ភ្នំពេញៈ លោកនាយករដ្ឋមន្ត្រី ហ៊ុន សែន បានផ្ញើសារអបអរសាទរលោក ស៊ី ជីនភីង ប្រធានាធិបតីចិន ដែលត្រូវបានជាប់ឆ្នោតសាជាថ្មី សម្រាប់អាណត្តិទី ៣ ជាអគ្គលេខាធិការគណបក្សកុម្មុយនីស្តចិន (CPC) ក្នុងសមាជជាតិរបស់គណបក្សលើកទី២០ កាលពីពេលថ្មីៗនេះ។
លោកសម្តែងសេចក្តីរីករាយក្រៃលែងដោយបានទទួលដំណឹងថា លោក ស៊ី (Xi) ត្រូវបានជាប់ឆ្នោតសាជាថ្មីជាអគ្គលេខាធិការ CPC និងបានអបអរសាទរដល់ថ្នាក់ដឹកនាំ និងសមាជិក CPC ទាំងអស់ចំពោះការបញ្ចប់ដោយជោគជ័យនៃសមាជជាតិលើកទី២០ នៃគណបក្សកុម្មុយនីស្តចិន ដែលនឹងផ្តល់កម្លាំងថ្មីដល់ការកសាងប្រទេសចិនក្លាយជាប្រទេសសង្គមនិយមទំនើប។
លិខិតចុះថ្ងៃទី ២៣ តុលា ទៅកាន់លោក Xi លោក ហ៊ុន សែន សរសេរថា៖ «ក្រោមការដឹកនាំប្រកបដោយសមត្ថភាព និងឈ្លាសវៃរបស់លោក ពិភពលោកបានសាទរចំពោះជោគជ័យដ៏ធំធេងរបស់ចិនលើការកាត់បន្ថយភាពក្រីក្រ នវានុវត្តន៍បច្ចេកវិទ្យា វឌ្ឍនភាពផ្នែកវិទ្យាសាស្ត្រ និងការកសាងសង្គមនិយមតាមលក្ខណពិសេសរបស់ចិន»។
លោក ហ៊ុន សែន ដែលជាប្រធានគណបក្សប្រជាជនកម្ពុជា (CPP) បន្ថែមថា សមិទ្ធផលជាប្រវត្តិសាស្ត្របានផ្តល់ផលប្រយោជន៍ មិនត្រឹមតែដល់ប្រជាជនចិនប៉ុណ្ណោះទេ ប៉ុន្តែក៏ដល់ពិភពលោកទាំងមូលផងដែរ។
លោកសម្តែងការជឿជាក់ថា ជាមួយចក្ខុវិស័យវែងឆ្ងាយ និងកិច្ចខិតខំប្រឹងប្រែងមិនខ្លាចនឿយហត់របស់លោក Xi ប្រទេសចិននឹងទទួលបានជោគជ័យធំធេងបន្ថែមទៀត ព្រមទាំងសម្រេចបាននូវគោលដៅ ១០០ ឆ្នាំ លើកទី២ ក៏ដូចជាសម្រេចជោគជ័យលើគោលនយោបាយ និងគោលដៅដែលដាក់ចេញដោយសមាជជាតិរបស់ CPC លើកទី២០ ។
លោកថា កម្ពុជា-ចិន មានទំនាក់ទំនងល្អប្រសើរ រីកចម្រើនជាលំដាប់ និងកិច្ចសហប្រតិបត្តិការជិតស្និទ្ធគ្រប់ជ្រុងជ្រោយ ដោយសារមិត្តភាព ប្រពៃណី និងទំនាក់ទំនងដ៏ស្និទ្ធស្នាលរបស់ CPP និង CPC។ ប៉ុន្មាន ឆ្នាំកន្លងមកនេះ CPP និង CPC បានពង្រឹងទំនាក់ទំនងមិត្តភាពដែកថែបបានធ្វើឱ្យទំនាក់ទំនង កម្ពុជា-ចិនរីកចម្រើនឥតឈប់ឈរ សម្រាប់ជាផលប្រយោជន៍ដល់ប្រជាជននៃប្រទេសទាំង ២ ។
លោកសរសេរថា៖ «ខ្ញុំទន្ទឹងរង់ចាំបន្តធ្វើការយ៉ាងជិតស្និទ្ធជាមួយឯកឧត្តម ដើម្បីពង្រឹងបន្ថែមទៀតនូវមិត្តភាពជាប្រពៃណីរវាង CPP និង CPC និងលើកកម្ពស់កិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយកម្ពុជា-ចិនទៅកាន់កម្រិតថ្មីមួយទៀត»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជាថ្លែងថា ការជាប់ឆ្នោតសាជាថ្មីរបស់លោក Xi គឺជាចំណុចល្អសម្រាប់ទំនាក់ទំនងកម្ពុជា-ចិន ដែលកាន់តែរឹងមាំស៊ីជម្រៅ៕