ភ្នំពេញៈ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នឹងរៀបចំកិច្ចប្រជុំកំពូលអាជីវកម្មបរិយាប័ន្នអាស៊ានលើកទី ៥ រយៈពេល ២ ថ្ងៃ នៅខេត្តសៀមរាប។ កម្មវិធីនេះ ក៏នឹងប្រកាសផងដែរនូវម្ចាស់ពានរង្វាន់អាជីវកម្មបរិយាប័ន្នអាស៊ានឆ្នាំ ២០២២ ដើម្បីលើកស្ទួយអាជីវកម្មបរិយាប័ន្នល្អនៅបណ្តាប្រទេសសមាជិកអាស៊ាន។
អាជីវកម្មបរិយាប័ន្ន គឺជាអាជីវកម្មឈរលើគោលការណ៍ធុរកិច្ច ដែលបង្កើតដំណោះស្រាយជាប្រព័ន្ធ មានភាពច្នៃប្រឌិត និងមានទ្រង់ទ្រាយធំ ដែលឆ្លើយតបទៅនឹងបញ្ហាប្រឈមពាក់ព័ន្ធរបស់ប្រជាជនក្រីក្រ និងប្រជាជនមានចំណូលទាប (BoPនិង B40)។
សេចក្តីប្រកាសព័ត៌មានរបស់ក្រសួង បានឱ្យដឹងថា កិច្ចប្រជុំកំពូលអាជីវកម្មបរិយាប័ន្នអាស៊ានលើកទី ៥ នេះ ធ្វើឡើងនាថ្ងៃទី ២៦ និង ២៧ តុលា ក្រោមប្រធានបទ «ទាំងអស់គ្នាដើម្បីបរិយាកាសអំណោយផលសម្រាប់អាជីវកម្មបរិយាប័ន្ននៅនៅក្នុងតំបន់អាស៊ាន-Together ASEAN IBee»។
ក្រសួងបញ្ជាក់ថា៖ «កិច្ចប្រជុំកំពូលអាជីវកម្មបរិយាប័ន្នខាងលើនេះ ត្រូវបានប្រើប្រាស់ជាវេទិកាមួយ សម្រាប់កិច្ចសន្ទនារវាងភាគីពាក់ព័ន្ធនៅក្នុងតំបន់អាស៊ាន ក្នុងគោលបំណងចែករំលែកនូវគោលនយោបាយ និងផែនការលើកស្ទួយអាជីវកម្មបរិយាប័ន្ន ពិភាក្សាអំពីវឌ្ឍនភាពនៃការជំរុញអាជីវកម្មបរិយាប័ន្ន និងរួមគ្នាគាំទ្រដល់គំនិតផ្តួចផ្តើមនេះ ក៏ដូចជាស្វែងរកការគាំទ្រពីដៃគូអភិវឌ្ឍន៍នានា»។
កិច្ចប្រជុំកំពូលអាជីវកម្មបរិយាប័ន្នអាស៊ានលើកទី ៥ ត្រូវបានបង្កើតឡើង ដោយមានកិច្ចសហការ ពីលេខាធិការដ្ឋានអាស៊ាន អង្គការ United Nations Economic and Social Commission for Asia and the Pacific (ESCAP), Inclusive Business Action Network (IBAN), Organization for Economic Cooperation and Development (OECD) និងអង្គការ OXFAM។
លោក ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នឹងអញ្ជើញចូលរួមក្នុងការប្រកាសបើកកិច្ចប្រជុំកំពូលអាជីវកម្មបរិយាប័ន្នអាស៊ានលើកទី ៥ និងកម្មវិធីពានរង្វាន់អាជីវកម្មបរិយាប័ន្នអាស៊ាន ឆ្នាំ ២០២២។ ព្រឹត្តិការណ៍នេះ នឹងមានការចូលរួមពីសំណាក់ភាគីពាក់ព័ន្ធ រួមមាន មន្ត្រីជាន់ខ្ពស់រដ្ឋាភិបាល សមាគមអាជីវកម្ម វិនិយោគិន ក្រុមហ៊ុនអាជីវកម្មបរិយាប័ន្ន អ្នកសម្របសម្រួលអាជីវកម្ម និងដៃគូអភិវឌ្ឍន៍នានាពីក្នុងតំបន់អាស៊ាន និងក្រៅតំបន់។
