សៀមរាបៈ លោកនាយករដ្ឋមន្ត្រី ហ៊ុន សែន ប្រកាសផ្តល់បណ្ណកម្មសិទ្ធិដល់ប្រជាពលរដ្ឋដែលស្ម័គ្រចិត្តរើលំនៅឋានចេញពីតំបន់រមណីយដ្ឋានអង្គរមករស់នៅតំបន់អភិវឌ្ឍន៍ថ្មី រុនតាឯកនៃស្រុកបន្ទាយស្រី ខេត្ដសៀមរាប។
លោកថ្លែងថា៖ «ខ្ញុំគិតថា នេះវាជាការផ្តល់មួយសម្រាប់បងប្អូនដែលស្ម័គ្រចិត្តចេញពីរមណីដ្ឋានអង្គរ ហើយមកស្នាក់នៅទីនេះ ដែលក្រោយនេះ បងប្អូនខ្លះគិតថា នឹងផ្តល់ឱ្យទៅជាដីសង្គមកិច្ច តែខ្ញុំមិនយល់យ៉ាងដូច្នោះទេ។ ខ្ញុំគិតថា បន្ទាប់ពីហ្នឹងទៅត្រូវចេញបណ្ណកម្មសិទ្ធិឱ្យបងប្អូនតែម្តងទៅ ព្រោះបងប្អូនត្រូវការយកទៅដាក់នៅធនាគារដើម្បីខ្ចីប្រាក់គេ មិនអ៊ីចឹង!»។
លោក ហ៊ុន សែន ថ្លែងដូច្នេះ ក្នុងពិធីជួបសំណេះសំណាលជាមួយប្រជាពលរដ្ឋ ដែលបានស្ម័គ្រចិត្តរើលំនៅឋាន និងសំណង់ផ្សេងៗចេញពីតំបន់រមណីយដ្ឋានអង្គរ និងតំបន់ស្ថិតក្រោមការគ្រប់គ្រងរបស់អាជ្ញាធរជាតិអប្សរា មករស់នៅតំបន់អភិវឌ្ឍន៍ថ្មី រុនតាឯក នាថ្ងៃទី ២១ ខែតុលា។
លោកថ្លែងថា ចំពោះដីសម្បទានសង្គមកិច្ចគឺប្រជាពលរដ្ឋមិនអាចយកទៅប្រើប្រាស់ក្នុងការខ្ចីប្រាក់ធនាគារបាននោះទេ ព្រោះរាជរដ្ឋាភិបាលមិនទាន់ចេញបណ្ណកម្មសិទ្ធិឱ្យពួកគាត់ ដោយលោកបញ្ជាក់ថា៖ «អាហ្នឹងគឺខ្ញុំបញ្ជាក់បន្ថែមថ្ងៃហ្នឹងគឺពេលដែលបងប្អូនមកនៅទីនេះ ប៉ុន្តែចាំមកនៅសិន បើអត់ទាន់មកនៅផង។ ឥឡូវត្រឹមតែផ្គត់ផ្គង់សម្រាប់ប្រាក់សង្គមទេ។ សម្រាប់ការចេញបណ្ណកម្មសិទ្ធិ ឱ្យបងប្អូនមកនៅសិន»។
លោក ហ៊ុន សែន បានប្រាប់ឱ្យអាជ្ញាធរពាក់ព័ន្ធរៀបចំការចុះបញ្ជីដីធ្លីជាប្រព័ន្ធនៅក្នុងតំបន់នេះ ដើម្បីបង្កើតឱ្យជាភូមិមូលដ្ឋានរឹងមាំ ខណៈលោកបានអំពាវនាវដល់ធនាគារ និងគ្រឹះស្ថានមីក្រូហិរញ្ញវត្ថុឱ្យផ្តល់ការយោគយល់សម្រាប់ប្រជាជនដែលរស់នៅក្នុងតំបន់នេះ៕