.jpg)
លោកនាយករដ្ឋមន្រ្តីនៅក្នុងពិធីសំណេះសំណាលជាមួយប្រជាពលរដ្ឋនៅរុនតាឯក នាថ្ងៃនេះ។ រូបថត SPM
សៀមរាបៈ លោកនាយករដ្ឋមន្ត្រី ហ៊ុន សែន ប្រកាសថា សាលាស្រុកបន្ទាយស្រី នឹងត្រូវរើចេញទៅនៅតំបន់អភិវឌ្ឍន៍រុនតាឯក ហើយសាលាស្រុកអង្គរធំ ក៏នឹងត្រូវរើចេញទៅនៅតំបន់ពាក់ស្នែង ក្នុងខេត្តសៀមរាប។
លោកថ្លែងថា៖ «សាលាស្រុកបន្ទាយស្រីដែលស្ថិតនៅក្នុងតំបន់មួយត្រូវរើមកនៅរុនតាឯកដែរ។ អ៊ីចឹងទេ បងប្អូននៅរុនតាឯកគឺត្រូវប៉ាន់ហ្មង។ ស្អីក៏មានដែរ! សាលាស្រុកមកនៅជិតហ្នឹង។ ឥឡូវទុកឱ្យគាត់ប៉ុន្មានហិកតានៅកន្លែងហ្នឹងទៅមកកសាង ព្រោះអាហ្នឹងជាសំណូមពររបស់អភិបាលខេត្ត សំណូមពររបស់អភិបាលស្រុក ដើម្បីរើចេញ។ មិនអាចឱ្យប្រជាជនចេញ ហើយអាជ្ញាធរមិនព្រមចេញ។ អ៊ីចឹង ត្រូវចេញមក»។
លោក ហ៊ុន សែន ថ្លែងដូច្នេះ ក្នុងពិធីជួបសំណេះសំណាលជាមួយប្រជាពលរដ្ឋ ដែលបានស្ម័គ្រចិត្តរើលំនៅឋាន និងសំណង់ផ្សេងៗចេញពីតំបន់រមណីយដ្ឋានអង្គរ និងតំបន់ស្ថិតក្រោមការគ្រប់គ្រងរបស់អាជ្ញាធរជាតិអប្សរាមករស់នៅតំបន់អភិវឌ្ឍន៍ថ្មី រុនតាឯក នាថ្ងៃទី ២១ ខែតុលា។
លោកបន្ថែមថា៖ «សម្រាប់សាលាស្រុកអង្គរធំក៏នៅក្នុងតំបន់មួយដែរត្រូវលើកទៅធ្វើនៅពាក់ស្នែងឯនោះ។ អ៊ីចឹង ត្រូវចេញដែរ ព្រោះអ្នកនៅក្នុងតំបន់មួយជាកន្លែងដែលយើងត្រូវដោះស្រាយ»៕
