.jpg)
កម្ពុជារំពឹងថានឹងអាចចាប់ផ្តើមនាំចេញសម្បុកត្រចៀកកាំកម្ពុជាទៅកាន់ ប្រទេសចិននាពេលដ៏ខ្លីខាងមុខនេះ។ ហេង ជីវ័ន
ភ្នំពេញៈ កម្ពុជារំពឹងថានឹងអាចចាប់ផ្តើមនាំចេញសម្បុកត្រចៀកកាំកម្ពុជាទៅកាន់ ប្រទេសចិននាពេលដ៏ខ្លីខាងមុខនេះ បន្ទាប់ពី ក្រសួងពាណិជ្ជកម្មបានចុះហត្ថុលេខាលើការនាំចេញជាមួយនឹងមជ្ឈមណ្ឌល ពាណិជ្ជកម្មកម្ពុជានៅទីក្រុងសៀមិន កាលពីចុងសប្តាហ៍នេះ ។
ការចុះហត្ថលេខាស្តីពី កិច្ចសហប្រតិបត្ដិការជំរុញការនាំចេញសម្បុកត្រចៀកកាំកម្ពុជាទៅកាន់ប្រទេសចិនត្រូវធ្វើ ឡើងរវាងពីអគ្គនាយកដ្ឋានជំរុញពាណិជ្ជកម្ម នៃក្រសួងពាណិជ្ជកម្ម និងមជ្ឈមណ្ឌល ពាណិជ្ជកម្មកម្ពុជានៅទីក្រុងសៀមិន កាលពីថ្ងៃទី ២៧ ខែតុលា នៅទីស្តីការក្រសួង។
ពិធីនេះក៏មានការអញ្ជើញចូលរួមពីថ្នាក់ដឹកនាំ និងមន្ត្រីក្រសួងពាណិជ្ជកម្ម និងតំណាងក្រសួងពាក់ព័ន្ធដូចជា តំណាងក្រសួងកសិកម្ម រុក្ខាប្រមាញ់ និងនេសាទ តំណាងអគ្គនាយកដ្ឋានគយនិងរដ្ឋាករកម្ពុជា តំណាងអគ្គនាយកដ្ឋានពន្ធដារ សភាពាណិជ្ជកម្មកម្ពុជាព្រមទាំងសមាជិក និងសហព័ន្ធ សមាគម ក្រុមហ៊ុនដែលពាក់ព័ន្ធវិស័យ សម្បុកត្រចៀកកាំជាច្រើនរូបផងដែរ។
លោក កៅ កោសល អគ្គនាយកនៃអគ្គនាយកដ្ឋានជំរុញពាណិជ្ជកម្ម បានសាទរចំពោះការ ហត្ថលេខាលើអនុស្សរណៈ យោគយល់គ្នា រវាងអគ្គនាយកដ្ឋានជំរុញពាណិជ្ជកម្ម នៃក្រសួងពាណិជ្ជកម្ម ជាមួយនឹងមជ្ឈមណ្ឌលពាណិជ្ជកម្ម កម្ពុជា នៅទីក្រុងសៀមិន ស្តីពី កិច្ចសហប្រតិបត្ដិការជំរុញការនាំចេញសម្បុកត្រចៀកកាំកម្ពុជាទៅកាន់ប្រទេសចិនដែលជាការត្រួសត្រាយផ្លូវបន្ថែមទៀតដើម្បីពន្លឿនការនាំចេញសម្បុកត្រចៀកកាំកម្ពុជាទៅកាន់ទីផ្សារចិននាពេលដ៏ខ្លីខាងមុខនេះ។
លោកបានគូសបញ្ជាក់ថា៖ «អនុស្សរណៈនៃការយោគយល់គ្នានេះ ផ្ដោតទៅលើសកម្មភាពនៃកិច្ចសហប្រតិបត្តិការសំខាន់ៗ រួមមាន ការស្វែងរកដៃគូផលិត និងផ្គត់ផ្គង់ផលិតផលសម្បុកត្រចៀកកាំ; កិច្ចគាំពារឱ្យមានការបង្កើត រោងចក្រកែច្នៃផលិតផលទឹកមាត់ត្រចៀកកាំ; ការជំរុញឱ្យមានការបើកច្រកពាណិជ្ជកម្ម លើផលិតផលទឹកមាត់ ត្រចៀកកាំរវាងកម្ពុជា ; និងចិន ការពង្រឹងបណ្តាញធុរកិច្ច តាមរយៈការរៀបចំព្រឹត្តិការណ៍ពាណិជ្ជកម្មផ្សេងៗ ដូចជា វេទិកាធុរកិច្ច ជំនួបពាណិជ្ជកម្ម និងការចូលរួមពិព័រណ៍ពាណិជ្ជកម្មនានាជាដើម»។
លោក Mr. ZENG Youmin ប្រធានមជ្ឈមណ្ឌលពាណិជ្ជកម្មកម្ពុជានៅទីក្រុងសៀមិន បានថ្លែងថា មជ្ឈមណ្ឌលពាណិជ្ជកម្មកម្ពុជានៅទីក្រុងសៀមិន មានបំណង លើកកម្ពស់កិច្ចសហប្រតិបត្តិការចិន-កម្ពុជា និងរួមចំណែកកម្លាំងរបស់ខ្លួនក្នុងការនាំចេញសម្បុកត្រចៀកកាំកម្ពុជា ទៅកាន់ប្រទេសចិន។
