ពោធិ៍សាត់ៈ លោកនាយករដ្ឋមន្ត្រី ហ៊ុន សែន អំពាវនាវដល់ព្រះសង្ឃ និងប្រជាពលរដ្ឋងើបឈរប្រឆាំង «ជនក្បត់ជាតិ» ដែលលោកចង់សំដៅលោក សម រង្ស៊ី ប្រធានស្តីទីអតីតគណបក្សសង្គ្រោះជាតិដោយលោកលើកឡើងថា ជននេះបានប្រមាថព្រះមហាក្សត្រ។
លោកអំពាវនាវដូច្នេះ ក្នុងពិធីផ្តល់ស្រូវពូជប្រមាណជាង ៥១ ម៉ឺនគីឡូក្រាម ដល់កសិករប្រមាណជាង ៥ ០០០ គ្រួសារ ដែលរងគ្រោះដោយសារគ្រោះទឹកជំនន់ នៅខេត្តពោធិ៍សាត់ កាលពីថ្ងៃទី ២៥ ខែតុលា។
លោក ហ៊ុន សែន ថ្លែងថា៖ «២ ថ្ងៃមុននេះគេមិនត្រឹមតែជេរត្រឹមខ្ញុំទេ គេជេរព្រះមហាក្សត្ររបស់យើង។ ដូច្នេះ ខ្ញុំអំពាវនាវចំពោះប្រជាពលរដ្ឋទាំងអស់ ទាំងព្រះសង្ឃទាំងគ្រហស្ថងើបឈរឡើង ដើម្បីប្រឆាំងជនក្បត់ជាតិហើយនិងបក្សណាដែលផ្សារភ្ជាប់ជាមួយជនក្បត់ជាតិនេះ ដើម្បីធានាការពាររាជានិយម ការពាររាជបល្ល័ង្ក ការពារព្រះមហាក្សត្រការពារឯកភាព សន្តិភាពនៃទឹកដីរបស់យើង»។
លោក ហ៊ុន សែន បន្តថា អ្នកទាំងឡាយដែលផ្សារភ្ជាប់ខ្លួនជាមួយនឹងគណបក្សដែលលោកហៅថា «គណបក្សក្បត់ជាតិក្បត់សាសនា ក្បត់ព្រះមហាក្សត្រ» គួរតែផ្តាច់ខ្លួនចេញពី «ក្រុមជនក្បត់ជាតិ» ដោយលោកបានព្រមានថា បើមិនដូច្នោះអ្នកទាំងនោះអាចទទួលរងនូវផលវិបាកផ្សេងៗ។
លោកថា នេះមិនមែនជាការគំរាមកំហែងនោះទេ ប៉ុន្តែវាជារឿងពិត ព្រោះនៅក្នុងប្រទេសមួយមិនអាចអនុញ្ញាតឱ្យមាន «បក្សក្បត់ជាតិ» បានទេ។
លោក ហ៊ុន សែនបានថ្លែងថា គណបក្សណាដែលផ្សារភ្ជាប់ខ្លួនជាមួយ «ជនក្បត់ជាតិ» ដែលលោកចង់សំដៅលោក សម រង្ស៊ី ចាំបាច់ត្រូវតែពិនិត្យមើលដោយតុលាការ ហើយរដ្ឋាភិបាលរបស់លោក ក៏មិនទុកឱ្យ «ជនក្បត់ជាតិនេះ» នៅបន្តការរំខាននោះទេ ដោយលោកបញ្ជាក់ថា៖ «បើជេរត្រឹមតែនាយករដ្ឋមន្ត្រី វាមិនអីទេ ក៏ប៉ុន្តែកាលពីប៉ុន្មានថ្ងៃកន្លងមកវាជេរមហាក្សត្រ។ ឥឡូវវាជេរមហាក្សត្រទៀត ហើយរហូតវាប្រើពាក្យថា មហាក្សត្រគ្មានមនសិការជាតិសូម្បីតែបន្តិច»។
