ខេត្តព្រៃវែងៈ ត្រូវបានប្រកាសទទួលបានជយលាភីជាខេត្តទី២ ក្នុងការបញ្ចប់ការបន្ទោបង់ពាសវាលពាសកាល (ODF) បន្ទាប់ពីខេត្តស្វាយរៀង បានសម្រេចគោលដៅនេះដំបូងគេ ដែលមានន័យថា គ្រប់គ្រួសារសុទ្ធតែមានបង្គន់អនាម័យប្រើប្រាស់ ខណៈខេត្តកណ្តាល បានបញ្ចប់ដោយជោគជ័យ ODF ក្នុងក្របខ័ណ្ឌផ្ទៃក្នុងខេត្តបាន ១០០ ភាគរយ។
នៅថ្ងៃទី ២៥ ខែតុលា រដ្ឋបាលខេត្តព្រៃវែង បានប្រារព្ធពិធីជយលាភីខេត្តទី២ ក្នុងការបញ្ចប់ការបន្ទោបង់ពាសវាលពាសកាល ដោយមានការដង្ហែក្បួន និងជួបជុំ ដើម្បីអបអរការទទួលបានជោគជ័យនេះ ដោយមានការចូលរួមពីអង្គការជាតិ និងអន្តរជាតិ ព្រមទាំងមន្ទីរស្ថាប័នពាក់ព័ន្ធ។
ការប្រារព្វពិធីជយលាភីនេះ បានធ្វើឡើងបន្ទាប់ពីក្រសួងអភិវឌ្ឍន៍ជនបទ បានប្រកាសទទួលស្គាល់ ដែលជាផ្នែកមួយនៃកម្មវិធីលើកកម្ពស់អនាម័យជនបទកម្ពុជា (CRSHIP) ដែលអង្គការភ្លែនអន្តរជាតិ ជាទីភ្នាក់ងារប្រតិបត្តិ (EA) នៃមូលនិធិអនាម័យសកលឆ្នាំ ២០១១-២០២២ចូលរួម។
តាមរយៈជោគជ័យនេះ នឹងមានប្រជាពលរដ្ឋជាង ១ លាននាក់ ក្នុងខេត្តព្រៃវែងមកពី ១ ១៣៩ ភូមិ ១១៦ ឃុំ និង ១២ ស្រុក និងក្រុង ១ មានបង្គន់អនាម័យប្រើប្រាស់គ្រប់គ្រួសារ ដែលជាការផ្លាស់ប្តូរវិជ្ជមានរបស់ខេត្តក្នុងការបញ្ចប់ការបន្ទោបង់ពាសវាលពាសកាល (ODF)។ នេះបើតាមអង្គការភ្លែនអន្តរជាតិកម្ពុជា។
អង្គការភ្លែនអន្តរជាតិកម្ពុជា បានឱ្យដឹងបន្ថែមថា ខេត្តព្រៃវែងស្ថិតក្នុងចំណោមខេត្តទាំង ១១ ដែល CRSHIP ចាប់ផ្តើមធ្វើការដោយមានការគ្របដណ្តប់អនាម័យតិចជាង ៥០ ភាគរយ។ កម្មវិធីនេះលើកកម្ពស់ការប្រើប្រាស់បង្គន់អនាម័យជាប្រចាំ ការលាងដៃជាមួយសាប៊ូ និងទឹកស្អាតដោយសុវត្ថិភាព តាមរយៈអនាម័យសរុបដែលដឹកនាំដោយសហគមន៍ ការលាងសម្អាតនៅក្នុងសាលារៀន និងការពង្រឹងសមត្ថភាពរបស់រដ្ឋាភិបាល អាជ្ញាធរមូលដ្ឋាន និងអង្គការក្រៅរដ្ឋាភិបាល ដើម្បីលើកកម្ពស់ការអនុវត្តអនាម័យ ឱ្យបានកាន់តែប្រសើរឡើង។
