ភ្នំពេញៈ គិតមកទល់ពេលនេះ មានថវិកាសរុបជាង ៨០០ លានដុល្លារអាមេរិក ត្រូវបានរាជរដ្ឋាភិបាលកម្ពុជាផ្តល់ជូនប្រជាពលរដ្ឋ តាមរយៈកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធនឹងជំងឺកូវីដ ១៩ ដែលការអនុវត្តរហូតមកទល់ពេលនេះមានចំនួន ១០ ជុំ ២៨ លើករួចមកហើយ ដែលមានប្រជាពលរដ្ឋជាង ៧០ ម៉ឺនគ្រួសារបានទទួល។
ក្រសួងសង្គមកិច្ច អតីតយុទ្ធជន និងយុវនីតិសម្បទា បានឱ្យដឹងកាលពីថ្ងៃទី ២៤ ខែតុលា ថា ចាប់ពីខែមិថុនា ឆ្នាំ ២០២០ រហូតដល់មកទល់ខែតុលា ឆ្នាំ ២០២២ នេះ រាជរដ្ឋាភិបាលកម្ពុជាបានចំណាយថវិកាសរុបលើការអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះនេះ មានចំនួនជាង ៣ ៣៤៨ លានរៀល ឬស្មើនឹងជាង ៨០០ លានដុល្លារអាមេរិក។
ក្រសួងបានបញ្ជាក់ឱ្យដឹងថាគ្រួសារដែលទទួលបានប្រាក់ឧបត្ថម្ភនេះមានប្រភេទគ្រួសារក្រីក្រកម្រិត ១ និងកម្រិត ២ ដែលរស់នៅទីប្រជុំជនក្នុងរាជធានី នៅទីប្រជុំជនក្រៅរាជធានី និងនៅតាមទីជនបទ ដែលមានជាង ៧០ ម៉ឺនគ្រួសារ ឬជិត ៣ លាននាក់។
រាជរដ្ឋាភិបាលកម្ពុជា កាលពីថ្ងៃទី ៥ ខែតុលា បានប្រកាសបន្តការអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ ១៩ និងការដាក់ឱ្យដំណើរការកម្មវិធីឧបត្ថម្ភសាច់ប្រាក់ដល់គ្រួសារងាយរងហានិភ័យ ដើម្បីឆ្លើយតបនឹងសម្ពាធអតិផរណា។
លោកនាយករដ្ឋមន្ត្រី ហ៊ុន សែន បានលើកឡើងថា រាជរដ្ឋាភិបាលកម្ពុជាបានកំណត់អាទិភាពនៃវិធានការអន្តរាគមន៍ជំនួយសង្គមសំដៅបន្តគាំពារ និងរក្សាលំនឹងជីវភាពរស់នៅរបស់ប្រជាពលរដ្ឋក្នុងគ្រួសារក្រីក្រ និងងាយរងគ្រោះព្រមទាំងគិតគូរបន្ថែមក្នុងការរៀបចំផ្តល់ការគាំទ្រដល់ជីវភាពរបស់គ្រួសារគោលដៅ ដែលងាយរងហានិភ័យផងដែរ។
លោក ហ៊ុន សែន បានថ្លែងក្នុងពិធីបើកសន្និសីទស្តីពី «ចក្ខុវិស័យកម្ពុជាឆ្នាំ ២០២២» កាលពីដើមខែតុលានេះថា៖ «រាជរដ្ឋាភិបាលសម្រេចបន្តអនុវត្តកម្មវិធីឧបត្ថម្ភសាច់ប្រាក់ដល់គ្រួសារក្រីក្រ និងងាយរងគ្រោះរហូតដល់ដំណាច់ឆ្នាំ ២០២២ នេះ និងបន្តពិនិត្យ និងវាយតម្លៃស្ថានភាពនៅរៀងរាល់ ៣ ខែម្តង»។
លោកបានបញ្ជាក់ដែរថា ប្រជាពលរដ្ឋដែលធ្លាប់ទទួលបានប្រាក់ឧបត្ថម្ភនេះរួចហើយ ក៏នឹងនៅបន្តទទួលទៀត ដើម្បីទ្រទ្រង់ដល់ជីវភាពដែលមិនទាន់រួចផុតពីភាពក្រីក្រ និងកុំឱ្យធ្លាក់ដល់ភាពធ្ងន់ធ្ងរ។
