ភ្នំពេញៈ លោក ប៉ិច ពិសី នាយក​ប្រតិបត្តិអង្គការ​តម្លាភាព​កម្ពុជា (TI) ថ្លែងថា កម្ពុជា​បាន​និង​កំពុង​រំកិល​ខ្លួន​បន្តិច​ម្ដងៗ​ក្នុងការ​រំដោះ​ខ្លួនចេញ​ពីបញ្ជី​ប្រផេះ នៃក្រុម​ប្រទេស​មាន​ហានិភ័យ​ខ្ពស់ ខាង​អំពើលាង​លុយ​កខ្វក់​បន្ទាប់​ពីកម្ពុជា​ស្ថិត​នៅក្នុង​ពណ៌នេះ​អស់​រយៈ​ពេល​ ៣ ​ឆ្នាំជាប់គ្នា​ ពី ២០​២០ ដល់​ឆ្នាំ​ ២០២២ តាម​រយៈ​ការ​កំណត់​របស់​ក្រុម​ការ​ងារ​ហិរញ្ញ​វត្ថុ ហៅ​កាត់​ថា (FATF)។

លោក​បន្ត​ថា៖ «ការ​វិវត្ត​ជាវិជ្ជ​មាន ស្ដែង​ឡើង​តាម​រយៈ ការដាក់​ចេញ​នូវ​គោល​ការណ៍​គតិ​យុត្ត ការ​បង្កើត​អគ្គ​នាយក​ដ្ឋាន​ដែល​ដឹក​នាំប្រយុទ្ធ​ប្រឆាំង​ការ​លាង​លុយ​កខ្វក់ ការ​បង្កើត​កិច្ច​សហប្រតិ​បត្តិ​ការ​ជាលក្ខណៈ​អន្តរ​ជាតិ​ និង​ក្នុង​តំបន់​ដើម្បី​ប្រយុទ្ធ​ប្រឆាំង​ការ​លាង​លុយ​កខ្វក់ ហើយថ្មីៗ​នេះ​​មានការ​បង្កើត​គណៈកម្មការ​អន្តរ​ក្រសួង ដឹក​នាំ​ដោយ​ក្រសួង​យុត្តិធម៌​ប្រយុ​ទ្ធ​ប្រឆាំង​ការ​លាង​លុយ​កខ្វក់ ខណៈ​ដែល​អង្គភាព​ប្រឆាំង​អំពើ​ពុករលួយ​ក៏មាន​វគ្គ​បណ្ដុះ​បណ្ដាល​ និង​បង្រៀន​ពីរបៀប​ស៊ើប​អង្កេត​ដល់​នាយកដ្ឋាន​ពន្ធដារ ពីការ​ប្រយុ​ទ្ធ​ប្រឆាំង​ការលាង​លុយ​កខ្វក់​នេះ​ដែរ​»។

បើតាម​លោក ប៉ិច ពិសី ទោះជាមាន​ការរវិវត្ត​ជាវិជ្ជ​មាន ប៉ុន្តែ​កម្ពុជា​នៅធ្វើ​មិន​ទាន់​ ​អនុវត្ត​ឱ្យ​បាន​ពេញ​លេញ​តាម​អនុសាសន៍​មួយ​ចំនួន របស់​ក្រុមការ​ងារ​ហិរញ្ញ​វត្ថុ FATF នៅឡើយ​ទេ ទើប​ជាហេ​តុធ្វើឱ្យ​កម្ពុជា​ស្ថិត​នៅក្នុង​ពណ៌​ប្រផេះ។​

លោកបន្ថែ​មថា​៖ «ទោះបី​យើង​មាន​គោលការណ៍​គតិយុត្ត​ក៏ដោយ​ ប៉ុន្តែ​ការ​អនុវត្ត​ច្បាប់​នៅមាន​កម្រិត​ដូច​ជា​ការ​ស៊ើប​អង្កេត ការ​ចាប់​ខ្លួន ការ​ដាក់​ទោស​លើអ្នក​ពាក់​ព័ន្ធ​ឬជន​សង្ស័យ ទាក់​ទង​បទ​ឧក្រិដ្ឋ លាង​លុយ​យើង​នៅខ្សោយ​»។

ចំណុច​ខ្សោយ​របស់​កម្ពុជា​មួយ​ទៀត​គឺការ​ចែក​រំលែក ព័ត៌មាន​សម្ងាត់ ទាក់​ទង​បទ​ឧក្រិដ្ឋ​ទៅ​ដល់​ប្រទេស​ដទៃ ព្រោះជា​ទូទៅ​ការធ្វើ​កិច្ចការងារ​នេះ ត្រូវ​ការកិច្ច​សហ​ប្រតិប​ត្តិការ​ជាលក្ខណៈ​អន្តរ​ជាតិ ហើយ​សមត្ថ​ភាព​មន្ត្រី​កម្ពុជា​នៅមានក​ម្រិត​។