អង្គការភ្លែនអន្តរជាតិកម្ពុជា រំពឹងថា ខេត្តត្រូវបន្តធ្វើបច្ចុប្បន្នភាពទិន្នន័យ និងពង្រឹងកិច្ចសហប្រតិបត្តិការគ្រប់កម្រិត រួមមានអាជ្ញាធរ ស្ថាប័នពាក់ព័ន្ធ វិស័យឯកជន និងដៃគូអភិវឌ្ឍន៍ ដើម្បីសម្រួលដល់សកម្មភាពអភិវឌ្ឍន៍មូលដ្ឋាន ជាពិសេសដើម្បីធានានិរន្តរភាពនៃ ODF នៅគ្រប់ស្រុក និងឃុំ ដើម្បីសម្រេចបាន ODF កម្រិតខ្ពស់ បន្ថែមទៀត។
លោក យី គឹមថាន នាយករងប្រចាំប្រទេសអង្គការភ្លែនអន្តរជាតិកម្ពុជា មានប្រាប់ ភ្នំពេញ ប៉ុស្តិ៍ នៅថ្ងៃទី ២៥ តុលាថា សមិទ្ធផលនេះត្រូវបានគាំទ្រដោយភាគីពាក់ព័ន្ធជាច្រើន ដោយធ្វើការយកចិត្តទុកដាក់នៅរាល់កម្រិតផ្សេងៗគ្នា ជាច្រើនឆ្នាំមកហើយ ដើម្បីបង្កើតការរៀបចំស្ថាប័នអនុវត្តប្រព័ន្ធត្រួតពិនិត្យអនាម័យ បង្កើតការចូលរួមសហគមន៍ បង្កើតទីផ្សារអនាម័យ ឧបត្ថម្ភធនដល់គ្រួសារក្រីក្រ និងអ្នកងាយរងគ្រោះ។ លោកថា តួនាទីរបស់រាជរដ្ឋាភិបាលកម្ពុជា ជាពិសេសក្រសួងអភិវឌ្ឍន៍ជនបទ រដ្ឋបាលខេត្ត មន្ទីរអភិវឌ្ឍន៍ជនបទ អាជ្ញាធរស្រុក អាជ្ញាធរឃុំ និងភូមិ មានសារៈសំខាន់ណាស់ក្នុងការធានាបានជោគជ័យនេះនៅខេត្តព្រៃវែង និងខេត្តដទៃៗទៀត។
លោកបញ្ជាក់ថា៖ «ការផ្លាស់ប្តូរទម្លាប់ និងការអនុវត្តនូវទម្លាប់ថ្មីមិនងាយស្រួលនោះទេ វាពិតជាមានសារៈសំខាន់ខ្លាំងណាស់។ ការបញ្ចប់ការបន្ទោបង់ពាសវាលពាសកាល កាត់បន្ថយជំងឺកុមារ និងកង្វះអាហារូបត្ថម្ភដែលជះឥទ្ធិពលដល់ការអភិវឌ្ឍ ការរៀនសូត្ររបស់កុមារ និងឱកាសសេដ្ឋកិច្ចនៅពេលខាងមុខ។ ជាពិសេសសម្រាប់ក្មេងស្រី និងស្ត្រីជួយលុបបំបាត់នូវឧបសគ្គចំពោះសេចក្តីថ្លៃថ្នូរ និងកាត់បន្ថយហានិភ័យនៃគ្រោះថ្នាក់នៅពេលធ្វើដំណើរផ្លូវឆ្ងាយ ឬនៅពេលយប់»។
បន្ថែមពីនេះលោក យី គឹមថាន បានលើកឡើងទៀតថា ការប្រកាសពីភាពជោគជ័យរបស់ខេត្តព្រៃវែង គឺជាជំហានទី២ បន្ទាប់ពីខេត្តស្វាយរៀង បានទទួលជោគជ័យនេះក្នុងការបញ្ចប់ការបន្ទោបង់ពាសវាលពាសកាល (ODF) ជាលើកដំបូង ហើយក្រសួងអភិវឌ្ឍន៍ជនបទ គ្រោងនឹងធ្វើឱ្យសម្រេចបាននូវខេត្តគោលដៅចំនួន ៣ ផ្សេងទៀត គឺខេត្តកណ្តាល ខេត្តកំពង់ឆ្នាំង និងខេត្តកំពង់ស្ពឺ នៅឆ្នាំ ២០២៣ ខាងមុខ។
