ភ្នំពេញៈ​ក្រុម​ការងារ​នគរ​បាល​ចរាចរណ៍​លើផ្លូវ​ល្បឿន​លឿន​ភ្នំពេញ​-​ព្រះសីហនុ​បាន​ឃាត់​ខ្លួន​អ្នក​បើកប​រដែល​មិន​គោរព​តាម​លក្ខ​ខណ្ឌ​សេចក្តី​ណែនាំ និង​ប្រព្រឹត្ត​ផ្ទុយ​ពី​ច្បាប់​ចរាចរ​ណ៍មក​ធ្វើ​ការ​ណែ​នាំ​និង​ចុះកិច្ច​សន្យា​យ៉ាង​តឹងរ៉ឹង​នៅ​ទីស្នាក់​ការ​ស្ថា​នីយ​ផ្លូវ​ល្បឿន​លឿន​។​

​ការ​ឃាត់​ខ្លួន​នេះបាន​ធ្វើ​ឡើង​បន្ទាប់​ពី​អ្នក​បើក​បរ​ទាំង​នោះ​បាន​ល្មើស​នឹង​បម្រាមនិង​ច្បាប់​មួយ​ចំនួន​ដូច​ជា​ កា​របើក​បរហួ​ស​ល្បឿន​កំណត់ ​បើកបរ​យឺត​ជាង​ល្បឿន​កំណត់ ​បើក​បរ​បញ្ច្រាស​ទិស​ច​រាច​រណ៍ បើក​បរ​លើ​គន្លង​ផ្លូវ​អាសន្ន ​បើកបរ​ក្រោម​ឥទ្ធិ​ពល​នៃ​គ្រឿង​ស្រវឹង បើក​បរ​ប្រភេទ​យាន​យន្ត​ដែល​មិនបាន​អនុញ្ញាត ​និង​ឈប់​សំចត​នៅលើ​ផ្លូវ​ល្បឿន​លឿន​ជា​ដើម​។ នេះ​បើ​តាម​អះ​អាង​របស់​ក្រុម​ហ៊ុន​ផ្លូវ​ល្បឿន​លឿន​។​

​ក្រុម​ហ៊ុន​បាន​បញ្ជាក់​នៅក្នុង​ទំព័រ​ហ្វេ​ស​ប៊ុក​របស់​ខ្លួន​កាលពី​ថ្ងៃទី ២២ ​តុលា​ អម​ជាមួយ​នឹង​រូបថត​ជាច្រើន​សន្លឹក​ថា ​«​ខាង​ក្រោម​នេះ​ជា​សកម្ម​ភាព​ក្រុម​ការងារ​នគរ​បាលច​រា​ចរណ៍​លើផ្លូវ​ល្បឿន​លឿន​ភ្នំពេញ​-​ព្រះ​សីហនុ​ ធ្វើការ​ឃាត់​ខ្លួន​អ្នក​បើក​បរ​ដែល​មិន​គោរព​តាម​លក្ខ​ខណ្ឌ​សេចក្តី​ណែនាំ​និង​ប្រព្រឹត្ត​ផ្ទុយ​ពី​ច្បាប់​ចរា​ចរណ៍មក​ធ្វើ​ការណែ​នាំ ​និង​ចុះកិច្ច​សន្យា​យ៉ាង​តឹង​រ៉ឹង​នៅ​ទីស្នាក់​ការ​ស្ថានីយ​ផ្លូវ​ល្បឿន​លឿន​»​។

​ក្រុម​ហ៊ុន​ផ្លូវ​ល្បឿន​លឿន ក៏​អំពាវ​នាវ​ដល់​បងប្អូន​ប្រជា​ពលរដ្ឋ​ដែល​ប្រើ​ប្រាស់​ផ្លូវ​នេះ ត្រូវ​ចូលរួម​គោរព​តាម​លក្ខ​ខណ្ឌ សេចក្តី​ណែនាំ​ ជា​ពិសេស​ច្បាប់​ចរា​ចរណ៍​ផ្លូវ​គោក​ឱ្យបាន​ខ្ជាប់​ខ្ជួន ដើម្បី​ចៀស​វាង​ការផាក​ពិន័យ​យ៉ាង​ធ្ងន់ធ្ងរ​ពី​កម្លាំង​នគរ​បាល​ចរា​ចរណ៍​ដែល​កំពុង​អនុវត្ត​ច្បាប់​នៅលើ​ផ្លូវ​ល្បឿន​លឿន ​២៤ ម៉ោង​ជា​រៀង​រាល់​ថ្ងៃ​។ លើស​ពីនេះ​ទៅទៀ​ត គឺ​ដើម្បី​សុខ​សុវត្ថិ​ភាព​ក្នុង​ការ​ធ្វើ​ដំណើរ​ទាំង​អស់​គ្នា​ផង​ដែរ​។