ទោះជា​យ៉ាងណាលោ​កប៉ិច ពិសី លើក​ទឹក​ចិត្ត​ដល់​រដ្ឋាភិបាល ឱ្យ​បង្កើន​ល្បឿន​បន្ថែម​ទៀត ដើម្បី​ទាញកម្ពុជា​ចេញ​ពីពណ៌​ប្រផេះ​សម្រាប់​ការវាយ​តម្លៃ​នៅឆ្នាំ​ ២០២៣ បើពុំ​ដូច្នោះទេ​​វាអាច​ប៉ះពាល់ដ​ល់ទំនុក​ចិត្ត​អ្ន​កវិ​និយោ​គនៅ​កម្ពុជា។ លោក​ថា៖ «វិស័យ​ដែល​មាន​ហានិភ័យ​ខ្ពស់​ពីអំពើ​លាង​លុយ​នេះ​រួម​មាន ល្បែង​កាស៊ី​ណូ អចលន​ទ្រព្យ ការ​វិនិយោគ​បែប​ស្រមោល​ដែល​មិន​មាន​ការ​ចុះ​បញ្ជី​ត្រឹម​ត្រូវ​»។

ការ​កត់​សម្គាល់​របស់​លោក ប៉ិច ពិសី ចំពេល​ដែល​តំណាង​មូល​និធិរូបិយ​វត្ថុអន្តរ​ជាតិ​ (IMF) កំពុង​តែចែក​រំលែក​បទ​ពិសោធ​ដល់​មន្ត្រីគយ​កម្ពុជា ពីបច្ចេក​ទេស​ស៊ើប​អង្កេត ការ​សម្អាត​ប្រាក់​និង​ហិរញ្ញប្ប​ទាន​ភេរវ​កម្ម នៅ​ក្នុង​សិក្ខាសាលារួម​គ្នា​មួយ រវាង​អគ្គនាយក​ដ្ឋាន​គយ និង​រដ្ឋាករ​កម្ពុជា និង IMF ដោយ​មាន​ការគាំទ្រ​ថវិកា​ពីរដ្ឋាភិបាល​ជប៉ុន ចាប់ពី​ថ្ងៃទី​ ២៤ ដល់​ថ្ងៃទី​ ២៨ ខែ​តុលា ឆ្នាំ ២០២២។

លោក Stephen Cox ទីប្រឹក្សា​កិច្ចការ​គយ​របស់ IMF ប្រចាំ​កម្ពុជា និង លោក Tom Hansan ទី​ប្រឹក្សា IMF ផ្នែក​កិច្ច​ការ​ប្រឆាំង​ការ​សម្អាត​ប្រាក់​និង​ហិរញ្ញប្បទាន​ភេរ​វកម្ម បាន​លើក​ប្រធាន​បទ​សំខាន់ៗ​ដូចជា​ បច្ចេកទេ​សវិភាគ និងស៊ើប​អង្កេតហិរញ្ញ​វត្ថុ ការ​រៀបចំ​ផែន​ការ​សម្រាប់​ធ្វើ​ការស៊ើប​អង្កេត ការ​កំណត់​សញ្ញាណ​បទ​ល្មើស​សម្អាត​ប្រាក់​ក្រោម​រូប​ភាពពា​ណិជ្ជកម្ម បច្ចេក​ទេស​ស៊ើប​អង្កេត និង​ចាប់​យក​ផល​នៃបទ​ល្មើស​ជាដើម។​

លោក គុណ ញឹម អគ្គនាយក​នៃ​អគ្គនាយក​ដ្ឋាន​គយនិង​រដ្ឋាករ​កម្ពុជា បាន​គូស​បញ្ជាក់​ថា ការ​ប្រឆាំ​ងកា​រ​សម្អា​ត​ប្រាក់​និង​ហិរញ្ញប្ប​ទាន​ភេរ​វកម្ម ជាអ្វីដែ​លរដ្ឋាភិបាល​កម្ពុជា មាន​ការប្ដេជ្ញាចិត្ត​ខ្ពស់​ក្នុង​ការ​អនុវត្ត​កិច្ចការ​នេះ ព្រោះ​កម្ពុជា​បានចូល​ជាសមាជិក​ក្រុម​ប្រទេស​អាស៊ីប៉ាស៊ី​ហ្វិក ស្តីពីការ​សម្អាត​ប្រាក់ (Asia/Pacific Group on Money Laundering-APG) ក្នុង​ឆ្នាំ​ ២០០៤។

