.jpg)
ពលរដ្ឋនិងអាជ្ញាធរខេត្តសៀមរាប ក្នុងពិធីប្រគល់-ទទួលអំណោយពីថ្ងៃទី ១៩ តុលា។ រូបថត រដ្ឋបាលខេត្តសៀមរាប
សៀមរាបៈ ប្រជាពលរដ្ឋដែលរងគ្រោះមហន្ដរាយដោយទឹកជំនន់ចំនួន ២ ៨៧៤ គ្រួសារ នៅក្នុងស្រុកជីក្រែង បានទទួលអំណោយជាគ្រឿងឧបភោគបរិភោគ និងគ្រាប់ពូជស្រូវ ពីរាជរដ្ឋាភិបាល ខណៈស្រុកនេះ មានដំណាំស្រូវរងផលប៉ះពាល់ចំនួន ២ ៧៧៩ ហិកតា និងរងការខូចខាតចំនួន ១៣៥ ហិកតា ត្រូវស្តារឡើងវិញ។ នេះបើយោងតាមហ្វេសប៊ុករដ្ឋបាលខេត្តសៀមរាបចុះផ្សាយនៅថ្ងៃទី ២០ តុលា។
ពិធីប្រគល់អំណោយកាលពីថ្ងៃទី ១៩ តុលានេះ ត្រូវបានធ្វើឡើងក្រោមអធិបតីភាពលោក ទៀ សីហា អភិបាល នៃគណៈអភិបាលខេត្ត សៀមរាប និងមានការចូលរួមពីថ្នាក់ដឹកនាំនៃមន្ទីរ អង្គភាពពាក់ព័ន្ធ ជុំវិញខេត្ត អាជ្ញាធរមូលដ្ឋាន ព្រមទាំងប្រជាពលរដ្ឋដែលជាអ្នកទទួលជំនួយ។
លោក ទៀ សីហា បានថ្លែងថា៖«ការផ្ដល់ស្បៀងនេះ ជាការយកចិត្ដទុកដាក់ដ៏ខ្ពង់ខ្ពស់ របស់សម្តេចអគ្គមហា សេនាបតីតេជោ ហ៊ុន សែន ដែលបានគិតគូរ និងបានឧបត្ថម្ភគាំទ្រជាបន្តបន្ទាប់ ដល់ប្រជាពលរដ្ឋរងផលប៉ះពាល់ គ្រួសាររងគ្រោះ និងងាយរងគ្រោះក្នុងអំឡុងគ្រោះទឹកជំនន់នេះ»។
លោកអភិបាលខេត្តលើកឡើងថា បើទោះបីស្បៀងទាំងនេះ មិនច្រើនក៏ពិតមែន ប៉ុន្ដែអាចជួយសម្រួលដល់ជីវភាពប្រជាពលរដ្ឋបានមួយគ្រា ដែលនេះបង្ហាញពីការយកចិត្ដទុកដាក់ពីរាជរដ្ឋាភិបាល។
លោក ពៅ ប៊ុនធឿន អភិបាលស្រុកជីក្រែង មានប្រសាសន៍ថា នៅក្នុងភូមិសាស្ដ្រស្រុកជីក្រែង ចាប់ពីថ្ងៃទី ២៣ ខែកញ្ញា ឆ្នាំ ២០២២ រហូតដល់ថ្ងៃទី ១៧ ខែតុលា ឆ្នាំ ២០២២ បានរងផលប៉ះពាល់ដោយសារទឹកជំនន់ ជន់លិចមានចំនួន ១២ ឃុំ ដោយក្នុងនោះ ប្រជាពលរដ្ឋដែលរងផលប៉ះពាល់ចំនួន ២ ៧២០ គ្រួសារ កុមារលង់ទឹកស្លាប់ចំនួន ០២ នាក់ លិចលំនៅឋានកម្រិតស្រាលចំនួន ១៧២ គ្រួសារ លិចទីធ្លាសាលារៀន លិចបរិវេណមណ្ឌលសុខភាព លិចអគាររដ្ឋបាលឃុំ លិចវត្តអារាម ព្រមទាំងលិចហេដ្ឋារចនាសម្ព័ន្ធផ្លូវថ្នល់មួយចំនួនបណ្ដាលឱ្យខូចខាតប្រវែង ២ ៣១៦ ម៉ែត្រ។
ក្រៅពីនេះ ដំណាំស្រូវរងផលប៉ះពាល់ចំនួន ២ ៧៧៩ ហិកតា និងខូចខាតចំនួន ១៣៥ ហិកតា ក្នុងនោះតម្រូវការស្ដាដាំដុះឡើងវិញចំនួន ៥២ ហិកតាស្មើនឹង ១២១ គ្រួសារ។
លោកបន្ដថា ប្រជាពលរដ្ឋក្រីក្រដែលរងគ្រោះដោយសារទឹកជំនន់សរុបចំនួន ២ ៨៧៤ គ្រួសារ ដែលត្រូវទទួលស្បៀងសង្គ្រោះបន្ទាន់របស់រាជរដ្ឋាភិបាល និងទទួលបានគ្រាប់ពូជស្រូវមានចំនួន ១២១ គ្រួសារ សម្រាប់ពួកគាត់យកទៅដាំស្រូវស្តារឡើងវិញក្នុងអំឡុងពេលទឹកកំពុងស្រកជាបណ្តើរៗនេះ។
បើតាមរដ្ឋបាលខេត្តសៀមរាប គិតចាប់ពីថ្ងៃទី ១៧ ខែតុលាឆ្នាំ ២០២២ នេះ ការបែងចែកស្បៀង និងគ្រឿងឧបភោគ បរិភោគ ដល់ប្រជាពលរដ្ឋមានផលប៉ះពាល់ដោយគ្រោះមហន្ដរាយពីគណៈកម្មការគ្រប់គ្រងប្រព័ន្ធស្បៀងបម្រុងកម្ពុជាមានចំនួនជាង ៦ ពាន់គ្រួសារ ក្នុងចំណោមប្រជាពលរដ្ឋរងគ្រោះដោយទឹកជំនន់ ១ ម៉ឺន ៤៥០ គ្រួសារ ក្នុងស្រុកចំនួន ៨ នៃខេត្ដសៀមរាប៕
