.jpg)
អ្នកគ្រូម្នាក់កំពុងបង្រៀនក្មេងតូចៗនៅថ្នាក់រៀន ១ កាលពីឆ្នាំ ២០២០។ ហុង មិនា
ភ្នំពេញៈ ក្រសួងសុខាភិបាល និងមជ្ឈមណ្ឌលជាតិគាំពារមាតា និងទារក រួមគ្នាប្រកាសដាក់ឱ្យអនុវត្តគោលការណ៍ណែនាំអន្តរកាល ស្តីពីការតាមដាន និងលើកកម្ពស់ការលូតលាស់របស់កុមារអាយុក្រោម ៥ ឆ្នាំជាលើកដំបូងនៅកម្ពុជា ដែលគោលការណ៍នេះ នឹងផ្តល់ប្រសិទ្ធភាពក្នុងការតាមដានការលូតលាស់ និងការអភិវឌ្ឍរបស់កុមារ។
ការប្រកាសផ្សព្វផ្សាយនិងដាក់ឱ្យអនុវត្តនូវគោលការណ៍ណែនាំនេះ គឺបានធ្វើឡើងនៅថ្ងៃទី ២៧ តុលា ក្នុងសិក្ខាសាលាថ្នាក់ជាតិ ដែលមានអ្នកចូលរួមមកពីក្រសួងស្ថាប័នពាក់ព័ន្ធ ដៃគូអភិវឌ្ឍន៍ជាតិ អន្តរជាតិ និងអង្គការសង្គមស៊ីវិល នៅសណ្ឋាគារសាន់វ៉េ។
អង្គការ Helen Keller បានឱ្យដឹងថា សិក្ខាសាលានេះ គឺមានបំណងផ្តល់ព័ត៌មាន ស្ដីពីរបៀបធ្វើការតាមដាន និងលើកកម្ពស់ការលូតលាស់របស់កុមារដែលមានអាយុក្រោម ៥ ឆ្នាំ ដោយប្រើប្រាស់វិធីមានលក្ខណៈជាប្រព័ន្ធ និងមានស្តង់ដា ច្បាស់លាស់។
អង្គការនេះ បានបន្តថា សិក្ខាសាលានេះ ក៏មានបំណងចង់ផ្សព្វផ្សាយព័ត៌មានទាំងនេះ ទៅកាន់អ្នកផ្តល់សេវាថែទាំសុខភាព អន្តរក្រសួង និងដៃគូអភិវឌ្ឍន៍សម្រាប់ការអនុវត្ត ដើម្បីរៀបចំផែនការកែលម្អសម្រាប់អនុវត្តការតាមដាន និងលើកកម្ពស់ការលូតលាស់របស់កុមារអាយុក្រោម ៥ ឆ្នាំ (GMP) នៅក្នុងប្រទេសកម្ពុជា។
អង្គការ Helen Keller បានបញ្ជាក់ថា៖ «វេទិកានេះ នឹងបង្កើតការពិភាក្សាជាក្រុមជាមួយអ្នកផ្តល់សេវាថែទាំសុខភាព ក្រសួងពាក់ព័ន្ធ និងដៃគូអភិវឌ្ឍន៍ ដើម្បីអនុវត្តឱ្យមានប្រសិទ្ធភាព ឈានទៅដល់គោលបំណងនៃប្រតិបត្តិការស្របតាមសូចនាករសំខាន់ៗនៃគោលការណ៍ណែនាំបណ្តោះអាសន្នស្តីពីការតាមដាន និងលើកកម្ពស់ការលូតលាស់របស់កុមារអាយុក្រោម៥ឆ្នាំ»។
លោក កែវ មួយស្រូយ នាយករងមជ្ឈមណ្ឌលជាតិគាំពារមាតា និងទារក បាននិយាយថា នេះគឺជាលើកទី១ ហើយដែលក្រសួងសុខាភិបាល តាមរយៈកម្មវិធីជាតិអាហារូបត្ថម្ភ បានធ្វើការផ្សព្វផ្សាយ និងដាក់ឱ្យប្រើប្រាស់គោលការណ៍ណែនាំអន្តរកាលស្តីពីការតាមដាន និងលើកកម្ពស់ការលូតលាស់របស់កុមារអាយុក្រោម ៥ ឆ្នាំ។