លោកបានបញ្ជាក់បន្ថែមថា៖ « អគ្គនាយកដ្ឋានជំរុញ ពាណិជ្ជកម្ម និងមជ្ឈមណ្ឌលពាណិជ្ជកម្មកម្ពុជានៅទីក្រុងសៀមិន បានសហការគ្នាពិនិត្យលើអនុស្សរណៈនេះ យ៉ាងលម្អិត រហូតបានឈានដល់ការចុះហត្ថលេខានាថ្ងៃនេះ»។
លោក ឈួន ដារ៉ា រដ្ឋលេខាធិការក្រសួងពាណិជ្ជកម្មដែលបានធ្វើជាអធិបតីក្នុងកម្មវិធីនោះបានថ្លែងថា ក្រសួងពាណិជ្ជកម្ម គាំទ្រដល់មជ្ឈមណ្ឌលពាណិជ្ជកម្ម សម្រាប់កិច្ចខិតខំប្រឹងប្រែងក្នុងការរៀបចំផែនការជំរុញការនាំចេញផលិតផលសម្បុកត្រចៀកកាំកម្ពុជាទៅកាន់ ប្រទេសចិន ដែលជាទីផ្សារមានប្រជាជនច្រើនជាងគេលើពិភពលោក។
លោកសង្ឃឹមយ៉ាងមុតមាំថា៖ «បន្ទាប់ពីបានពីអនុស្សរណៈនេះចូលជាធរមានបន្ទាប់ពីចុះហត្ថលេខារួច ផលិតផលសម្បុកត្រចៀកកាំកម្ពុជា នឹងអាចនាំចូលទៅកាន់ទីផ្សារប្រទេសចិនបានយ៉ាងច្រើន ដែលជាអត្ថប្រយោជន៍ ដល់វិស័យឯកជនកម្ពុជានៅក្នុងវិស័យសម្បុកត្រចៀកកាំបានយ៉ាងច្រើននៅពេលអនាគតដ៍ខ្លីខាងមុខ»។
កាលពីថ្ងៃទី ៨ ខែសីហា ឆ្នាំ ២០២២ ក្រសួងកសិកម្ម រុក្ខាប្រមាញ់ និងនេសាទ និងមជ្ឈមណ្ឌល Cambodia (Xiamen) Commercial Center ក៏បានធ្វើពិធីចុះហត្ថលេខាលើអនុស្សរណៈយោគយល់គ្នា (MoU) ស្តីពី «ការនាំចេញផលិតផលសម្បុកត្រចៀកកាំទៅកាន់សាធារណរដ្ឋប្រជាមានិតចិន» ផងដែរ។
ប្រធានសហព័ន្ធសម្បុកត្រចៀកកាំកម្ពុជា លោក ណាង សុធី បានប្រាប់ភ្នំពេញប៉ុស្តិ៍កាលពីខែសីហាថា បច្ចុប្បន្នមិនទាន់មានកិច្ចព្រមព្រៀងនៃការនាំចេញសម្បុកត្រចៀកកាំជាផ្លូវការរវាងអាជ្ញាធរកម្ពុជា-ចិនឡើយ ប៉ុន្តែការនាំចេញទៅប្រទេសចិនមានច្រើនតោនរួចមកហើយជារៀងរាល់ឆ្នាំ។ ក្រៅពីទីផ្សារប្រទេសចិន ផលិតផលសម្បុកត្រចៀកកាំកម្ពុជា ក៏ត្រូវបាននាំទៅប្រទេសមួយចំនួនក្នុងតំបន់អឺរ៉ុប ជប៉ុន និងអាមេរិក ជាដើម។ លោកស្វាគមន៍ចំពោះការពន្លឿននៃការនាំចេញជាផ្លូវការសម្បុកត្រចៀកកាំកម្ពុជាទៅប្រទេសចិន ។
បើតាមលោក សុធី នៅកម្ពុជាក្នុង ១ ឆ្នាំៗ អាចមានផ្ទះត្រចៀកកាំថ្មី សាងសង់កើនឡើងចន្លោះពី ១០០-២០០ខ្នង។ នៅទីផ្សារអន្តរជាតិ សម្បុកត្រចៀកកាំ មិនទាន់សម្អាត មានតម្លៃចន្លោះពី ៥៥០-៧៥០ ដុល្លារក្នុង ១ គីឡូក្រាម និងសម្អាតហើយ មានតម្លៃពី ១ ៥០០-៣ ៥០០ ដុល្លារ។
បច្ចុប្បន្នសម្បុកត្រចៀកកាំមិនទាន់សម្អាត មានតម្លៃចន្លោះពី ៧០០-៨០០ ដុល្លារក្នុង ១ គីឡូក្រាម និងសម្បុកសម្អាតរួច មានតម្លៃពី ១ ៨០០- ២ ០០០ ដុល្លារ។ នេះបើតាមលោក វឌ្ឍនៈ។
របាយការណ៍របស់អគ្គនាយកដ្ឋានកសិកម្ម ឱ្យដឹងថា តាមស្ថិតិរបស់រដ្ឋបាលព្រៃឈើក្នុងឆ្នាំ២០២០ នៅទូទាំងប្រទេសកម្ពុជាមានផ្ទះត្រចៀកកាំចំនួន ៨៧២ ផ្ទះ និងអាចផ្តល់ផលចន្លោះពី ១-១,៥ តោនក្នុង ១ ខែ៕
