​អ្នក​សារព័ត៌​មាន​ជាតិ និង​អន្តរ​ជាតិ​មក​ពី ​៣០ ​ប្រទេស​ សរុបជាង​ ១ ៣០០ ​នាក់ បាន​ចុះ​ឈ្មោះ​ចូល​រួម​យក​ព័ត៌​មាន​នៅ​ក្នុង​កិច្ច​ប្រជុំ​កំពូល​អាស៊ាន​នៅភ្នំពេញ ​

បុរសម្នាក់ជិះម៉ូតូឆ្លងកាត់ក្រសួងព័ត៌មាន កាលពីឆ្នាំ ២០២១។ ហេង ជីវ័ន

ភ្នំពេញៈ ក្នុងរយៈពេល ២៧ ថ្ងៃ មានអ្នកសារព័ត៌មានជាតិ និងអន្តរជាតិមកពី ៣០ ប្រទេស បានចុះឈ្មោះចូលរួមយកព័ត៌មាន នៅក្នុងកិច្ចប្រជុំកំពូលអាស៊ាន នៅរាជធានីភ្នំពេញ មានចំនួនសរុបជាង ១ ៣០០នាក់ ដែលក្នុងនោះអ្នកសារព័ត៌មានបរទេស ដែលមានចំនួនច្រើនជាងគេគឺប្រទេសជប៉ុនដែលមាន១៥៧ នាក់។

លោកផុស សុវណ្ណ ប្រតិភូរាជរដ្ឋាភិបាល ទទួលបន្ទុកអគ្គនាយកនៃអគ្គនាយកដ្ឋានព័ត៌មាន និងសោតទស្សន៍ នៃក្រសួងព័ត៌មានប្រាប់ ភ្នំពេញ ប៉ុស្តិ៍ នាថ្ងៃទី ២៧ ខែតុលា ថា៖ «គិតត្រឹមថ្ងៃទី២៧ ខែតុលាចំនួន អ្នកចុះឈ្មោះចូលរួមកិច្ចប្រជុំកំពូលអាស៊ានសរុបចំនួន ១ ៣៨៥ រូប មកពី ៣០ ប្រទេស។ ក្នុងចំណោម ៣០ ប្រទេស ចំនួនអ្នកសារព័ត៌មាន ដែលចុះឈ្មោះច្រើនជាងគេរួមមានកម្ពុជា ៤៧៨ រូបជប៉ុន ១៥៧ រូប កូរ៉េខាងត្បូង ១៣៣ រូបសហរដ្ឋអាមេរិក ១០០ រូប»។

លោកបន្តថា អ្នកសារព័ត៌មានដែលចុះឈ្មោះបានជោគជ័យសរុបមានចំនួន ១ ២០៥ នាក់ដែលក្នុងនោះបរទេសមានចំនួន ៧២៧នាក់ ហើយមន្ត្រីក្រសួងព័ត៌មានចំនួន ២២០នាក់។

ចំពោះអ្នកសារព័ត៌មានដែលត្រូវបានបដិសេធសរុបមានចំនួន ៧៩នាក់ ដោយមិនបានបំពេញឱ្យបានត្រឹមត្រូវតាមលក្ខខណ្ឌនៃការចុះឈ្មោះ។ រាល់អ្នកដែលត្រូវបដិសេធនឹងបានទទួលអ៊ីមែលបញ្ជាក់ពីកំហុសដើម្បីឱ្យកែតម្រូវ។

លោក ផុស សុវណ្ណ ដែលក៏ជាអ្នកនាំពាក្យក្រសួងព័ត៌មានផងដែរនោះ បានបញ្ជាក់ថា អ្នកសារព័ត៌មាន ដែល ចុះឈ្មោះបានដោយជោគជ័យ នឹងត្រូវបែងចែកតាមក្រុមដែលមានដូចជាអ្នកសារព័ត៌មានដែលជាម្ចាស់ផ្ទះអាចចល័តលើទីតាំងអាទិភាពមួយចំនួន នៃកិច្ចប្រជុំ ខណៈអ្នកសារព័ត៌មានផ្លូវការតាមគណៈប្រតិភូ អាចចល័តបានតាមគណៈប្រតិភូរបស់ប្រទេសខ្លួនផ្ទាល់ និងទីតាំងនៃកិច្ចប្រជុំមួយចំនួន។

