិត្តវិកល ដែលសេវាទាំងអស់នោះ គឺមាននៅក្នុងអង្គការ TPO។
កត្តាអ្វីខ្លះដែលបណ្តាលឱ្យពលរដ្ឋធ្លាក់ចូលក្នុងជំងឺផ្លូវចិត្ត?
មានកត្តាចម្បង ២ ក្នុងនោះកត្តាក្រៅខ្លួនគឺបរិយាកាស មជ្ឈដ្ឋាននៃការរស់នៅ វិបត្តិសង្គម ទំនាក់ទំនង និងវិបត្តិគ្រួសារ សរីរាង្គកាយជាដើម។ កត្តាក្នុងខ្លួន គឺពាក់ព័ន្ធនឹងការគិត និងការប្រែប្រួលគីមីក្នុងខួរក្បាលដែលបណ្តាលឱ្យបុគ្គលបង្ហាញភាពមិនប្រក្រតីកើតឡើង។ ឧទាហរណ៍ដូចជា ការគិតច្រើន វានឹងបញ្ចេញអ័រម៉ូនក្នុងខ្លួនយើងច្រើន ដែលឱ្យសរីរាង្គកាយសកម្មលើសលប់ ឬអ្នកខ្លះ ធ្វើឱ្យយើងហ្នឹងស្ពឹកស្រពន់ មិនចង់ធ្វើអ្វីនោះឡើយ ហើយពេលខ្លះរហូតគិតថា ខ្លួនឯងអត់តម្លៃ អត់មានប្រយោជន៍ជាដើម។ ចំពោះបច្ចុប្បន្នឃើញថា វិបត្តិកូវីដ ១៩ ក៏ជាកត្តាសំខាន់មួយដែលអាចរាប់ជាវិបត្តិក្នុងសង្គម ហើយបង្កទៅជាវិបត្តិផ្លូវចិត្តសង្គមផងដែរ។
តើអ្នកជំងឺអាចជួយខ្លួនឯងពីជំងឺផ្លូវចិត្តតាមរបៀបណា?
របៀបជួយខ្លួនឯងពីជំងឺទាំងនេះគឺទី១ យើងមានកម្រិតនៃការវាស់វែងដើម្បីឱ្យបុគ្គលរៀនស្គាល់នូវរោគសញ្ញាខ្លួនឯង ព្រោះយើងជាអ្នកជំនាញពិតមែន ប៉ុន្តែមធ្យោបាយ គឺការសួរ ឬការបំផុសឱ្យអ្នកជំងឺឬអ្នកមានវិបត្តិ គាត់និយាយពីបញ្ហារបស់គាត់។ ប្រសិនបើគាត់មិនបង្ហាញពីវិបត្តិរបស់គាត់ យើងក៏មិនដឹងជួយគាត់យ៉ាងដូចម្តេចដែរ ព្រោះអ្នកចិត្តសាស្ត្រខុសពីអ្នកវេជ្ជសាស្ត្រ។ ដូច្នេះនៅពេលយើងកំណត់រោគសញ្ញាបាន យើងកំណត់ពីភាពរំខានបាន នោះយើងអាចកំណត់បានថា កម្រិតណា ដែលគាត់អាចជួយខ្លួនឯងបាន កម្រិតណាដែលត្រូវជួយពីអ្នកចិត្តសាស្ត្ររហូតដល់ការជួយពីក្រុមគ្រូពេទ្យចិត្តវិកល។
ចំពោះជំងឺផ្លូវចិត្តនៅពេលធ្លាក់ជាជំងឺហើយគឺត្រូវការការព្យាបាល ប៉ុន្តែបើស្ថិតជាបញ្ហាផ្លូវចិត្ត គឺគាត់អាចជួយខ្លួនឯងបាន។ នៅក្នុងផ្នែកចិត្តសាស្ត្រ គេបាននិយាយថា ពេលមានបញ្ហាផ្លូវចិត្តគឺការចែករំលែក ឬការនិយាយជាមួយមនុស្សទុកចិត្តនឹងធ្វើឱ្យយើងមានភាពធូរស្បើយផ្លូវចិត្ត។ បញ្ហាផ្លូវចិត្តនឹងល្អប្រសើរមកវិញក្នុងពេលណាមួយដោយឯងៗដោយមិនបាច់និយាយជាមួយអ្នកជំនាញទេ គឺគ្រាន់តែនិយាយជាមួយអ្នកដែលអ្នកទុកចិត្ត ឬអ្នកណាម្នាក់ដែលចេះស្តាប់។
ម្យ៉ាងវិញទៀត គឺគាត់ត្រូវស្វែងរកអ្នកជំនាញដើម្បីជួយឱ្យគាត់អាចមើលឃើញ ព្រោះអ្នកជំនាញ គឺជាកញ្ចក់ ដែលអាចមើលឃើញថា អ្នកមានបញ្ហា ហើយត្រូវការការជួយ។ នៅពេលប្រើប្រាស់ វិធីទាំងនេះហើយ នៅតែមិនអាចជួយខ្លួនឯង គាត់ត្រូវជួយពីក្រុមគ្រូពេទ្យដើម្បីប្រើប្រាស់ថ្នាំជំនួយ។ ឧទាហរណ៍អ្នកជំងឺពិបាកគេងខ្លាំងហើយបានប្រើវិធីសាស្ត្រណាមួយហើយ នៅតែមិនអាចជួយគាត់បាន គឺមានតែការប្រើថ្នាំ ដើម្បីជំរុញឱ្យការគិត និងការគេងរបស់គាត់ ដែលជាមុខងារប្រចាំថ្ងៃរបស់គាត់ត្រឡប់មកវិញ។
សម្រាប់ការយល់ដឹងរបស់ពលរដ្ឋខ្មែរ តើពួកគាត់មានការស្វែងយល់ពីជំងឺនេះ កម្រិតណាហើយក្នុងពេលបច្ចុប្បន្ន?
