.jpg)
ភ្នំពេញៈ រដ្ឋសភាកម្ពុជា ឡាវ និងវៀតណាម (CLV) គូសបញ្ជាក់ឡើងវិញពីការប្តេជ្ញាលើកកម្ពស់សហប្រតិបត្តិការនៅតំបន់អភិវឌ្ឍន៍ត្រីកោណ CLV ដើម្បីចំណងមិត្តភាព សាមគ្គីភាពនិងការលើកកម្ពស់ជីវភាពប្រជាជននិងការអភិវឌ្ឍនៅតំបន់ព្រំដែន CLV។
ការគូសបញ្ជាក់ឡើងវិញនេះធ្វើឡើងក្នុងកិច្ចប្រជុំពិគ្រោះយោបល់រវាងគណៈកម្មការ/គណៈកម្មាធិការកិច្ចការបរទេសនៃរដ្ឋសភាជាតិនៃប្រទេស CLV ទាំង៣នេះ នៅទីក្រុងសាប៉ា ខេត្តឡៅកៃ ប្រទេសវៀតណាម ចាប់ពីថ្ងៃទី១៨-២១ ខែតុលា។
សេចក្តីប្រកាសព័ត៌មានរដ្ឋសភាកម្ពុជាបញ្ជាក់នាថ្ងៃទី ២១ ខែតុលា ថា៖ «កិច្ចប្រជុំពិគ្រោះយោបល់នេះបានបញ្ចប់ទៅដោយរលូន ប្រកបដោយស្មារតីមិត្តភាពស្និទ្ធស្នាលដោយប្រធាន គណៈកម្មការ/គណៈកម្មាធិការកិច្ចការបរទេសនៃប្រទេសទាំង ៣ បានបញ្ជាក់ឡើងវិញពីសារៈសំខាន់នៃការលើកកម្ពស់សហប្រតិបត្តិការនៅតំបន់អភិវឌ្ឍន៍ត្រីកោណ CLV ដើម្បីចំណងមិត្តភាព សាមគ្គីភាព និងការលើកកម្ពស់ ជីវភាពប្រជាជននិងការអភិវឌ្ឍនៅតំបន់ព្រំដែន CLV»។
កិច្ចប្រជុំនេះបានឯកភាពគ្នាលើខ្លឹមសារសេចក្តីព្រាងនីតិវិធីដើម្បីត្រៀមដាក់ជូនថ្នាក់ដឹកនាំកំពូលនៃរដ្ឋសភាទាំង៣ ពិនិត្យនិងសម្រេចជាផ្លូវការ ក្នុងជំនួបនាឱកាសចូលរួមមហាសន្និបាតអន្តរសភាអាស៊ាន លើកទី៤៣ នៅរាជធានីភ្នំពេញ ដែលសភាកម្ពុជាធ្វើជាម្ចាស់ផ្ទះ។
សេចក្តីប្រកាសព័ត៌មានបញ្ជាក់ថា សេចក្តីព្រាងវិធាននៃនីតិវិធីនេះនឹងក្លាយជាមូលដ្ឋាននៃការរៀបចំកិច្ចប្រជុំកំពូលនៃរដ្ឋសភា CLV តាមយន្តការប្តូរវេនរៀងរាល់ ២ ឆ្នាំម្តង។
តបតាមការអញ្ជើញរបស់លោក Vu Hai Ha ប្រធានគណៈកម្មាធិការកិច្ចការបរទេស រដ្ឋសភាវៀតណាម គណៈប្រតិភូរដ្ឋសភាកម្ពុជា ដឹកនាំដោយ លោក សួស យ៉ារ៉ា ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន នៃរដ្ឋសភា និងគណៈប្រតិភូរដ្ឋសភាឡាវ ដឹកនាំដោយ លោក Sanya Praseuth ប្រធានគណៈកម្មាធិការកិច្ចការបរទេសបានចូលរួមកិច្ចប្រជុំនេះ។
កិច្ចប្រជុំពិគ្រោះយោបល់នេះត្រូវបានរៀបចំឡើងក្នុងគោលបំណង ដើម្បីពិភាក្សាអំពីសេចក្តីព្រាងនីតិវិធី នៃការរៀបចំកិច្ចប្រជុំកំពូលនៃរដ្ឋសភាជាតិ CLV ដែលគ្រោងនឹងរៀបចំលើកទី១ នៅប្រទេសឡាវ នៅឆ្នាំ ២០២៣ ស្របតាមស្មារតីនៃទស្សនកិច្ចរបស់ លោក ហេង សំរិន ប្រធានរដ្ឋសភាកម្ពុជា ទៅកាន់ប្រទេសវៀតណាម និងឡាវ កាលពីឆ្នាំ២០២២ និងស្មារតីនៃជំនួបរវាងប្រធានគណៈកម្មការ/គណៈកម្មាធិការកិច្ចការបរទេសនៃប្រទេសCLV នៅទីក្រុងបាលី ប្រទេសឥណ្ឌូនេស៊ី កាលពីខែមីនា ឆ្នាំ ២០២២ ដែលបានឯកភាពក្នុងការលើកកម្ពស់កិច្ចសហប្រតិបត្តិការនៃរដ្ឋសភាទាំង ៣ ទៅដល់កម្រិតប្រធានរដ្ឋសភា។
កិច្ចសហប្រតិបត្តិការនៃរដ្ឋសភាជាតិ CLV បានចាប់ផ្តើមឡើងតាំងពីឆ្នាំ ១៩៩៩ ស្របពេលដែលរដ្ឋាភិបាលនៃប្រទេសទាំង ៣ កម្ពុជា ឡាវ និងវៀតណាម បង្កើតតំបន់អភិវឌ្ឍន៍ត្រី កោណ (DTA)៕
