ភ្នំពេញៈ គិតមកដល់ពេលនេះ មានប្រជាពលរដ្ឋជាង ១២ លាននាក់ បានទទួលអត្តសញ្ញាណប័ណ្ណ ក្នុងនោះអត្តសញ្ញាណប័ណ្ណត្រូវផុតសុពលភាពនាចុងឆ្នាំ ២០២២ មានជាង ៨០ ម៉ឺននាក់ ហើយមន្ត្រីអគ្គនាយកដ្ឋានអត្តសញ្ញាណកម្ម អំពាវនាវដល់ពលរដ្ឋដែលកាន់អត្តសញ្ញាណប័ណ្ណហួសសុពលភាពប្រញាប់ទៅបន្តសុពលភាពថ្មី។
ទិន្នន័យនេះត្រូវបានដាក់បង្ហាញនៅក្នុងកិច្ចប្រជុំស្ដាប់របាយការណ៍ស្ដីពីអត្តសញ្ញាណប័ណ្ណ ដែលផុតសុពលភាព ដែលដឹកនាំដោយរដ្ឋមន្ត្រីក្រសួងមហាផ្ទៃ លោក ស ខេង និងមានការចូលពីលោក សក់ សេដ្ឋា រដ្ឋលេខាធិការប្រចាំការក្រសួងមហាផ្ទៃ លោក នេត សាវឿន អគ្គស្នងការនគរបាលជាតិ និងលោក កង សាខន អគ្គនាយកនៃអគ្គនាយកដ្ឋានអត្តសញ្ញាណកម្ម កាលពីថ្ងៃទី ២៥ ខែតុលា ឆ្នាំ ២០២២ ។
នាពិធីនោះ លោក ស ខេង បានគូសបញ្ជាក់ថា កិច្ចប្រជុំនេះគឺជាកិច្ចការចាំបាច់ ដើម្បីស្ដាប់របាយការណ៍ និងរកដំណោះស្រាយ ប្រសិនបើមានបញ្ហាប្រឈម ទាក់ទងនឹងការផុតសុពលភាពអត្តសញ្ញាណប័ណ្ណ ស្របពេលគណៈកម្មាធិការជាតិរៀបចំការបោះឆ្នោតកំពុងដំណើរការចុះឈ្មោះបោះឆ្នោត។
លោក កង សាខន អគ្គនាយកនៃអគ្គនាយកដ្ឋានអត្តសញ្ញាណកម្ម បានឱ្យដឹងថា គិតមកដល់ពេលនេះ មានប្រជាពលរដ្ឋជាង ១២ លាននាក់បានទទួលអត្តសញ្ញាណប័ណ្ណ ក្នុងនោះអត្តសញ្ញាណប័ណ្ណត្រូវផុតសុពលភាពនាចុងឆ្នាំ ២០២២ មានជាង ៨០ ម៉ឺននាក់ ខណៈជាមធ្យមបានផ្ដល់អត្តសញ្ញាណប័ណ្ណជូនពលរដ្ឋប្រមាណ ៣ ពាន់នាក់ក្នុង ១ ថ្ងៃ។
លោកបន្តថា៖ «ចំនួនអត្តសញ្ញាណប័ណ្ណផុតសុពលភាពអាចបន្តកើនឡើងដល់ច្រើនជាង ១ លាននាក់ បើគិតដល់ខែកក្កដា ឆ្នាំ ២០២៣ និងថា ក្នុងចំណោមប្រជាពលរដ្ឋមានអត្តសញ្ញាណប័ណ្ណត្រូវផុតសុពលភាពនាពេលខាងមុខនោះ មួយចំនួនបានទទួលមរណភាពមួយចំនួនជាប់ពន្ធនាគារ និងមួយចំនួនធំបានធ្វើចំណាកស្រុក»។
សម្រាប់វិធានការដោះស្រាយចំពោះមុខនេះលោក កង សាខន បានជំរុញដល់អាជ្ញាធរគ្រប់ជាន់ថ្នាក់ ធ្វើការផ្សព្វផ្សាយឱ្យប្រជាពលរដ្ឋនៅគ្រប់មូលដ្ឋានរាជធានីខេត្ត ក្រុង ស្រុក ខណ្ឌ ឃុំ សង្កាត់ ដើម្បីឱ្យពលរដ្ឋបានដឹងថា អត្តសញ្ញាណប័ណ្ណដែលខ្លួនកំពុងប្រើប្រាស់នោះជិតអស់សុពលភាព ហើយចូលរួមបំពេញនីតិវិធីធ្វើអត្តសញ្ញាណប័ណ្ណថ្មីឡើងវិញ។
