ភ្នំពេញៈ មូលនិធិមុទិតា និងសហភាពសហព័ន្ធយុវជនកម្ពុជា(ស.ស.យ.ក.) បានចូលរួមជាមួយរាជរដ្ឋាភិបាល និងស្ថាប័នជាតិនានា រៀបចំ ព្រះរាជកម្មវិធី «១០០ ព្រះវស្សា នៃព្រះបិតាឯករាជ្យជាតិ» ដែលគ្រោងនឹងធ្វើឡើងនារសៀលថ្ងៃទី ៣១ ខែតុលា និងទី ១ ខែវិច្ឆិកា នៅសាលមហោស្រពចតុមុខមង្គល ដែលត្រូវជាខួបគម្រប់ ១០០ ព្រះវស្សា នៃទិវាប្រសូតរបស់ព្រះបរមរតនកោដ្ឋ ប៉ុន្តែមិនមានការបើកឱ្យចូលរួមជាសាធារណៈទេ។
ព្រះរាជកម្មវិធីនេះ នឹងប្រព្រឹត្តឡើងក្រោមព្រះរាជាធិបតីដ៏ខ្ពស់ខ្ពស់ជាទីបំផុតរបស់ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និងសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជ មាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល។
យោងតាមសេចក្តីជូនដំណឹងរួមគ្នារបស់មូលនិធិមុទិតា និងស.ស.យ.ក ស្តីពីការរៀបចំព្រះរាជកម្មវិធី «១០០ ព្រះវស្សា នៃព្រះបិតាឯករាជ្យជាតិ» បានឱ្យដឹងថា ព្រះរាជពិធីនេះ ត្រូវបានរៀបចំបែងចែកជាសកម្មភាពចំនួន ៣ ធំៗដែលក្នុងនោះមានពិធីរាប់បាត្រ ការតាំងពិព័រណ៍សាទរស្នាព្រះហស្ថព្រះបរមរតនកោដ្ឋ និងទស្សនីយភាពនៃព្រះរាជកម្មវិធីនេះ។
ប្រភពដដែលបានបញ្ជាក់ថានៅថ្ងៃទី ៣១ ខែតុលា វេលាម៉ោង ៧ និង ៣០ នាទីព្រឹក នៅមណ្ឌលសួនច្បារខាងកើតវិមានឯករាជ្យ ខាងមុខព្រះបរមរូបព្រះបរមរតនកោដ្ឋ នឹងមានការយាង និងនិមន្តព្រះសង្ឃគោចរបិណ្ឌបាត្រ ចំនួន ១០០ អង្គផងដែរ។
មូលនិធិមុទិតា និងស.ស.យ.ក បានឱ្យដឹងថា៖ «ការរៀបចំព្រះរាជកម្មវិធី ១០០ ព្រះវស្សានៃព្រះបិតាឯករាជ្យជាតិនេះ ក្នុងគោលបំណងរំឭកដល់ព្រះគុណូបការៈ និងសម្តែងនូវមនោសញ្ចេតនាចងចាំជានិច្ចគ្មានថ្ងៃបំភ្លេចបាន ប្រកបដោយសេចក្តីកតញ្ញូកតវេទី ចំពោះព្រះមហាករុណាទិគុណ ដ៏ធំធេងរបស់ព្រះករុណា ព្រះមហាវីរក្សត្រ ព្រះបរមរតនកោដ្ឋ ក្នុងបុព្វហេតុទាមទារឯករាជ្យជូនប្រជាជាតិ ការកសាងជាតិ និងការបង្រួមបង្រួមជាតិ»។
ទាក់ទងនឹងព្រះរាជកម្មវិធីនេះ សម្តេចរាជបុត្រី ព្រះអនុជ នរោត្តម អរុណរស្មី ដែលជាឧត្តមប្រឹក្សាផ្ទាល់ព្រះមហាក្សត្រ និងជាព្រះស្ថាបនិកមូលនិធិមុទិតា បានលើកឡើងក្នុងកិច្ចសន្ទនាពិសេសរបស់ទូរទស្សន៍ជាតិកម្ពុជា កាលពីថ្ងៃទី ២៥ ខែតុលាថា នេះគឺជាព្រះរាជកម្មវិធីជាប្រវត្តិសាស្ត្រមួយរំឭកដល់ថ្ងៃប្រសូតគម្រប់ ១០០ ព្រះវស្សា របស់ព្រះបិតាឯករាជ្យជាតិ។
សម្តេចរាជបុត្រី ព្រះអនុជ នរោត្តម អរុណរស្មីមានបន្ទូលថា៖ «ព្រះរាជកម្មវិធីនេះ គឺខ្ញុំបានគិតគូរតាំងពីខែតុលា ឆ្នាំ ២០២១ មកម្ល៉េះ ដោយយល់ឃើញថានៅឆ្នាំ ២០២២ នេះគឺជាខួប ១០០ ព្រះវស្សារបស់ព្រះបិតា ដោយចង់រំឭកពីស្នាព្រះហស្ថវិស័យសិល្បៈ ដែលព្រះអង្គ ក្នុងព្រះជន្មគង់នៅ ព្រះអង្គតែងតែលើកស្ទួយវិស័យសិល្បៈ ក្រៅពីការដឹកនាំប្រទេសជាតិរបស់ព្រះអង្គ»។