ក្រសួងបន្ថែមថា៖ «ជាមួយគ្នានេះ កម្មវិធីពានរង្វាន់អាជីវកម្មបរិយាប័ន្នអាស៊ានឆ្នាំ ២០២២ ក៏នឹងត្រូវបានរៀបចំឡើងក្នុងគោលបំណងលើកស្ទួយអាជីវកម្មបរិយាប័ន្ននៅក្នុងបណ្តាប្រទេសសមាជិកអាស៊ាន ដែលបានប្រកាន់ខ្ជាប់គោលការណ៍អាជីវកម្មបរិយាប័ន្នបានល្អ»។
បើតាមរបៀបវារៈរបស់កម្មវិធី កិច្ចប្រជុំរយៈពេល២ថ្ងៃនេះ នឹងពិនិត្យលើវឌ្ឍនភាពក្នុងការលើកកម្ពស់ការធ្វើឱ្យប្រសើរឡើងនូវបរិយាកាសអំណោយផលសម្រាប់អាជីវកម្មបរិយាប័ន្ន ក្នុងបណ្តាប្រទេសអាស៊ាន និងពិភពលោក និងពិភាក្សាលើកិច្ចសហការក្នុងតំបន់ សម្រាប់ការជំរុញអាជីវកម្មបរិយាប័ន្ន។
ភាគីពាក់ព័ន្ធ ក៏នឹងពិភាក្សាស្វែងរកឱកាស សម្រាប់កិច្ចសហការលើឧបករណ៍គោលនយោបាយ ដើម្បីជំរុញអាជីវកម្មបរិយាប័ន្ន ដូចជាការបង្វឹកអាជីវកម្មបរិយាប័ន្ន ការវាយតម្លៃទទួលស្គាល់អាជីវកម្មបរិយាប័ន្ន និងហិរញ្ញប្បទានសម្រាប់អាជីវកម្មបរិយាប័ន្ន ព្រមទាំងសិក្សាលើអាជីវកម្មបរិយាប័ន្ន ដែលលើកកម្ពស់ដល់សេដ្ឋកិច្ចស្ត្រី ការសម្របជាមួយអាកាសធាតុ និងដំណោះស្រាយបរិស្ថាន។ បន្ថែមពីនេះ ផ្តល់ឱកាសពិភាក្សាគ្នាទៅលើគំរូអាជីវកម្មនវានុវត្តន៍ ដែលមានដំណោះស្រាយជាប្រព័ន្ធជូនដល់ប្រជាជនក្រីក្រ និងប្រជាជនមានចំណូលទាប។
ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នឹងសម្របសម្រួលការផ្លាស់ប្តូរកិច្ចសហប្រតិបត្តិការត្បូង-ត្បូង លើអាជីវកម្មបរិយាប័ន្នក្នុងបណ្តាប្រទេសមកពីតំបន់អាស៊ីខាងត្បូង និងអាស៊ីកណ្ដាល ក៏ដូចជានៅតំបន់អាហ្វ្រិកផងដែរ។
នៅឆ្នាំ ២០១៩ រាជរដ្ឋាភិបាលកម្ពុជា តាមរយៈក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានធ្វើកិច្ចសហប្រតិបត្តិការជាមួយ UNESCAP និង iBAN ដើម្បីរៀបចំរបាយការណ៍ស្ថានភាពទីផ្សារអាជីវកម្មបរិយាប័ន្ននៅកម្ពុជា។ នៅឆ្នាំ ២០២០ ក្រសួងបានគាំទ្រដល់សេចក្តីណែនាំយុទ្ធសាស្ត្រ នៃរបាយការណ៍ស្ថានភាពទីផ្សារអាជីវកម្មបរិយាប័ន្ននៅកម្ពុជា និងបានរៀបចំយុទ្ធសាស្ត្រអាជីវកម្មបរិយាប័ន្នកម្ពុជា (IBeeC Strategy)៕