តាម​រយៈ​សមា​ជិក​ភាព​នេះ កម្ពុជា​ត្រូវ​អនុវត្ត​កាតព្វ​កិច្ច​ប្រឆាំង​ការ​សម្អាត​ប្រាក់​និង​ហិរញ្ញប្ប​ទាន​ភេរវកម្ម​ជាប្រចាំ ស្រប​តាម​បញ្ហា​និងវិធាន​ការថ្មីៗ ដែល​កំណត់​ដោយ​ APG និង​ក្រុមការងារ​ហិរញ្ញ​វត្ថុ (Financial Action Task Force-FATF)។

បើនិ​យាយ​ពីយុទ្ធ​នាការ​ប្រឆាំង​ការ​លាង​លុយ​កខ្វក់​នៅកម្ពុជា​កម្ពុជា​មាន​សេចក្ដី​ព្រាងច្បាប់​ស្ដីពីការ​ប្រឆាំង​ការ​សម្អាត​ប្រាក់ និង​ហិរញ្ញប្ប​ទាន​ភេរវកម្ម ឬការ​លាង​លុយ​កខ្វក់ តាំង​ពីឆ្នាំពី​ ២០២០​ មក​ម្ល៉េះ ប៉ុន្តែ​គ្មាន​ចំណាត់​ថ្នាក់​ល្អប្រសើរ​ឡើយ​។

ដោយ​សារ​តែបែ​បនេះ លោក កើត ​រិទ្ធ រដ្ឋមន្ត្រី​ក្រសួង​យុត្តិធម៌ និង​ជាប្រធាន​អនុប្រធាន​គណៈ​កម្មា​ធិការ​សម្រប​សម្រួល​ថ្នាក់​ជាតិ​ប្រឆាំង​ការ​សម្អា​ត​ប្រាក់ និង​ហិរញ្ញប្ប​ទាន​ភេរវ​កម្ម និង​ហិរញ្ញ​ប្បទាន​​ដល់​ការ​រីកសាយ​ភាយ​អាវុធ​មហាប្រល័​យ (គ.ស.ហ) ធ្លាប់​លើក​ឡើងថា​ របៀប​របប​ការ​ងារ​មួយ​ច្បាស់លាស់​សម្រាប់​ការ​ប្រឆាំង​ការ​សម្អាត​ប្រាក់នៅ​តាម​ក្រសួ​ងស្ថា​ប័ន​នានាគឺជា​គន្លឹះ​ដើម្បី​ធានា​ប្រសិទ្ធ​ភាព និង​និរន្តរ​ភាព​នៃកា​រ​ប្រឆាំង​ការស​ម្អាតប្រាក់​នៅកម្ពុ​ជា ទាំងចំពោះ​មុខ ទាំង​សម្រាប់​រយៈពេល​វែងទៅ​ថ្ងៃ​មុខ។ ជាមួយ​គ្នា​នេះ​លោក​រដ្ឋមន្ត្រីយុត្តិ​ធម៌ តែង​រំឭក​មន្ត្រី​ក្រោម​ឱវាទ​ជាពិសេស​មន្ត្រី​តុលាការ​ត្រូវ​ពង្រឹង​ការ​ទប់​ស្កាត់​បទល្មើស​សម្អាត​ប្រាក់។

មាត្រា ១​ នៃច្បាប់​ស្ដីពីការ​ប្រឆាំងការ​សម្អាត​ប្រាក់ និង​ហិរញ្ញប្ប​ទាន​ភេរវកម្ម ដែល​​ប្រកាស​​ឱ្យ​ប្រើ​​​កាលពី​អំឡុង​​​ខែ​​មិថុនា ឆ្នាំ​ ២០២០ បាន​ចែង​ថា៖ «ច្បាប់​នេះ​មាន​គោល​បំណង​ធានាប្រ​ឆាំង​ការ​សម្អាត​ប្រា​ក់និង​ហិរញ្ញ​ប្បទា​នភេរ​វកម្ម ដោយ​កំណត់​​អំពី​វិធាន​ការ​ត្រួត​ពិនិត្យ បង្ការ ទប់​ស្កាត់ បង្ក្រាប និង​លុប​​បំបាត់​ការសម្អាត​ប្រាក់ និង​ហិរញ្ញប្ប​ទានភេ​រវកម្ម​»៕

វីដេអូ៖