​បុគ្គលិក​បម្រើ​ការ​ឱ្យ​ក្រុម​ហ៊ុន​ផ្លូវ​ល្បឿន​លឿន​សុំ​មិន​បញ្ចេញ​ឈ្មោះ​បាន​ប្រាប់​ភ្នំពេញ​ប៉ុស្តិ៍​នៅ​ថ្ងៃទី​ ២៣ ​តុលា​ ថា បទ​ល្មើស និង​ភាព​មិន​ប្រក្រតី​នៅតែ​បន្ត​កើត​មាន​នៅ​លើ​ផ្លូវ​ល្បឿន​លឿន គ្រាន់តែ​អត្រា​ល្មើស​មាន​ការ​ថយចុះ​ជាង​មុន ​បើ​ធៀប​នឹង​ការ​បើក​ឱ្យ​សាក​ល្បង​នៅ​ថ្ងៃ​ដំបូងៗ​។​

​បុគ្គ​លិក​រូប​នេះ ​បាន​បន្ត​ថា ចំពោះ​ការ​តេ​មក​លេខ ​១៣៩៩ ​ដើម្បី​ស្វែងរក​ជំនួយ ​និង​សួរ​ព័ត៌មាន​ នៅតែ​មាន​ចំនួន​ច្រើន ហើយ​មាន​ការ​កើន​ឡើង​ជា​រៀង​រាល់​ថ្ងៃ ​ខណៈ​ថ្ងៃ​ចុង​សប្តាហ៍​គឺមាន​ចំនួន​ច្រើន​ជាង​គេ​ទាំង​ការធ្វើ​ចរាចរណ៍​និង​ការ​តេ​មក​ភ្នាក់​ងារ​ជួយ​សង្គ្រោះ​។​

​បុគ្គលិក​ដដែល​នេះ​បាន​បញ្ជាក់​ថា​៖ «​ក្នុង​ពេល​សាក​ល្បង​ឱ្យប្រើ​ប្រាស់​ផ្លូវ​នេះ​ ខាង​សមត្ថ​កិច្ច​ផ្លូវ​ល្បឿន​លឿន​យើង មិន​ទាន់​ផាក​ពិន័យ​ជា​ប្រាក់​ទេ គឺ​គ្រាន់​តែ​ឃាត់​ខ្លួន​ ដើម្បី​ធ្វើការ​ណែ​នាំ និង​ចុះកិច្ច​សន្យា​ព្រមាន​កុំឱ្យ​មាន​កំហុស​ជាថ្មី​។ នៅ​ពេល​ប្រកាស​ឱ្យប្រើ​ប្រាស់​ជា​ផ្លូវការ​នោះ​វិធាន​ការ​ពិន័យ​តាម​ច្បាប់​នឹង​ត្រូវបាន​អនុវត្ត​។ ដូច្នេះ​សូម​អ្នក​បើកបរ​គោរព​ច្បាប់​ឱ្យបា​ន​គ្រប់ៗ​គ្នា​»​។​

​តាម​កំណត់​ត្រា​ស្ថិតិ​យាន​យន្ត​និង​ស្ថាន​ភាព​ចរា​ចរណ៍ ដោយ​រាប់​ចាប់ពី​ថ្ងៃ​បើក​សាកល្ប​ងកាល​ពីថ្ងៃទី ​១ ខែតុលា ដល់​ថ្ងៃទី ​១៥ ​ខែតុលា ឆ្នាំ​ ២០២២ មាន​យាន​យន្ត​ចំនួន​ ១៩០ ៣៤៦ ​គ្រឿង បាន​ធ្វើ​ចរាចរ​ណ៍​លើផ្លូវ​ល្បឿន​លឿន​នេះ។​