អ្នកសារព័ត៌មានចល័ត អាចយកព័ត៌មានបានតែពីមណ្ឌលព័ត៌មានទៅកាន់បន្ទប់ប្រជុំ ដោយមានមន្ត្រីសម្របសម្រួលរបស់មណ្ឌលព័ត៌មានជូនទៅ។ ក្រុមនេះនឹងត្រូវចុះឈ្មោះចូលរួមកិច្ចប្រជុំនីមួយៗ ដែលខ្លួនចាប់អារម្មណ៍ ដើម្បីទទួលបានប័ណ្ណដែលហៅថា Pool Pass ដើម្បីចូលរួម។ ក្នុង១អង្គភាពត្រូវបានអនុញ្ញាតបានត្រឹម២នាក់ គឺអ្នកថតរូប និងអ្នកថតវីដេអូ។

លោកថ្លែងថា៖ «អ្នកសារព័ត៌មាន ដែលត្រូវបានអនុញ្ញាតចូលយកព័ត៌មាន ក្នុងកិច្ចប្រជុំនីមួយៗ គឺត្រូវចាកចេញពីបន្ទប់ប្រជុំវិញក្រោយពេលប្រធាន ឬសហប្រធានថ្លែងចំណាប់អារម្មណ៍ចប់»។

សម្រាប់ទីតាំងព័ត៌មាន គឺអាចផ្ទុកអ្នកសារព័ត៌មានបានចំនួនចន្លោះពី ១ ២០០ ទៅ ១ ៤០០ នាក់ និងមានសម្ភារមួយចំនួន ដែលអាចផ្តល់ជារូបភាព និងសំឡេងពីបន្ទប់ប្រជុំមកដល់បន្ទប់ព័ត៌មាន (Media Center) ដែលអ្នកសារព័ត៌មានមិនអាចមានឱកាសឡើងទៅកាន់បន្ទប់ប្រជុំ តែអាចតាមដាននៅក្នុងបន្ទប់ព័ត៌មាននេះបាន។

ក្រសួងព័ត៌មានបានបើកឱ្យដំណើរការ ការចុះឈ្មោះអ្នកសារព័ត៌មានដែលមានបំណងចូលរួមយកព័ត៌មាននៅក្នុងកិច្ចប្រជុំកំពូលអាស៊ាននិងកិច្ចប្រជុំពាក់ព័ន្ធនៅរាជធានីភ្នំពេញនៅខែក្រោយ ចាប់ផ្តើមពីថ្ងៃទី ១ ដល់ថ្ងៃទី ៣១ ខែតុលា តាមលក្ខខណ្ឌមួយចំនួន។

អ្នកសារព័ត៌មានត្រូវមកពីអង្គភាពដែលបានចុះបញ្ជី ឬទទួលស្គាល់ដោយក្រសួងព័ត៌មាន ឬអាជ្ញាធរពាក់ព័ន្ធ។ សម្រាប់អង្គភាពបរទេសជាអង្គភាព ដែលចេញផ្សាយជាប្រចាំ តែក្រសួងក៏ត្រូវពិចារណាលើអាទិភាពផងដែរ ដោយសារអ្នកសារព័ត៌មានដែលចង់ចូលរួមមានចំនួនច្រើន ប៉ុន្តែទីតាំងមិនសមស្របជាដើម។

ចំពោះលក្ខខណ្ឌចុះឈ្មោះរួមមាន រូបថតផ្ទៃស អត្តសញ្ញាណប័ណ្ណ ឬលិខិតឆ្លងដែនមានសុពលភាព បណ្ណព័ត៌មានមានសុពលភាព ដែលចេញដោយក្រសួង ឬអាជ្ញាធរមានសមត្ថកិច្ចពាក់ព័ន្ធលិខិតបញ្ជាបេសកកម្ម និងបណ្ណចាក់វ៉ាក់សាំងជំងឺកូវីដ ១៩៕

ព័ត៌មានជាតិ

ព័ត៌មានថ្មីៗ

វីដេអូ