.jpg)
ក្បួនម៉ូតូធំត្រូវបានបង្វឹកកាលពីថ្ងៃទី ២៧ តុលា ដើម្បីរង់ចាំហែហមក្បួនគណៈប្រតិភូបរទេសមកចូលរួមកិច្ចប្រជុំកំពូលអាស៊ាន។ រូបថត ហេង ជីវ័ន
ភ្នំពេញៈប្រទេសកម្ពុជាបានត្រៀមកម្លាំងកងពលតូចលេខ៧០ នៅព្រលានយន្តហោះអន្តរជាតិភ្នំពេញ ក្នុងការការពារសុវត្ថិភាពគណៈប្រតិភូបរទេស ក្នុងអំឡុងពេលដែលកម្ពុជាធ្វើជាម្ចាស់ផ្ទះក្នុងការរៀបចំកិច្ចប្រជុំកំពូលអាស៊ាននិងកិច្ចប្រជុំពាក់ព័ន្ធចាប់ពីថ្ងៃទី ៨ ដល់ថ្ងៃទី ១៣ ខែវិច្ឆិកា ។
ដោយឡែក ក្នុងរយៈពេល ២៧ ថ្ងៃ មានអ្នកសារព័ត៌មានជាតិ និងអន្តរជាតិមកពី ៣០ ប្រទេស សរុបជាង ១ ៣០០ នាក់ បានចុះឈ្មោះចូលរួមយកព័ត៌មាននៅក្នុងកិច្ចប្រជុំកំពូលអាស៊ាននេះ។
ការត្រៀមកម្លាំងនេះ ដើម្បីរក្សាសណ្ដាប់ធ្នាប់ និងការការពារសុវត្ថិភាព គណៈប្រតិភូ ដែលនឹងចូលរួមក្នុងកិច្ចប្រជុំកំពូលអាស៊ានលើកទី ៤០ និងទី ៤១ និងកិច្ចប្រជុំពាក់ព័ន្ធ ក្នុងខែវិច្ឆិកាខាងមុខ។ នេះបើតាមមេបញ្ជាការកងពលតូចលេខ៧០ បានចុះហ្វឹកហ្វឺនកងកម្លាំង កាលពីថ្ងៃទី ២៩ ខែតុលា។
បើតាមលោក ម៉ៅ សុផាន់ មេបញ្ជាការកងពលតូចលេខ៧០ បានប្រាប់ថា ការងារហ្វឹកហ្វឺននេះ បានដើរតួនាទីយ៉ាងសំខាន់ សម្រាប់កងទ័ព ដើម្បីលើកកម្ពស់ចំណេះដឹង ឱ្យកាន់តែរីកចម្រើន១កម្រិតថែមទៀត។
លោក ម៉ៅ សុផាន់ បានលើកឡើងថា៖ «ផែនការហ្វឹកហ្វឺន បានបន្តជំរុញឱ្យយោធិនមានសមត្ថភាព គុណភាព និងបង្កើនចំណេះដឹងដល់កងទ័ពឱ្យបានយល់ដឹងកាន់តែច្បាស់ ស្ទាត់ជំនាញ ជាពិសេស ដើម្បីឱ្យយោធិន បង្កើននូវសមត្ថភាព ពង្រីកចំណេះដឹងរបស់កងទ័ពទៅតាមភូមិសាស្ត្រ គ្រប់ប្រភេទជំនាញ ដែលអាចឆ្លើយតបនឹងតម្រូវការរបស់អង្គភាពប្រកបដោយប្រសិទ្ធភាពខ្ពស់»។
លើសពីនេះទៀតលោកបានបន្តថា វគ្គហ្វឹកហ្វឺនបំប៉ននេះ គឺសំដៅបង្កើនសមត្ថភាពដល់យោធិន ឱ្យកាន់តែស្ទាត់ជំនាញក្នុងការប្រើប្រាស់អាវុធវែងខ្លី និងគ្រឿងបំពាក់ រួមជាមួយជំនាញប្រយុទ្ធក្នុងទីប្រជុំជន (Urban Combat) និងរំដោះចំណាប់ខ្មាំង (Hostage Rescue) ឱ្យកាន់តែល្អប្រសើរស្របពេលដែលប្រទេសកម្ពុជា ក្នុងនាមជាប្រធានអាស៊ាន ឆ្នាំ ២០២២ នេះ។
លោក សុផាន់ ក៏បានបន្ថែមថា បន្ទាប់ពីការរីករាលដាលនៃជំងឺកូវីដ១៩ ប្រទេសកម្ពុជាក៏នឹងធ្វើជាម្ចាស់ផ្ទះ រៀបចំកិច្ចប្រជុំកំពូលអាស៊ានលើកទី ៤០ និង ៤១ និងកិច្ចប្រជុំកំពូលពាក់ព័ន្ធ (40th & 41st ASEAN Summits and Related Summit) តាមទម្រង់ដោយផ្ទាល់ជាលើកដំបូង។
សូមបញ្ជាក់ថា កន្លងមកប្រទេសកម្ពុជា ក៏បានត្រៀមកម្លាំងជាង១ម៉ឺននាក់ សម្រាប់ការពារសុវត្ថិភាព គណៈប្រតិភូ ដែលចូលរួមកិច្ចប្រជុំកំពូលអាស៊ានលើកទី ៤០ និងទី ៤១ និងកិច្ចប្រជុំពាក់ព័ន្ធ ចាប់ពីថ្ងៃទី ៨ ដល់ថ្ងៃទី ១៣ ខែវិច្ឆិកា ដែលប្រទេសកម្ពុជាជាអ្នករៀបចំធ្វើជាម្ចាស់ផ្ទះ។
ដោយឡែកក្នុងរយៈពេល ២៧ ថ្ងៃ មានអ្នកសារព័ត៌មានជាតិ និងអន្តរជាតិមកពី ៣០ ប្រទេស បានចុះឈ្មោះចូលរួមយកព័ត៌មាន នៅក្នុងកិច្ចប្រជុំកំពូលអាស៊ាន នៅរាជធានីភ្នំពេញ មានចំនួនសរុបជាង ១ ៣០០ នាក់ ដែលក្នុងនោះអ្នកសារព័ត៌មានបរទេស ដែលមានចំនួនច្រើនជាងគេគឺប្រទេសជប៉ុនដែលមាន១៥៧នាក់។
លោក ផុស សុវណ្ណ ប្រតិភូរាជរដ្ឋាភិបាល ទទួលបន្ទុកអគ្គនាយកនៃអគ្គនាយកដ្ឋានព័ត៌មាន និងសោតទស្សន៍ នៃក្រសួងព័ត៌មានប្រាប់ ភ្នំពេញ ប៉ុស្តិ៍ នាថ្ងៃទី ២៧ ខែតុលា ថា៖ «គិតត្រឹមថ្ងៃទី ២៧ ខែតុលាចំនួន អ្នកចុះឈ្មោះ ចូលរួមកិច្ចប្រជុំកំពូលអាស៊ានសរុបចំនួន ១ ៣៨៥ រូប មកពី ៣០ ប្រទេស។ ក្នុងចំណោម ៣០ ប្រទេស ចំនួនអ្នកសារព័ត៌មាន ដែលចុះឈ្មោះច្រើនជាងគេរួមមានកម្ពុជា ៤៧៨ រូបជប៉ុន ១៥៧ រូប កូរ៉េខាងត្បូង ១៣៣ រូបសហរដ្ឋ អាមេរិក ១០០ រូប»៕