​ក្រសួង​សាធារ​ណការ​ និង​ដឹក​ជ​ញ្ជូន បាន​អះ​អាង​ថា ស្ថិតិ​នេះគឺ​ត្រូវ​បាន​ដក​ស្រង់​ចេញពី​ច្រក​ចេញ​ចូល​នៅតាម​ស្ថា​នីយ​ទាំង ​៨ ទីតាំង​ហើយ​ករណី​គ្រោះថ្នាក់​មាន​ត្រឹមតែ ​​០,០០៤ ​ភាគរយ​ប៉ុណ្ណោះ បើ​ធៀប​នឹង​ទំហំ​ចរាច​រណ៍​ដែល​បាន​កត់ត្រា​។

​ក្រសួង​បាន​បញ្ជាក់​ថា​៖ «​ក្នុង​ចំណោម​យាន​យន្ត​ចំនួន​ជាង​១៩​ម៉ឺន​គ្រឿងដែល​បាន​ចរាចរណ៍​ក្នុង​រយៈពេល​ ១៥​ ថ្ងៃ​ចុង​ក្រោយ​នេះ មាន​ករណី​ត្រូវការ​ការប្រឹក្សា​យោ​បល់ សាក​សួរ​ព័ត៌មាន និង​ស្វែង​រក​ជំនួយ​សង្គ្រោះ​សរុប​ចំនួន​ ៥០៦​ ខ្សែ​ដែល​បាន​ទាក់​ទង​ទៅ​កាន់​លេខ​ ១៣៩៩ »​។​

​លោក គឹម បញ្ញា​ នាយក​អង្គការ​មូល​និធិ​បង្ការ​របួស​អាស៊ី ​បាន​ថ្លែង​ថា ផ្លូវ​ល្បឿន​លឿន​បាន​បើក​ឱ្យ​សាក​ល្បង​ប្រើប្រាស់​ដោយ​ឥត​គិត​ថ្លៃ​។ ប៉ុន្តែ​លោក​ថា ចំពោះ​បទ​ល្មើស​នៅលើ​ផ្លូវ​នេះគឺ​មិន​អាច​សាង​ល្បង​នោះ​ទេ ព្រោះ​អាច​នឹង​បង្ក​គ្រោះ​ថ្នាក់​ដល់​អាយុ​ជីវិត​មនុស្ស​ដែល​ទាម​ទារ​ឱ្យមាន​ការ​ពង្រឹង​ច្បាប់​និង​ត្រូវ​អនុវត្ត​ច្បាប់​ឱ្យ​បាន​ត្រឹម​ត្រូវ​ដោយ​គ្មាន​ការ​លើក​លែង​។​

​លោក​បាន​បញ្ជាក់​ថា​៖ «​ការ​អនុវត្ត​ច្បាប់​នេះមិន​គួរ​រង់ចាំ​រហូត​ទាល់តែ​ដាក់ឱ្យ​ប្រើ​ប្រាស់​ជា​ផ្លូវការ​ទេ​។គួរតែ​អនុវត្ត​រយៈ​ពេល ​១​ សប្តាហ៍​បន្ទាប់ (​ពី​ដាក់ឱ្យ​ប្រើ​ប្រាស់​) ដើម្បី​ការពារ​សុវត្ថិ​ភាព​របស់​អ្នក​បើក​បរ ​ព្រោះ​ឃើញ​ស្ថាន​ភាព​ហាក់បី​ដូចជា​គ្រោះ​ថ្នាក់​ណាស់​។ មាន​រូបភាព​ខ្លះ​ថត​ដាក់​ហ្វេ​ស​ប៊ុ​ក តិច​ទុក​ បើក​ក្នុង​ល្បឿន ​១ ​ដ៏​លឿន​មែន​ទែន ហើយ​សុទ្ធតែ​លេខ​ហុង​ស៊ុយ​ទៀត​ ១៦៨ ​អី ហើយ​ខ្លះ​លើស​ហ្នឹង​ទៀត ដែល​គេ​អនុញ្ញាត​ត្រឹម ​១២០ ​គីឡូ​ក្នុង​ ១​ ម៉ោង​ហ្នឹង​»​។