លោក ហ៊ុន សែន បានអំពាវនាវដល់អ្នកដែលរស់នៅក្នុងគណបក្សមួយ ដែលលោកមិនបញ្ចេញឈ្មោះ ហើយបានផ្សារភ្ជាប់ជាមួយនឹងលោក សម រង្ស៊ី ដែលលោកហៅថា «ជនក្បត់ជាតិ ៣ ជំនាន់» ឱ្យប្រញាប់ផ្តាច់ខ្លួនចេញហើយទៅចូលរួមជាមួយបក្សនយោបាយផ្សេងៗ ដោយកុំនៅជាមួយបក្សនេះ។ តែបើនៅជាមួយបក្សនេះ គឺមានហានិភ័យដែលនឹងឈានទៅដល់ការអនុវត្តច្បាប់ ប្រសិនបើរកឃើញថា មានទំនាក់ទំនងជាមួយលោក សម រង្ស៊ី។
លោក មាជ សុណ្ណារ៉ា មន្ត្រីជាន់ខ្ពស់នៃអតីតគណបក្សសង្គ្រោះជាតិ យល់ថា ចំណាត់ការរបស់រដ្ឋាភិបាល លើករណីលោក សម រង្ស៊ី ជុំវិញការប៉ុនប៉ងធ្វើការផ្តួលរំលំរដ្ឋាភិបាល ឬការប្រមាថព្រះមហាក្សត្រជាដើមនេះ ជារឿងត្រឹមត្រូវក្នុងនាមជារដ្ឋាភិបាលហើយ ប៉ុន្តែរដ្ឋាភិបាលមិនចាំបាច់ធ្វើការអំពាវនាវដល់ពលរដ្ឋ និងព្រះសង្ឃឱ្យមកពាក់ព័ន្ធនឹងកិច្ចការនេះឡើយ ដែលលោកថា ហាក់ជារឿងមិនសមហេតុសមផល។
លោក មាជ សុណ្ណារ៉ា ថា៖ «វាជារឿងហួសហេតុដែលរដ្ឋាភិបាល ចង់ឱ្យប្រជាពលរដ្ឋ និងស្ថាប័នព្រះសង្ឃ បន្ទរលើចំណាត់ការរបស់ខ្លួន ដែលវាហាក់បង្ហាញពីគំនុំនយោបាយច្រើនជាងទិដ្ឋភាពច្បាប់ ព្រោះចំណាត់ការរដ្ឋាភិបាលវាគ្រប់គ្រាន់ទៅហើយ»។
ពាក់ព័ន្ធនឹងបញ្ហានេះដែរ លោក ឈត ប៊ុនថង មន្ត្រីស្រាវជ្រាវផ្នែកអប់រំ សីលធម៌សង្គមនៃរាជបណ្ឌិត្យសភាកម្ពុជាបានបញ្ជាក់ថា ក្នុងកិច្ចការនយោបាយ គេមិនត្រូវយកតួអង្គព្រះមហាក្សត្រមកពាក់ព័ន្ធនោះឡើយ។
លោក ឈត ប៊ុនថង អំពាវនាវដល់អ្នកនយោបាយនានា ពិចារណាមុនថ្លែងសារនយោបាយណាមួយ ដែលចៀសវាង បង្កទំនាស់ និងភាពប្រេះឆាគ្នានៅក្នុងសង្គម។ លោកថ្លែងថា៖ «អ្នកនយោបាយត្រូវដោះស្រាយជាមួយអ្នកនយោបាយគ្នាឯងទៅ ហើយផ្លូវច្បាប់ត្រូវដោះស្រាយតាមផ្លូវច្បាប់ កុំយកមកឡូកឡំគ្នា»។
យ៉ាងណាក្តីលោក ផៃ ស៊ីផាន អ្នកនាំពាក្យរដ្ឋាភិបាលបានចាត់ទុកការអំពាវនាវរបស់លោកនាយករដ្ឋមន្ត្រីក្នុងការហៅឱ្យពលរដ្ឋ និងព្រះសង្ឃទូទាំងប្រទេស ងើបឡើងប្រឆាំងលោក សម រង្ស៊ី នេះថា ជារឿងត្រឹមត្រូវមួយក្នុងការបង្ហាញទៅកាន់សាធារណជនថា ស្ថាប័នរដ្ឋាភិបាល គោរព និងការពារយ៉ាងម៉ឺងម៉ាត់ ចំពោះស្ថាប័នអង្គព្រះមហាក្សត្រ ស្ថាប័នរាជានិយមកម្ពុជា ដែលមិនអនុញ្ញាតឱ្យមានការប្រមាថ ឬជាន់ឈ្លីណាមួយឡើយ។
