.jpg)
មន្ត្រីពាក់ព័ន្ធក្នុងពិធីប្រគល់ និងទទួល Tablets នៅទីស្តីការគណៈរដ្ឋមន្ត្រីនៅថ្ងៃទី ២៧ តុលា។ រូបថត សហការី
ភ្នំពេញៈ ក្រុមប្រឹក្សាស្តារអភិវឌ្ឍន៍វិស័យកសិកម្មនិងជនបទ ប្រគល់ Tablets ជាង ៥០០ គ្រឿង ដល់អាជ្ញាធររាជធានី ខេត្តទាំង២៥ ទូទាំងប្រទេស សម្រាប់ប្រើប្រាស់ក្នុងការប្រមូលព័ត៌មានលើវិស័យសន្តិសុខស្បៀង អាហារូបត្ថម្ភ អនាម័យ និងទឹកស្អាត ដែលនេះ គឺជាជំនួយក្នុងការបង្កើតប្រព័ន្ធប្រុងប្រយ័ត្ន និងវិធានការឆ្លើយតបឱ្យទាន់ពេលវេលា និងចំគោលដៅ។
កម្មវិធីនេះ បានធ្វើឡើងនៅថ្ងៃទី ២៧ តុលា នាទីស្តីការគណៈរដ្ឋមន្ត្រី ដោយមានការចូលរួមពីតំណាងអាជ្ញាធររាជធានី ខេត្តទាំង ២៥ និងមន្ត្រីបង្គោលថ្នាក់ស្រុក រួមនឹងអង្គការសង្គមស៊ីវិល និងដៃគូអភិវឌ្ឍន៍ក្រោមការគាំទ្រដោយអង្គការ GIZ តាមរយៈគម្រោង MUSEFO។
លោក សុខ ស៊ីឡូ អគ្គលេខាធិការនៃក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ ថ្លែងថា ការផ្តល់នូវ Tablets ទាំងអស់នេះនឹងបង្កភាពងាយស្រួលក្នុងការបំពេញការងារប្រមូលទិន្នន័យសន្តិសុខស្បៀងនៅថ្នាក់ក្រោមជាតិ ដើម្បីធ្វើបច្ចុប្បន្នភាពប្រព័ន្ធគ្រប់គ្រងព័ត៌មានស្តីពីសន្តិសុខស្បៀង និងអាហារូបត្ថម្ភនៅកម្ពុជា បង្កើតប្រព័ន្ធប្រុងប្រយ័ត្ន និងដាក់ចេញវិធានការឆ្លើយតប ដោះស្រាយឱ្យចំគោលដៅ និងទាន់ពេលវេលា។
លោកបញ្ជាក់ថា៖ «ដើម្បីគាំទ្រដល់ក្រុមការងារដឹកនាំសម្របសម្រួលវិស័យសន្តិសុខស្បៀង និងអាហារូបត្ថម្ភរាជធានីខេត្ត អនុវត្តតួនាទីនិងភារកិច្ចឱ្យមានប្រសិទ្ធភាពខ្ពស់ ក្រុមប្រឹក្សាស្ដារអភិវឌ្ឍន៍វិស័យកសិកម្ម និងជនបទបានសហការជាមួយអង្គការ GIZ តាមរយៈគម្រោង MUSEFO ប្រគល់ Tabletsជូនដល់ក្រុមការងារដឹកនាំសម្របសម្រួលវិស័យសន្តិសុខស្បៀងនិងអាហារូបត្ថម្ភ រាជធានី ខេត្តមន្ត្រីបង្គោលថ្នាក់ស្រុក និងឃុំគោលដៅទូទាំងប្រទេស សរុបទាំងអស់ ៥១៥ គ្រឿង»។
បើតាមលោក សុខ ស៊ីឡូ Tablets ទាំងនេះ ត្រូវបានបែងចែកទៅតាមស្ថានភាពត្រូវការជាក់ស្តែងរបស់ខេត្តនីមួយៗ ដែលក្រុមការងារថ្នាក់ខេត្ត (PWG-FSN) ទទួលបាន ៧៥ គ្រឿង ហើយ Tablets ចំនួន ១២៩ គ្រឿង ត្រូវបានបែងចែកទៅដល់អាជ្ញាធរស្រុកក្នុងរាជធានីខេត្តទាំង ២៥ ព្រមទាំង Tablets ចំនួន ៣១១ គ្រឿង ត្រូវបានបែងចែកទៅកាន់អាជ្ញាធរឃុំមួយចំនួននៅក្នុងរាជធានី ខេត្តទាំង ២៥។
លោក យឹម ឆៃលី ប្រធានក្រុមប្រឹក្សាស្ដារអភិវឌ្ឍន៍វិស័យកសិកម្ម និងជនបទ ថ្លែងថា ជាទូទៅព័ត៌មានសន្តិសុខស្បៀងដែលប្រមូលបានពីរាជធានីខេត្ត នឹងត្រូវយកទៅធ្វើការវិភាគ រួចរៀបចំជារបាយការណ៍សម្រាប់ផ្តល់ជាទិន្នន័យជាក់លាក់មួយជួយដល់ការធ្វើសេចក្តីសម្រេចចិត្ត និងការឆ្លើយតបឱ្យមានប្រសិទ្ធភាពក្នុងការដោះស្រាយបញ្ហាសន្តិសុខស្បៀង។