​លោក ​គឹម បញ្ញា រំពឹង​ថា ​គណៈ​គ្រប់​គ្រង​ផ្លូវនឹង​អនុវត្ត​ច្បាប់​ឱ្យបាន​តឹង​រ៉ឹង និង​ផាក​ពិន័យ​តាម​ច្បាប់​និ​ដាក់​កាមេ​រ៉ាសុវត្ថិ​ភាពឬ​មន្ត្រី​ត្រួត​ពិនិត្យ​ច្បាប់​ឱ្យបាន​ច្រើន​កន្លែង​នៅលើ​ផ្លូវ​នេះ​ និង​បាន​ស្នើឱ្យ​ពិនិត្យ​ជាថ្មី​ចំពោះ​ករណី​​ពលរដ្ឋ​ដែល​នៅតែ​យក​ម៉ូតូ​ធុន​តូច​បើក​ចូល​ក្នុង​ផ្លូវ​នេះ​ដើម្បី​ដោះ​ស្រាយ​បញ្ហា​នេះ​ឱ្យមាន​ប្រ​សិទ្ធ​ភាព​។​

​លោក​បាន​បន្ត​ថា​៖​​ «​ប្រជា​ពលរដ្ឋ​ជិះ​ម៉ូតូ​អីហ្នឹង ក៏​គួរតែ​ធ្វើការ​រឹតបន្តឹង​អនុវត្ត​ច្បាប់​ទៅលើ​ពួកគាត់​ដែរ សុំឱ្យ​អាជ្ញា​ធរ​មូល​ដ្ឋាន​និង​ក្រសួង​ពាក់​ព័ន្ធ ក៏ដូច​ជា​ក្រុមហ៊ុន​សហ​ការ​គ្នា​ផ្សព្វ​ផ្សាយ​អំពី​ទោស​ទណ្ឌ និង​បំពាក់​កាមេ​រ៉ា​កន្លែង​ដែល​មាន​បញ្ហា​ឱ្យបាន​ច្រើន​ដើម្បី​តាម​ដាន​មើល និង​រក​ដំណោះ​ស្រាយ​ ហើយ​ចាត់​វិធា​នការ​។ អាជ្ញាធរ​ក៏​គួរតែ​ពិនិត្យ​មើល​ដែរ និង​ស្វែ​រក​យល់​ ប្រសិនបើ​ករណី​ជិះ​ម៉ូតូ​ចូល​នៅ​តែ​មាន ព្រោះ​ខ្លាច​ផ្លូវ​នេះ​គាត់​ធ្លាប់ធ្វើ​ដំណើរ​រកស៊ី​ទទួ​ល​ទាន​អី យើង​ត្រូវ​ដោះ​ស្រាយ​ដោយ​បង្កើត​ផ្លូវ​ឆ្លង​កាត់​ឱ្យ​គាត់​»​។​

​ផ្លូវ​ល្បឿន​លឿន​ភ្នំពេញ​-​ព្រះ​សីហនុ​ដែល​មាន​ចម្ងាយ​ជាង​ ១៨០​ គីឡូ​ម៉ែត្រ ​ត្រូវបាន​ក្រសួង​សា​ធារណ​ការ​និង​ដឹក​ជញ្ជូន ប្រកាស​បើក​ដំណើរ​ការ​សាក​ល្បង​ដោយ​ឥតគិត​ថ្លៃ​ចាប់​ពី​ថ្ងៃទី ​១ ដល់​ថ្ងៃទី​ ៣១ ​ខែតុលាដោ​យ​អ្នក​ដំណើរ​អាច​ប្រើពេល​ប្រមាណ ​២​ ម៉ោង​ប៉ុណ្ណោះ​ពី​ភ្នំពេញ​ទៅ​ក្រុង​ព្រះ​សីហនុ ​ដែល​ខុសពី​កន្លង​មក​ត្រូវ​ចំណាយ​ពេល​ពី ៥​ ទៅ ​៦ ម៉ោង​តាម​ផ្លូវ​ជាតិ​លេខ ​៤​ ។ ចាប់​ពី​ថ្ងៃទី​ ១ ​ខែវិច្ឆិកា​តទៅ ផ្លូវ​ល្បឿន​លឿ​ន​នេះ​ នឹ​ងត្រូវ​បើក​ឱ្យប្រើ​ប្រាស់​ជា​ផ្លូវកា​រដែល​អ្ន​កបើក​បរ អាច​នឹង​ត្រូវ​ចំណាយ​ថវិកា​ចន្លោះ​ពី​ ១២​ ដុល្លារ​ដល់​ ៦០​ ដុល្លារ​ ទៅ​តាម​ប្រភេទ​យាន​យន្ត​ដែល​បាន​កំណត់​៕

វីដេអូ៖