.jpg)
រូបថត SPM
ភ្នំពេញៈ កម្ពុជា និងទីម័រខាងកើត បានចាត់ទុកការចូលជាធរមាននាពេលថ្មីៗនេះនៃកិច្ចព្រមព្រៀងលើកលែងទិដ្ឋាការសម្រាប់អ្នកកាន់លិខិតឆ្លងដែនការទូត និងផ្លូវការ ថាជាការបោះជំហានមួយទៀតនៅក្នុងការពង្រឹងទំនាក់ទំនងការទូតរវាងប្រទេសទាំង ២។
កាលថ្ងៃទី ២០ ខែតុលា លោក ចូហ្សេ ម៉ានូអែល រ៉ាមូស អរតា (José Manuel Ramos-Horta) និង លោកនាយករដ្ឋមន្ត្រី ហ៊ុន សែន បានជួបប្រជុំកំពូលទ្វេភាគីនៅរាជធានីភ្នំពេញដើម្បីពិភាក្សាអំពីការពង្រឹងមិត្តភាព និងកិច្ចសហប្រតិបត្តិការរវាងប្រទេសទាំង ២ ក្នុងឱកាសលោកមកបំពេញទស្សនកិច្ចនៅកម្ពុជា ពីថ្ងៃទី ១៩ ដល់ថ្ងៃទី ២១ ខែតុលា។
សេចក្តីប្រកាសព័ត៌មានក្រសួងការបរទេសកម្ពុជាបញ្ជាក់នាថ្ងៃទី ២១ ខែតុលា ថា លោក ហ៊ុន សែន បានវាយតម្លៃខ្ពស់ចំពោះដំណើរទស្សនកិច្ចនេះ និងបានចាត់ទុកថា វាជាដំណើរទស្សនកិច្ចដ៏មានអត្ថន័យរបស់ លោក ចូហ្សេ ម៉ានូអែល រ៉ាមូស អរតា ក្នុងពេលដែលប្រទេសទាំង ២ ប្រារព្ធខួបលើកទី២០ នៃការបង្កើតទំនាក់ទំនងការទូតជាមួយគ្នា។
សេចក្តីប្រកាសព័ត៌មានបញ្ជាក់ថា៖ «ថ្នាក់ដឹកនាំទាំង ២ បានស្វាគមន៍ចំពោះការចូលជាធរមាននាពេលថ្មីៗនេះ នៃកិច្ចព្រមព្រៀងស្តីពីការលើកលែងទិដ្ឋាការសម្រាប់អ្នកកាន់លិខិតឆ្លងដែនការទូត និងផ្លូវការ ដែលត្រូវបានចុះហត្ថលេខាក្នុងឱកាសនៃដំណើរទស្សនកិច្ចផ្លូវការរបស់សម្តេចតេជោនាយករដ្ឋមន្ត្រី ទៅកាន់ប្រទេសទីម័រខាងកើត កាលពីឆ្នាំ ២០១៦ និងបានចាត់ទុកកិច្ចព្រមព្រៀងនេះថាជាការបោះជំហានមួយទៀតនៅក្នុងការពង្រឹងទំនាក់ទំនងការទូតរវាងប្រទេសទាំង ២»។
លោក ហ៊ុន សែន បានរំឭកឡើងវិញអំពីការពិភាក្សា «ប្រកបដោយផ្លែផ្កា» នាពេលថ្មីៗនេះរវាងថ្នាក់ដឹកនាំទាំង ២ នៅទីក្រុងញូវយ៉ក សហរដ្ឋអាមេរិក ជាពិសេស អំពីសារៈសំខាន់នៃការជំរុញកិច្ចសហប្រតិបត្តិការសេដ្ឋកិច្ច។
ដើម្បីជំរុញកិច្ចសហប្រតិបត្តិការសេដ្ឋកិច្ចនេះ លោកនាយករដ្ឋមន្ត្រីបានជំរុញឱ្យអាជ្ញាធរមានសមត្ថកិច្ចនៃប្រទេសទាំង ២ បន្តអនុវត្តប្រកបដោយប្រសិទ្ធភាពនូវឯកសារចំនួន ៣ ដែលបានចុះហត្ថលេខារួច រួមមាន អនុស្សរណៈនៃការយោគយល់ស្តីពីកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម និងបច្ចេកទេស កិច្ចព្រមព្រៀងស្តីពីកិច្ចសហប្រតិបត្តិការលើវិស័យបច្ចេកទេស និងសេដ្ឋកិច្ច និងអនុស្សរណៈនៃកិច្ចព្រមព្រៀងស្តីពីកិច្ចសហប្រតិបត្តិការរវាងសភាពាណិជ្ជកម្មនៃប្រទេសទាំង ២។
សេចក្តីប្រកាសព័ត៌មានបញ្ជាក់ថា៖ «ឯកឧត្តមប្រធានាធិបតី ចូហ្សេ ម៉ានូអែល រ៉ាមូស អរតា បានបង្ហាញចំណាប់អារម្មណ៍ និងទទួលយកទៅពិចារណាសំណើរបស់សម្តេចតេជោនាយករដ្ឋមន្ត្រី ហ៊ុន សែន សម្រាប់ការវិនិយោគដោយប្រទេសទីម័រខាងកើត លើវិស័យម៉ាស៊ីនកិនស្រូវនៅក្នុងព្រះរាជាណាចក្រកម្ពុជា សម្រាប់នាំចេញទៅកាន់ប្រទេសទីម័រខាងកើត ដើម្បីបំពេញតម្រូវការក្នុងប្រទេស»៕