គម្រោង MUSEFO បានរួមចំណែកយ៉ាងសំខាន់ ក្នុងការកាត់បន្ថយភាពក្រីក្រ និងភាពអត់ឃ្លាននៅកម្ពុជា ជាពិសេសផ្តោតការយកចិត្តទុកដាក់ទៅលើការលើកកម្ពស់សន្តិសុខស្បៀង និងអាហារូបត្ថម្ភរបស់កុមារ និងស្ត្រីក្នុងវ័យបន្តពូជ។ គម្រោងនេះ ក៏ផ្តល់ការបណ្តុះបណ្តាលតាមស្រុកនានាទូទាំងប្រទេស ដើម្បីបញ្ជ្រាបការងារសន្តិសុខស្បៀង និងអាហារូបត្ថម្ភទៅក្នុងដំណើរការកសាងផែនការអភិវឌ្ឍន៍ និងកម្មវិធីវិនិយោគឃុំ សង្កាត់ ការអនុវត្តផែនការសកម្មភាពនានា នៅក្នុងយុទ្ធសាស្ត្រជាតិស្តីពីសន្តិសុខស្បៀង និងអាហារូបត្ថម្ភ ឱ្យស្របតាមផែនទីបង្ហាញផ្លូវស្តីពីសន្តិសុខស្បៀង និងអាហារូបត្ថម្ភប្រកបដោយវីរភាពឆ្នាំ ២០៣០ ផងដែរ។
លោកបញ្ជាក់ថា៖ «ឈរលើស្មារតីនេះ ខ្ញុំស្នើសុំឱ្យឯកឧត្តម លោកជំទាវ ដែលជាតំណាងគណៈអភិបាលរាជធានីខេត្តទាំងអស់ សូមខិតខំយកអនុសាសន៍ទាំងនេះ ទៅអនុវត្តឱ្យបានជោគជ័យដោយសហការឱ្យបានជិតស្និទ្ធ ជាមួយនឹងអគ្គលេខាធិការក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ»។
ចាប់តាំងពីឆ្នាំ ២០២០ មក ក្រុមប្រឹក្សាស្តារអភិវឌ្ឍន៍វិស័យកសិកម្មនិងជនបទបានសហការជាមួយរដ្ឋបាលខេត្តនិងដៃគូអភិវឌ្ឍន៍រួមមានអង្គការ GIZ, WFP, UNICEF និងបណ្តាញសម្ព័ន្ឋអង្គការសង្គមស៊ីវិល ដើម្បីអាហារូបត្ថម្ភនៅកម្ពុជា ដែលដឹកនាំដោយអង្គការ HKI បានបង្កើតក្រុមការងារដឹកនាំសម្របសម្រួលវិស័យសន្តិសុខស្បៀងនិងអាហារូបត្ថម្ភ បានស្ទើរគ្រប់រាជធានីខេត្ត។
លោក Stefan Messerer អគ្គរដ្ឋទូតសាធារណរដ្ឋសហព័ន្ធអាល្លឺម៉ង់ប្រចាំកម្ពុជា សង្ឃឹមថា ក្រោយឆ្នាំ ២០-៣០ បន្ទាប់ពីកម្ពុជាឈានទៅដល់គោលដៅ SDGs នោះអាហារូបត្ថម្ភ នឹងនៅតែជាសសរស្តម្ភសំខាន់សម្រាប់គ្រប់គ្រងសង្គម ដែលប្រទេសកម្ពុជា ក្នុងពេលនេះ កំពុងប្រឈមមុខទៅនឹងកង្វះអាហារូបត្ថម្ភស្រាប់។
ស្របពេលដែលបញ្ហាប្រឈម និងនិន្នាការកង្វះអាហារូបត្ថម្ភនៅតែបន្តកើតមាន ជាពិសេសក្នុងចំណោមកុមារ លោក Stefan Messerer បានចាត់ទុកថា គំនិតនៃបញ្ហាប្រឈមនេះ អាចនឹងមានការផ្លាស់ប្តូរ ដើម្បីធានាបាននូវរបបអាហារគ្រប់គ្រាន់ ចម្រុះ និងមានសុខភាពល្អសម្រាប់ទាំងអស់គ្នា។
លោកថា៖«ការបន្តវិនិយោគ និងការកែសម្រួលពន្ធអាករ អាចនឹងចាំបាច់ ដើម្បីធានាសុវត្ថិភាពចំណីអាហារ និងលើកកម្ពស់បន្ថែមទៀតនូវអាហារដែលមានសុខភាពល្អ សុវត្ថិភាព និងជីវជាតិ»៕