លោកបានថ្លែងថា៖ «វាជាការបង្ហាញពីកាតព្វកិច្ចរបស់រដ្ឋាភិបាលក្នុងការពាររបបរាជានិយម ដូចអ្វីដែលបានចែងក្នុងរដ្ឋធម្មនុញ្ញជាតិ»។
លោក ផៃ ស៊ីផាន បន្ថែមថា សម្រាប់ការអំពាវនាវនេះមិនត្រឹមតែស្ថាប័នរាជរដ្ឋាភិបាលប៉ុណ្ណោះទេ ដែលមានតួនាទីការពារអង្គព្រះមហាក្សត្រ និងរបបរាជានិយមចំណែកប្រជាពលរដ្ឋ និងព្រះសង្ឃក៏មានកាតព្វកិច្ចការពារផងដែរ។
ចំណែកលោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជាប្រាប់ ភ្នំពេញ ប៉ុស្តិ៍ថា លោក សម រង្ស៊ី បាននិយាយប្រមាថព្រះមហាក្សត្រ ហើយ «ការប្រមាថដ៏ធ្ងន់ធ្ងរ» របស់លោក សម រង្ស៊ី ចំពោះព្រះមហាក្សត្រជាទង្វើក្បត់ជាតិ សាសនា និងព្រះមហាក្សត្រ ដែលប្រជាជាតិខ្មែរមិនអាចទទួលយកបានឡើយ។
លោកថ្លែងថា៖ «ដូច្នេះ ទង្វើនៃការប្រមាថដ៏ធ្ងន់ធ្ងររបស់លោក សម រង្ស៊ី ចំពោះអង្គព្រះមហាក្សត្រ ជាទង្វើក្បត់ជាតិ ដែលមិនអាចអត់ឱនឱ្យបានជាដាច់ខាត ហើយត្រូវតែផ្តន្ទាទោសឱ្យធ្ងន់ធ្ងរបំផុតតាមផ្លូវច្បាប់ជាធរមាន»។
លោក គិន ភា បន្ថែមថា៖ «ប្រជាជនខ្មែរទូទាំងនគរគោរពស្រឡាញ់អង្គព្រះមហាក្សត្រ និងចាត់ទុកព្រះអង្គជាម្លប់ដ៏ត្រជាក់ សម្រាប់កូនចៅបណ្តាប្រជានុរាស្ត្រខ្មែរទូទាំងនគរ។ ដូច្នេះ បុគ្គលដែលប្រមាថចំពោះអង្គព្រះមហាក្សត្រ គឺជាបុគ្គលជាន់ឈ្លី និងប្រមាថចំពោះប្រជាជនទូទាំងនគរ គឺជារឿងដែលឈឺចាប់បំផុត សម្រាប់ប្រជាជនទូទាំងនគរ»។
គួររំឭកថា កាលពីថ្ងៃទី ២៤ ខែតុលា ឆ្នាំ ២០២២ ក្រសួងយុត្តិធម៌កម្ពុជា បានចេញញត្តិថ្កោលទោស ដែលបានអំពាវនាវដល់អាជ្ញាធរមានសមត្ថកិច្ច ចាត់វិធានការច្បាប់ឱ្យបានម៉ឺងម៉ាត់ទៅលើលោក សម រង្ស៊ី ចំពោះការប្រមាថលើព្រះករុណាព្រះបាទនរោត្តម សីហមុនី ហើយនិងមានសេចក្តីថ្លែងការណ៍ថ្កោលទោសជាលក្ខណៈបុគ្គល និងស្ថាប័នរដ្ឋនានាជាបន្តបន្ទាប់លើករណីនេះ៕