ទោះបីជាមានកំណើននៃចំនួនប្រជាជនយើងមកទទួលសេវាក៏ដោយ ក៏ប៉ុន្តែការយល់ដឹងមួយចំនួនអំពីជំងឺផ្លូវចិត្តរបស់ប្រជាជនខ្មែរនៅមានកម្រិតនៅឡើយ ហើយវាមានទំនាក់ទំនងយ៉ាងជិតស្និទ្ធជាមួយជំនឿ និងទំនៀមទម្លាប់ប្រពៃណីទៀតផង។ ភាគច្រើនបុគ្គលដែលគិតគូរ និងស្វែងរកសេវាគាំទ្រផ្លូវចិត្ត គឺចាប់ផ្តើមពីបុគ្គលដែលធ្លាប់បានសិក្សា ឬរស់នៅក្រៅប្រទេស ឬបុគ្គលដែលមានបទពិសោធនៃការប៉ះទង្គិចផ្លូវចិត្ត ឬមានគ្រួសារដែលរងគ្រោះដោយសារជំងឺផ្លូវចិត្ត។
នាពេលបច្ចុប្បន្ននេះ TPO សង្កេតឃើញថា យុវជន ចាប់ផ្តើមស្វែងយល់ និងជជែកពិភាក្សាអំពីបញ្ហាសុខភាពផ្លូវចិត្តជាច្រើនលើបណ្តាញសង្គម ជាពិសេសទំព័រហ្វេសប៊ុកផេចរបស់អង្គការ TPO ដែលមានយុវជនជាច្រើនបានឆាត និងសួរសំណួរពាក់ព័ន្ធនឹងបញ្ហាផ្លូវចិត្តរបស់ពួកគេ។
ក្នុងទិសដៅបន្ត តើអង្គការ TPO មានផែនការយ៉ាងណាទៀត ដើម្បីចូលរួមកាត់បន្ថយ និងជួយដល់អ្នកមានបញ្ហាជំងឺផ្លូវចិត្តនៅកម្ពុជា?
ជាការពិតណាស់ ស្របជាមួយទិសដៅរបស់អង្គការ TPO យើងតែងតែចង់ឃើញប្រជាពលរដ្ឋរស់នៅប្រកបដោយការពេញចិត្តនឹងជីវិតប្រចាំថ្ងៃរបស់គាត់ និងមានគុណភាពរស់នៅក្នុងជីវិតល្អ។ ដូច្នេះ TPO នៅតែបន្តផ្សព្វផ្សាយ និងអប់រំផ្លូវចិត្ត ផ្សព្វផ្សាយអំពីសុខភាពផ្លូវចិត្តនៅថ្នាក់មូលដ្ឋាន ក្រុមគោលដៅ សិស្សសាលា និងអាជ្ញាធរមូលដ្ឋាន ដែលជាភ្នែកជាច្រមុះរបស់សហគមន៍។
យើងក៏បន្តផ្តល់វគ្គបណ្តុះបណ្តាលអំពីការសង្គ្រោះបឋមផ្លូវចិត្ត និងសុខភាពផ្លូវចិត្តទៅកាន់ពួកគាត់ អាចមានលទ្ធភាពកំណត់ឬបញ្ជូនបងប្អូនប្រជាពលរដ្ឋទៅរកសេវាដែលត្រឹមត្រូវ និងសមស្រប។ ជំងឺផ្លូវចិត្តខ្លះក្នុងអតីតកាលត្រូវបានគេប្រើប្រាស់វិធីព្យាបាលបែបទំនៀមទម្លាប់ច្រើនរហូតធ្វើឱ្យអ្នកជំងឺមានគ្រោះថ្នាក់ដល់អាយុជីវិត។ អ៊ីចឹងយើងចង់ឱ្យគាត់មើលឃើញ កន្លែងណាដែលគ្រោះថ្នាក់ កន្លែងណាមិនគ្រោះថ្នាក់ ហើយទទួលបានសេវាដោយសុវត្ថិភាពសម្រាប់អ្នកជំងឺ។
ជាងនេះទៅទៀត យើងក៏បន្តពង្រឹងបេសកកម្មរបស់យើង ចែករំលែកតាមបណ្តាញសង្គមហ្វេសប៊ុក និងទិកតុក ដើម្បីឱ្យប្រាកដថា បងប្អូនប្រជាពលរដ្ឋយើងទទួលបានសារអប់រំច្រើន ហើយយើងនឹងពង្រឹងសេវាកម្មប្រឹក្សាយោបល់ឱ្យល្អបំផុតតាមដែលអាចធ្វើទៅបាន។
លោកអ្នកអាចពិគ្រោះយោបល់ពីបញ្ហាជំងឺផ្លូវចិត្តដោយឥតគិតថ្លៃពីអ្នកជំនាញរបស់អង្គការ TPO តាមរយៈលេខទូរស័ព្ទ ០១៧ ២២២ ៣៧២/០១០ ២២២ ៤៧៨/០៩៧ ៩១១១ ៩១៨ ឬតាមរយៈហ្វេសប៊ុកផេចមានឈ្មោះ TPO Cambodia៕
