ភ្នំពេញៈ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) បានបើកកិច្ចប្រជុំផ្ទៃក្នុងដើម្បីពិនិត្យមើលប្រសិទ្ធភាពការងាររបស់ខ្លួន ខណៈកិច្ចប្រជុំនេះ បានពិនិត្យទៅលើលិខិតបទដ្ឋាននានាបន្ថែមទៀត ដើម្បីតាក់តែង និងដាក់ចេញសម្រាប់ពង្រឹងការអនុវត្តច្បាប់ក្នុងពេលខាងមុខ។
កិច្ចប្រជុំពិភាក្សានេះ បានធ្វើឡើងនៅថ្ងៃទី២៥ ខែតុលា ដែលមានការចូលរួមដោយមន្ត្រីជំនាញមានឋានៈជាអគ្គនាយករង ប្រធាននាយកដ្ឋាន អនុប្រធាននាយកដ្ឋាន ប្រធានសាខា ក.ប.ប. រាជធានី ខេត្ត និងសហការីសរុបជាង៣០ រូប នៅទីស្តីការ ក.ប.ប. រាជធានីភ្នំពេញ។
លោក ផាន អូន ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយក នៃអគ្គនាយកដ្ឋាន ក.ប.ប.បានប្រាប់ ភ្នំពេញ ប៉ុស្តិ៍ នៅថ្ងៃទី ២៦ ខែតុលាថា កិច្ចប្រជុំនេះ គឺបានពិនិត្យទៅលើរបាយការណ៍វឌ្ឍនភាពរបស់អគ្គនាយកដ្ឋាន ក.ប.ប. រួមទាំងរបាយការណ៍របស់នាយកដ្ឋានជំនាញទាំង ៦ ផងដែរ។
ក្រៅពីពិនិត្យទៅលើសកម្មភាពទាំងនេះ លោក បានឱ្យដឹងបន្តថា មន្ត្រីពាក់ព័ន្ធក៏បានពិភាក្សាទៅលើលិខិតបទដ្ឋាននានាបន្ថែមទៀត ដើម្បីពន្លឿនការតាក់តែង ក្នុងការដាក់ចេញសម្រាប់អនុវត្តក្នុងពេលខាងមុខ ដោយធ្វើយ៉ាងណាការពារផលប្រយោជន៍របស់អ្នកប្រើប្រាស់ និងធានាដល់ការប្រកួតប្រជែងរបស់អាជីវករ។
លោកបានបញ្ជាក់ថា៖ «នេះគឺជាការប្រជុំដែល ក.ប.ប បានធ្វើជាប្រចាំសប្តាហ៍ ឬប្រចាំខែ។ អ្វីដែលយើងពិភាក្សាក្នុងពេលនេះ គឺពិនិត្យមើលលើអ្វីដែលយើងបានកសាងនាពេលកន្លងមក ជាពិសេសគឺបទប្បញត្តិបច្ចេទេសក្រោមច្បាប់ ពាក់ព័ន្ធនឹងកិច្ចសហប្រតិបត្តិការជាមួយអាស៊ាន និងក្របខ័ណ្ឌអន្តរជាតិ។ យើងក៏ពិភាក្សាទៅលើផែនការយុទ្ធសាស្ត្រមួយចំនួនក្នុងក្របខ័ណ្ឌជាថ្នាក់ដឹកនាំ ដើម្បីជាធាតុចូលក្នុងការអនុវត្តទូទាំងប្រទេសផងដែរ»។
ជាមួយនឹងការពិភាក្សានេះ លោក ផាន អូន បានជំរុញឱ្យមន្ត្រីពាក់ព័ន្ធចូលរួមសហការក្នុងការកសាងឯកសារគតិយុត្តឱ្យបានកាន់តែលឿន ដើម្បីជំរុញការផ្សព្វផ្សាយពីច្បាប់ទូទាំងប្រទេសឱ្យបានកាន់តែមានប្រសិទ្ធភាព ជាពិសេសគឺការពង្រឹងមន្ត្រីអ្នកអនុវត្តច្បាប់។