ជាមួយគ្នានោះដែរ លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា (ស.ស.យ.ក.) ក៏បានលើកឡើងឱ្យដឹងដែរថា ស.ស.យ.ក. មានកត្តិយសដែលខាងមូលនិធិមុទិតាផ្តល់ឱកាសដ៏វិសេសវិសាលនេះក្នុងការចូលរួមរៀបចំនូវព្រះរាជកម្មវិធីជាប្រវត្តិសាស្ត្រនេះ។
លោកបានថ្លែងថា ៖«ពួកយើងនឹងធ្វើការខិតខំប្រឹងប្រែង លះបង់ និងមានការទទួលខុសត្រូវក្នុងការរៀបចំព្រះរាជពិធីនេះ ឱ្យបានស័ក្តិសមជាទម្រង់ផង ឱ្យបានជោគជ័យតាមរយៈការអនុវត្តនូវការប្រព្រឹត្តទៅដោយរលូនផង ហើយនិងអត្ថន័យនៃព្រះរាជកម្មវិធីឱ្យជ្រួតជ្រាបកាន់តែទូលំទូលាយផងដែរ»។
លោក ហ៊ុន ម៉ានី ក៏បានបញ្ជាក់ដែរថា ព្រះរាជកម្មវិធីនេះ មិនមានការចូលរួមពីសាធារណជននោះទេ ដោយសារតែទីតាំងសម្រាប់ប្រារព្ធព្រះរាជកម្មវិធីនេះមានកម្រិត ហើយព្រះរាជកម្មវិធីនេះមានការយាងចូលរួមដោយព្រះមហាក្សត្រ និងសម្តេចព្រះមហាក្សត្រី ព្រះមាតាជាតិខ្មែរ រួមនឹងថ្នាក់ដឹកនាំជាន់ខ្ពស់របស់ប្រទេសកម្ពុជា ផងដែរ។
លោកបានបន្ថែមថា ៖ «យើងសុំធ្វើការអធ្យាស្រ័យ ហើយទោះបីជាមិនមានការចូលរួមដោយផ្ទាល់ តែសុំឱ្យមានការតាមដានតាមរយៈសារព័ត៌មានផ្សេងៗនិងសូមឱ្យចូលរួមគោរព និងអបអរសាទរនៃព្រះរាជកម្មវិធី១០០ព្រះវស្សានៃព្រះបិតាឯករាជជាតិផងដែរ»។
សូមរំឭកផងដែរថា ស្ថានទូតចិនប្រចាំកម្ពុជា កាលពីថ្ងៃទី២៨ ខែកញ្ញា បានរៀបចំពិធីប្រារព្ធខួបអនុស្សាវរីយ៍លើកទី១០០ នៃការប្រសូតរបស់ព្រះករុណាព្រះបាទសម្តេចព្រះនរោត្តម សីហនុផងដែរ ដោយបានរំឭកនិងវាយតម្លៃខ្ពស់ចំពោះព្រះរាជសកម្មភាពជាប្រវត្តិសាស្ត្ររបស់ព្រះអង្គក្នុងការលើកកម្ពស់ទំនាក់ទំនងមិត្តភាពរវាងចិន-កម្ពុជា។
ជាមួយគ្នានេះដែរ ក្រុមព្រះសុរិយានឹងរៀបចំប្រារព្ធនូវកម្មវិធី «មួយម៉ឺនអាល័យ លើកទី៦» ក្រោមប្រធានបទ«ថ្វាយព្រះរាជអាល័យនិងរំឭកខួប ១០០ ព្រះវស្សា ព្រះរាជសម្ភព»នៃព្រះករុណា ព្រះបាទសម្តេច ព្រះនរោត្តម សីហនុ ព្រះមហាវីរក្សត្រ ព្រះបិតាសិល្បៈភាពយន្តខ្មែរព្រះបរមរតនកោដ្ឋជាទីគោរពសក្ការៈដ៏ខ្ពង់ខ្ពស់បំផុតផងដែរ។
កម្មវិធីនេះ នឹងប្រព្រឹត្តឡើងនៅថ្ងៃទី ២ ដល់ទី ៤ ខែវិច្ឆិកា ឆ្នាំ ២០២២ នេះ នៅសាលមជ្ឈមណ្ឌលសហប្រតិបត្តិការកម្ពុជា-កូរ៉េ (CKCC) នៅក្នុងបរិវេណនៃសាកលវិទ្យាល័យភូមិន្ទភ្នំពេញរាជធានីភ្នំពេញ ចូលទស្សនាដោយឥតគិតថ្លៃ។
ប្រធានក្រុមព្រះសុរិយាលោក យាង វណ្ឌី បានប្រាប់ថា ការរៀបចំកម្មវិធីនេះឡើងដើម្បីជាការតបស្នងព្រះមហាករុណាទិគុណដ៏ខ្ពង់ខ្ពស់បំផុតថ្វាយព្រះករុណា ព្រះបាទសម្តេចព្រះនរោត្តមសីហនុ ព្រះបិតាសិល្បៈភាពយន្តខ្មែរ៕