សិក្ខាសាលានេះ បានចូលរួមណែនាំ និងសម្របសម្រួលការអនុវត្តឱ្យមានប្រសិទ្ធភាពនៃកម្មវិធីការតាមដាន និងលើកកម្ពស់ការលូតលាស់របស់កុមារ ខណៈគោលការណ៍ណែនាំនេះមានគោលបំណងផ្តល់ព័ត៌មាន ស្ដីពីរបៀបធ្វើការតាមដាន និងលើកកម្ពស់ការលូតលាស់របស់កុមារដែលមានអាយុក្រោម ៥ ឆ្នាំដោយប្រើប្រាស់វិធីមានលក្ខណៈជាប្រព័ន្ធ និងមានស្តង់ដា ច្បាស់លាស់។
លោកបានបញ្ជាក់ថា៖ «កន្លងមកបុគ្គលិកសុខាភិបាលគ្រប់លំដាប់ថ្នាក់ បានប្រឹងប្រែងយ៉ាងខ្លាំងហើយសម្រេចបានលទ្ធផលគួរឱ្យកោតសរសើរដោយគោរពប្រតិបត្តិគ្រប់បទប្បញ្ញតិ្តគោលនយោបាយជាសកម្មភាពជួយការពារ និងលើកកម្ពស់ ដើម្បីដោះស្រាយបញ្ហាអាហារូបត្ថម្ភ ដោយផ្ដោតសំខាន់លើកុមារចាប់ពីពេលកើតដល់អាយុ ២ ឆ្នាំ»។
លោកបន្ថែមថា៖ «រយៈពេល ៥ ឆ្នាំដំបូងនៃជីវិត គឺសំខាន់សម្រាប់ការលូតលាស់ និងអភិវឌ្ឍរបស់កុមារ ជាពិសេសក្នុងអំឡុងពេល ១ ០០០ ថ្ងៃដំបូង (ចាប់តាំងពីនៅក្នុងផ្ទៃម្តាយរហូតដល់កុមារអាយុ ២ ឆ្នាំ)។ កុមារជាតំណាងឱ្យការអភិវឌ្ឍ សេដ្ឋកិច្ច និងសង្គមនៅពេលអនាគតរបស់កម្ពុជា ដូចនេះយើងត្រូវធានាឱ្យបាននូវសុខភាព និងអាហារូបត្ថម្ភរបស់ពួកគេ»។
ការស្រាវជ្រាវមួយរបស់ អង្គការ Helen Keller ដែលទើបត្រូវបានផ្សព្វផ្សាយ បានបង្ហាញថា កុមារតូចៗនៅខេត្តកណ្តាលជាទូទៅបរិភោគអាហារនិងភេសជ្ជៈដែលមិនល្អចំពោះសុខភាពក្នុងអត្រាកើនឡើងពីជាង ៤៥ ភាគរយ ក្នុងចំណោមកុមារអាយុចន្លោះ ១០ ដល់ ១៤ ខែ ដល់ ៧៩ ភាគរយ ក្នុងចំណោមកុមារអាយុចន្លោះ ១៥ ដល់ ១៩ ខែ ខណៈអាហារនិងភេសជ្ជៈមិនល្អចំពោះសុខភាពដែលត្រូវបានបរិភោគច្រើនជាងគេ គឺមានទឹកដោះគោផ្អែម និងនំដែលមានរសជាតិផ្អែម និងប្រៃ។
ជាមួយនឹងការរកឃើញនេះ តាមលទ្ធផលនៃការអង្កេតប្រជាសាស្ត្រ និងសុខភាពកម្ពុជាឆ្នាំ ២០២២ បង្ហាញថា កុមារកម្ពុជា អាយុពី ៦-២៣ ខែ ប្រមាណ ២៨ ភាគរយ បានប្រើប្រាស់ភេសជ្ជៈមានកម្រិតជាតិស្ករខ្ពស់ និងកុមារកម្ពុជាអាយុពី ៦-២៣ ខែប្រមាណ ២១ ភាគរយ បានប្រើប្រាស់អាហារមិនល្អចំពោះសុខភាពនាពេលកន្លងមក៕