បើតាមលោក ផាន អូន កាលពីថ្ងៃទី ១៨ ខែតុលា ឆ្នាំ ២០២២ អគ្គនាយកដ្ឋាន ក.ប.ប. ទើបតែបានជួបជាមួយក្រុមហ៊ុន សហគ្រាសចំនួន ១៩ ដែលកំពុងធ្វើធុរកិច្ចនៅកម្ពុជា ពាក់ព័ន្ធនឹងការផ្សព្វផ្សាយពាណិជ្ជកម្ម ដែលអាចមានលក្ខណៈបំភាន់និងភូតកុហកអ្នកប្រើប្រាស់។ លោក មើលឃើញថា តាមការត្រួតពិនិត្យ មានការផ្សព្វផ្សាយលក់ផលិតផលរបស់ធុរជនមួយចំនួននៅតែបំពានទៅនឹងច្បាប់ ដែលទាមទារឱ្យមានការតាក់តែង និងពង្រឹងអនុវត្តច្បាប់បន្ថែមទៀត ដើម្បីឱ្យប្រាកដថា គ្មានការផ្សាយពាណិជ្ជកម្ម ឬការអះអាងនានា មានខ្លឹមសារបំភាន់និងភូតកុហក ធ្វើឱ្យអ្នកប្រើប្រាស់ភាន់ច្រឡំ។
លោកបានឱ្យដឹងដែរថា៖ «មុននឹងឈានដល់កិច្ចប្រជុំរវាង គ.ជ.ក.ប. និងក្រុមហ៊ុន សហគ្រាសនេះ អគ្គនាយកដ្ឋាន ក.ប.ប. បានប្រើប្រាស់យន្តការសម្របសម្រួលជាមួយធុរជន ដែលបានធ្វើការផ្សាយពាណិជ្ជកម្ម ឬការអះអាងនានា មានខ្លឹមសារបំភាន់និងភូតកុហក ធ្វើឱ្យអ្នកប្រើប្រាស់មានការភាន់ច្រឡំ ដោយបានណែនាំជាច្រើនលើកច្រើនសាដល់ធុរជនផ្ទាល់ ព្រមទាំងទុកពេលវេលាឱ្យកែតម្រូវនូវអត្ថបទផ្សាយពាណិជ្ជកម្មរបស់ខ្លួន។ យើងនឹងធ្វើការបកស្រាយទៅកាន់ក្រុមហ៊ុន-សហគ្រាសទាំង ១៩ នេះ ជាលើកចុងក្រោយ មុននឹងឈានដល់ការចេញសេចក្តីសម្រេចចុងក្រោយ»។
ពាក់ព័ន្ធនឹងការអនុវត្តច្បាប់នេះដែរ កាលពីថ្ងៃទី ១៥ តុលា អគ្គនាយកដ្ឋាន ក.ប.ប. បានប្រកាសថា ខ្លួនពុំបានរកឃើញស្ថានីយ/ដេប៉ូណាមិនមានអនុលោមភាពនោះទេ ក្រោយមន្ត្រីជំនាញ សាខា ក.ប.ប. សាខាខេត្តកណ្ដាល បានចុះប្រតិបត្តិការត្រួតពិនិត្យនៅតាមស្ថានីយ/ដេប៉ូប្រេងឥន្ធនៈចំនួន ៨ ទីតាំងបន្ថែម កាលពីថ្ងៃទី ២៤ ខែតុលា។ តែយ៉ាងណាក្នុងថ្ងៃដដែលនោះ មន្ត្រីជំនាញ ក.ប.ប. បានរកឃើញ និងដកហូតទំនិញចម្រុះដែលខូចគុណភាព និងហួសកាលបរិច្ឆេទប្រើប្រាស់ជាង ២០ គីឡូក្រាម នៅខេត្តតាកែវ ។
អគ្គនាយកដ្ឋាន ក.ប.ប. បានអះអាងថា៖ «ដើម្បីទប់ស្កាត់ចរាចរណ៍ទំនិញខូចគុណភាព និងហួសកាលបរិច្ឆេទប្រើប្រាស់ ធានាឱ្យការធ្វើធុរកិច្ចដោយសុចរិតនៅលើទីផ្សារ ធានាសុខុមាលភាពជូនប្រជាពលរដ្ឋ និងការពារផលប្រយោជន៍ជូនអ្នកប្រើប្រាស់ មន្ត្រីស៊ើបអង្កេតសាខា ក.ប.ប. បានបន្តចុះត្រួតពិនិត្យទំនិញគ្រប់ប្រភេទនៅលើទីផ្សារ ឃ្លាំងស្ដុក និងម៉ាត»៕