កំពង់ស្ពឺៈ ប្រតិភូក្រសួងអប់រំ យុវជន និងកីឡា និងធនាគារអភិវឌ្ឍអាស៊ី (ADB) នាថ្ងៃទី ២៧ ខែតុលា បានទៅបំពេញទស្សនកិច្ចនៅវិទ្យាល័យឧដុង្គ ស្ថិតក្នុងខេត្តកំពង់ស្ពឺ ដែលជាវិទ្យាល័យធនធានមួយក្នុងចំណោមវិទ្យាល័យធនធាននានា ដែលត្រូវបានចាត់ទុកថា បានដំណើរការល្អលើផ្នែកការងារគ្រប់គ្រង ដឹកនាំ រដ្ឋបាល ការងារបង្រៀន រៀន ការងារចូលរួមពីសហគមន៍ និងការគ្រប់គ្រងថវិកា។
ដំណើរទស្សនកិច្ចនេះ ដឹកនាំដោយ លោក អ៊ុម រម្យណី រដ្ឋលេខាធិការក្រសួងអប់រំ យុវជន និងកីឡា និងប្រតិភូធនាគារអភិវឌ្ឍន៍អាស៊ីរួមដំណើរដោយ លោក Winfried F. Wicklein អគ្គនាយករងធនាគារអភិវឌ្ឍន៍អាស៊ីប្រចាំអាស៊ីអាគ្នេយ៍ លោក Anthony Gill ជំនាញការជាន់ខ្ពស់ផ្នែកប្រតិបត្តិការគម្រោងរបស់ធនាគារអភិវឌ្ឍន៍អាស៊ី លោកស្រី Jyotsana Varma នាយិកាធនាគារអភិវឌ្ឍន៍អាស៊ីប្រចាំកម្ពុជា និងមន្ត្រីដទៃទៀតរបស់ធនាគារអភិវឌ្ឍន៍អាស៊ីប្រចាំកម្ពុជា។
ក្រសួងអប់រំបញ្ជាក់តាមបណ្តាញហ្វេសប៊ុកនាថ្ងៃទី ២៨ ខែតុលា ថា គណៈប្រតិភូបានទស្សនកិច្ច ការធ្វើពិសោធន៍មុខវិជ្ជាគីមី រូបវិទ្យា បន្ទប់កុំព្យូទ័រ បណ្ណាល័យ ការប្រើប្រាស់កុំព្យូទ័របន្ទះជំនួយក្នុងការរៀនវិទ្យាសាស្ត្រ និងសម្ភាសន៍អតីតសិស្សដែលធ្លាប់ទទួលអាហារូបករណ៍ សិស្សក្រីក្ររៀនពូកែមុខវិជ្ជាវិទ្យាសាស្ត្រ។
ទស្សនកិច្ចនេះជាការត្រួសត្រាយផ្លូវសម្រាប់ទស្សនកិច្ចអគ្គនាយកធនាគារអភិវឌ្ឍន៍អាស៊ីនាថ្ងៃទី ១១ ខែវិច្ឆិកា ខាងមុខ៕