សេចក្តីជូនដំណឹងរបស់អគ្គនាយកដ្ឋានអត្តសញ្ញាណកម្ម ចុះថ្ងៃទី ២១ ខែតុលាបានឱ្យដឹងថា អត្តសញ្ញាណប័ណ្ណសញ្ញាតិខ្មែរគំរូថ្មី មានសុពលភាពត្រឹមរយៈពេល ១០ ឆ្នាំ គិតចាប់ពីថ្ងៃផ្តល់។ ដូច្នេះ អត្តសញ្ញាណប័ណ្ណដែលបានផ្តល់ជូនប្រជាពលរដ្ឋតាំងពីខែមិថុនាឆ្នាំ ២០១២ បានអស់សុពលភាពប្រើប្រាស់ជាបណ្តើរៗចាប់ពីខែមិថុនា ឆ្នាំ ២០២២ នេះតទៅ។
ដើម្បីធានានូវសិទ្ធិក្នុងការទទួលបានសេវាផ្សេងៗ ជាពិសេសសិទ្ធិនយោបាយក្នុងការប្រើប្រាស់ អត្តសញ្ញាណប័ណ្ណសញ្ជាតិខ្មែរ សម្រាប់កាន់ទៅបោះឆ្នោតជ្រើសតាំងតំណាងរាស្ត្រនីតិកាលទី ៧ ឆ្នាំ ២០២៣ ខាងមុខ អគ្គនាយកដ្ឋានអត្តសញ្ញាណកម្មអំពាវនាវដល់ប្រជាពលរដ្ឋដែលមានអត្តសញ្ញាណប័ណ្ណសញ្ជាតិខ្មែរគំរូថ្មីអស់សុពលភាព ឬសុពលភាពនៅសល់តិចជាង ឬត្រឹមរយៈពេល ៩០ ថ្ងៃ សូមអញ្ជើញទៅបំពេញបែបបទប្តូរយកអត្តសញ្ញាណប័ណ្ណសញ្ជាតិខ្មែរថ្មី នៅតាមបណ្តាប៉ុស្តិ៍នគរបាលរដ្ឋបាលឃុំ សង្កាត់ ឬអធិការដ្ឋាននគរបាលក្រុង ស្រុក ខណ្ឌ ឬច្រកចេញចូលតែមួយក្រុង ស្រុក ខណ្ឌ ឬស្នងការដ្ឋាននគរបាលរាជធានី-ខេត្ត។
គណៈកម្មាធិការជាតិរៀបចំការបោះឆ្នោត គជប បានឱ្យដឹងថា ការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ ២០-២២ មានរយៈពេល ៥០ ថ្ងៃ ចាប់ពីថ្ងៃទី ២០ ខែតុលា រហូតដល់ថ្ងៃទី ៨ ខែធ្នូ ឆ្នាំ ២០២២។
ទាក់ទងនឹងការចុះឈ្មោះបោះឆ្នោតលោក សោម សូរីដា អ្នកនាំពាក្យ គជប ថ្លែងថា សម្រាប់រយៈពេល ៤ ថ្ងៃនៃដំណើរការពិនិត្យបញ្ជីឈ្មោះ និងការចុះឈ្មោះបោះឆ្នោត គឺកិច្ចការនេះបានដំណើរការទៅដោយរលូនល្អ ក្នុងបរិយាកាសសុខសុវត្ថិភាព និងមានសណ្តាប់ធ្នាប់សាធារណៈល្អ។ លោកថា៖ «ក្នុងរយៈពេល ៤ ថ្ងៃគឺចាប់ពីថ្ងៃទី ២០ រហូតមកដល់ថ្ងៃទី ២៣ ខែតុលា គជប បានចុះឈ្មោះបោះឆ្នោតសរុបចំនួន ៦៤ ៣២៥ នាក់ (ស្រី ៣២ ៦៦៨ នាក់)»។
ទន្ទឹមនឹងការចុះឈ្មោះបោះឆ្នោតជូនប្រជាពលរដ្ឋនេះដែរ គជប ក៏បានធ្វើបច្ចុប្បន្នភាពបញ្ជីឈ្មោះបោះឆ្នោត ដែលនៅក្នុងនោះក៏មានការលុបឈ្មោះចេញពីបញ្ជីឈ្មោះបោះឆ្នោតសរុបចំនួន ២៩ ២០៦ នាក់ ហើយប្រជាពលរដ្ឋដែលមកកែតម្រូវទិន្នន័យក្នុងបញ្ជីបោះឆ្នោតមានចំនួន ៣ ៥៣២ នាក់។ ចំណែកប្រជាពលរដ្ឋដែលបានផ្លាស់លំនៅចូលក្នុងឃុំសង្កាត់ថ្មី ដែលពីមុននៅក្នុងឃុំសង្កាត់ចាស់មានចំនួន ១៩ ២២០ នាក់៕