លោកបញ្ជាក់បន្ថែមថា៖ «សម្រាប់គោលដៅអង្គការភ្លែនវិញ ក្រៅពីចូលរួមជាមួយក្រសួងដើម្បីធ្វើឱ្យប្រសើរឡើងនូវការបន្ទោបង់នេះ អង្គការភ្លែនក៏មានខេត្តចំនួន៣ទៀតដូចជា ខេត្តរតនគីរី ស្ទឹងត្រែង និងខេត្តសៀមរាប ដើម្បីធ្វើការគាំទ្រឱ្យខេត្តទាំងអស់នោះបញ្ឈប់ការបន្ទោបង់ពាសវាលពាសកាល»។
ពាក់ព័ន្ធនឹងការបញ្ចប់ការបន្ទោបង់ពាសវាលពាសកាលនេះ កាលពីថ្ងៃទី ២៤ ខែតុលា ឆ្នាំ ២០២២ រដ្ឋបាលខេត្តកណ្តាល ក៏បានប្រកាសដែរថា ខេត្តនេះបានសម្រេចបញ្ចប់ការបន្ទោរបង់ពាសវាលពាសកាល (ODF) ក្នុងក្របខ័ណ្ឌផ្ទៃក្នុងខេត្តបាន ១០០ ភាគរយ។
មន្ទីរអភិវឌ្ឍន៍ជនបទខេត្តកណ្តាលបានឱ្យដឹងថា ស្ថានភាពអនាម័យបរិស្ថាននៅក្នុងខេត្តឆ្នាំ ២០២២ ជាក់ស្ដែង តាមខ្នងផ្ទះ មានបង្គន់ប្រើប្រាស់ ១០០ ភាគរយ ក្នុងនោះខ្នងផ្ទះប្រើបង្គន់ផ្ទាល់ខ្លួនមាន ៩៥,៤ភាគរយ និងខ្នងផ្ទះប្រើបង្គន់រួមគ្នា មាន ៤,៦ ភាគរយ។ ដោយឡែកចំពោះមូលដ្ឋានក្រុង ស្រុក គឺខេត្ត សម្រេចបញ្ចប់ការបន្ទោបង់ ពាសវាលពាសកាល (ODF) ១០០ ភាគរយក្នុងចំណោម ១១ ក្រុង-ស្រុក មាន ១២៧ ឃុំ-សង្កាត់ ស្មើនឹង ១ ០១០ ភូមិ។
លោក គង់ សោភ័ណ្ឌ អភិបាលខេត្តកណ្តាលបាននិយាយថា នេះគឺជាការប្រឹងប្រែងរបស់ក្រុមការងារ បច្ចេកទេស ជំនាញ អាជ្ញាធរ គ្រប់មូលដ្ឋាន ស្ថាប័នពាក់ព័ន្ធ បានចូលរួម សហការគ្នា ធ្វើឱ្យសម្រេចបាននូវការបញ្ចប់ការបន្ទោបង់ ពាសវាលពាសកាល (ODF) ក្នុងក្របខ័ណ្ឌ ផ្ទៃក្នុងខេត្តបាន ១០០ ភាគរយ។
ក្នុងនោះ លោកក៏បានណែនាំបន្ថែមថា៖ «អាជ្ញាធរគ្រប់មូលដ្ឋាន គ្រប់ស្ថាប័ន ត្រូវអប់រំផ្សព្វផ្សាយនៅតាមសា្ថប័ន សហគមន៍ សាលារៀន មន្ទីរពេទ្យ វត្តអារាម និងកន្លែងផ្តល់សេវាកម្មផ្សេងៗទៀតឱ្យបានទូលំទូលាយ ដោយប្រកាន់ខ្ជាប់ អនាម័យ បរិស្ថានស្អាត និងត្រូវចេះវេចខ្ចប់សំរាម កាកសំណល់រឹងឱ្យបានត្រឹមត្រូវ និងមានធុងសំរាម ចៀសវាង ការចោលសំរាមពាសវាលពាសកាល»៕