ប្រមុខរាជរដ្ឋាភិបាលកម្ពុជារូបនេះ ក៏បានធ្វើការប៉ាន់ស្មានទុកជាមុនផងដែរថា យ៉ាងហោចណាស់ជំនួយនេះនឹងធ្វើរយៈពេលប្រមាណជា ១ ឆ្នាំទៀតយ៉ាងតិច ហើយប្រសិនបើមានការដកថយ ក៏មិនអាចដកថយទាំងស្រុងភ្លាមៗផងដែរ គឺអាចដកថយបន្តិចម្តងៗ។
ទាក់ទងនឹងការជួយឧបត្ថម្ភដល់ជនក្រីក្រ និងងាយរងគ្រោះនេះដែរ អគ្គលេខាធិការរាជបណ្ឌិត្យសភាកម្ពុជា លោក យង់ ពៅ បានលើកឡើងដែរថា ការឧបត្ថម្ភនេះជាមូលនិធិសង្គមកិច្ចមួយ ដែលជាកាតព្វកិច្ចរបស់រាជរដ្ឋាភិបាល ពីព្រោះប្រជាពលរដ្ឋក្រីក្រ និងរងគ្រោះក្នុងដំណាក់កាលកូវីដ ១៩ រយៈពេលជាង ២ ឆ្នាំ។
លោកបានប្រាប់ ភ្នំពេញ ប៉ុស្តិ៍ថា៖ «នេះជាកាតព្វកិច្ចរបស់រាជរដ្ឋាភិបាលដែលធានានូវជីវភាពប្រជាពលរដ្ឋទាំងអស់ឱ្យរស់នៅក្នុងភាពថ្លៃថ្នូរ បើទោះបីជាក្រ ឬមានក៏ដោយ ដែលរដ្ឋាភិបាលចាំបាច់ត្រូវតែជួយពួកគាត់ ដើម្បីមានជីវភាពអាចរស់នៅបានក្នុងកម្រិតសមរម្យមួយ បើទោះបីជាមិនអាចធូរធារក៏ដោយ»។
លោក យង់ ពៅ បានបន្ថែមដែរថា ក្នុងការជួយប្រជាពលរដ្ឋក្រីក្រនេះ រាជរដ្ឋាភិបាលមានចំណាត់ការច្បាស់លាស់ ដោយជ្រើសរើស និងចែកបណ្ណក្រីក្រដល់ប្រជាពលរដ្ឋទូទាំងប្រទេសដោយមិនមានការរើសអើងលើនិន្នាការនយោបាយ ជាតិសាសនាឡើយ ប៉ុន្តែជាប្រជាពលរដ្ឋដែលរស់នៅក្នុងប្រទេសកម្ពុជា។
អគ្គនាយកមូលនិធិជាតិជំនួយសង្គមនៃក្រសួងសង្គមកិច្ច អតីតយុទ្ធជន និងយុវនីតិសម្បទាលោក ឈួរ សុបញ្ញា ធ្លាប់បានពន្យល់ថា ការឧបត្ថម្ភសាច់ប្រាក់ដល់ជនក្រីក្របានចែកចេញជា ៣ ប្រភេទ គឺជនក្រីក្រនៅទីប្រជុំជនក្នុងរាជធានីភ្នំពេញ ជនក្រីក្រនៅទីប្រជុំជនក្រៅរាជធានីភ្នំពេញ និងជនក្រីក្រនៅជនបទ ហើយគ្រួសារនីមួយៗនឹងទទួលបានសាច់ប្រាក់ទៅតាមទំហំគ្រួសារ។
លោកថា ជាមធ្យមនៅជនបទទទួលបាន ២០ ម៉ឺនរៀលក្នុង ១ ខែ សម្រាប់ ១ គ្រួសារ។ ចំណែកអ្នកនៅទីក្រុងជាមធ្យម ៨០ ទៅ ១០០ ដុល្លារ។ ការដែលផ្តល់នេះ មិនមែនសុខៗយើងឱ្យសាច់ប្រាក់ខុសគ្នាទេ ផ្តល់នេះផ្អែកលើមូលដ្ឋាននៃការសិក្សាលើប្រាក់ចំណូល។ ការសិក្សានេះមានការចូលរួមពីធនាគារពិភពលោក និងធនាគារអភិវឌ្ឍន៍អាស៊ី។
ដោយឡែកទាក់ទងនឹងស្ថានភាពនៃកូវីដ ១៩ នៅក្នុងប្រទេសកម្ពុជា លោក ហ៊ុន សែន បានថ្លែងនៅព្រឹកថ្ងៃទី ២៥ ខែតុលាថា កម្ពុជាមិនមានករណីឆ្លងជំងឺកូវីដ ១៩ ក្នុងរយៈពេល ៥ ថ្ងៃជាប់គ្នានេះ។
លោកមានប្រសាសន៍ថា៖ «នេះជាភាពជោគជ័យមួយរបស់កម្ពុជា ជាពិសេសវិធានការទប់ស្កាត់ ក៏ដូចជាយុទ្ធសាស្ត្រនៃការចាក់វ៉ាក់សាំងប្រកបដោយប្រសិទ្ធភាពរបស់កម្ពុជា»៕