.jpg)
ប្រជាកសិករនៅខេត្តព្រៃវែងដែលរងគ្រោះដោយទឹកជំនន់ទទួលស្រូវពូជពីលោកនាយករដ្ឋមន្ត្រី ហ៊ុន សែន កាលពីថ្ងៃម្សិលមិញ។ រូបថត SPM
ព្រៃវែងៈ លោកនាយករដ្ឋមន្ត្រី ហ៊ុន សែន បានបិទបញ្ចប់បេសកកម្មចុះចែកពូជស្រូវចំនួនជិត ៤ ០០០ តោន ដល់ប្រជាជនដែលរងគ្រោះដោយទឹកជំនន់ចំនួនជិត ៤ ម៉ឺនគ្រួសារ នៅក្នុងខេត្តចំនួន ៦ ដែលរងផលប៉ះពាល់ដោយសារទឹកជំនន់ ដែលបេសកកម្មនេះមានរយៈពេលប្រមាណ ១ សប្តាហ៍។
ខេត្តទាំងនោះរួមមានខេត្តបន្ទាយមានជ័យ មានជាង ៥ ០០០ គ្រួសារ បាត់ដំបងជាង ១ ម៉ឺនគ្រួសារ ពោធិ៍សាត់ជាង ៥ ពាន់គ្រួសារ កំពង់ឆ្នាំងជាង ៣ ០០០ គ្រួសារ កំពង់ធំជិត ៧ ០០០ គ្រួសារ និងព្រៃវែងជាង ៦ ០០០ គ្រួសារ។ ខេត្តដំបូងដែលលោកចាប់ផ្តើមបេសកកម្ម គឺខេត្តសៀមរាប តែបានជួបសំណេះសំណាលជាមួយប្រជាពលរដ្ឋប្រមាណ ៣ ២០០ គ្រួសារបន្ថែមទៀត ដែលជាអ្នកស្ម័គ្រចិត្តរើលំនៅឋាន ចេញពីរមណីយដ្ឋានអង្គរ ទៅរស់នៅតំបន់អភិវឌ្ឍន៍ពាក់ស្នែង ស្ថិតនៅក្នុងឃុំពាក់ស្នែង ស្រុកអង្គរធំ ខេត្តសៀមរាប នៅមុនធ្វើដំណើរទៅកាន់ខេត្តបន្ទាយមានជ័យដើម្បីចាប់ផ្តើមចែកស្រូវពូជ និងអំណាយផ្សេងៗដល់កសិករ។
ក្នុងពិធីផ្តល់ស្រូវពូជដល់កសិករចំនួនជាង ៦ ០០០ គ្រួសារ ដែលរងគ្រោះដោយជំនន់ទឹកភ្លៀង និងទឹកទន្លេមេគង្គនៅខេត្តព្រៃវែង ដែលជាខេត្តចុងក្រោយនៃការបញ្ចប់បេសកកម្មរបស់លោក នាថ្ងៃទី ៣០ ខែតុលា លោក ហ៊ុន សែន បានកោតសរសើរចំពោះការខិតខំប្រឹងប្រែង របស់អាជ្ញាធរខេត្ត អាជ្ញាធរគ្រប់លំដាប់ថ្នាក់ និងកងកម្លាំងប្រដាប់អាវុធគ្រប់លំដាប់ថ្នាក់ដែលបានប្រឹងប្រែងជម្នះនូវការលំបាក ដែលបានខិតខំជួយដោះស្រាយដល់ការលំបាករបស់ប្រជាពលរដ្ឋ។
លោកបានថ្លែងអំណរគុណ និងវាយតម្លៃខ្ពស់ចំពោះក្រុមការងាររបស់រាជរដ្ឋាភិបាលក៏ដូចជាគណបក្សប្រជាជនកម្ពុជាដែលមានលោក ស ខេង រដ្ឋមន្ត្រីក្រសួងមហាផ្ទៃ ដឹកនាំដោះស្រាយបញ្ហានេះជាបន្តបន្ទាប់ក្នុងរយៈពេលកន្លងទៅ។ លោកអរគុណចំពោះការខិតខំទាំងអស់របស់មន្ត្រីរាជការ និងកងកម្លាំងប្រដាប់អាវុធដែលបានជួយដោះស្រាយ «បញ្ហាដែលមិនទុកឱ្យប្រជាជនណាម្នាក់ស្លាប់ដោយអត់បាយ» ដែលរដ្ឋាភិបាលមិនបានដឹង និងមិនបានដោះស្រាយ។
លោកថ្លែងថា៖ «ឆ្នាំនេះដូចឯកឧត្តម ជា សុមេធី អភិបាលខេត្តបានធ្វើរបាយការណ៍ ទឹកវាមិនធំហួសហេតុពេកនោះទេ ក៏ប៉ុន្តែវារាយប៉ាយគ្រប់កន្លែងដែលធ្វើឱ្យខេត្តរបស់យើង ដែលមាន ២៥ ខេត្ត-រាជធានីមានរហូតទៅដល់ ២០ ខេត្តហើយ ដែលរងផលប៉ះពាល់។ វាមិនច្រើន ក៏ប៉ុន្តែវារាយប៉ាយច្រើនកន្លែង។ ដូច្នេះបូកសរុបទៅ ក្រុមគ្រួសារដែលរងផលប៉ះពាល់ គឺមានចំនួនច្រើនបង្គួរ។ សូម្បីតែថ្ងៃនេះ បើបូកសរុបចំនួនដែលខ្ញុំបានដើរចែកផ្ទាល់សម្រាប់ស្រូវពូជក្នុងការស្តារឡើងវិញ គឺមានរហូតទៅដល់ ៣៨ ៣១៣ គ្រួសារគិតទាំង ៦ ១១២ គ្រួសារ ដែលចែកជូននៅខេត្តព្រៃវែងនៅថ្ងៃនេះ»។
លោក ហ៊ុន សែន ថ្លែងថា នៅភូមិសាស្ត្រមួយចំនួន កសិករបានធ្វើស្រូវដើមរដូវដែលជាស្រូវវស្សា ហើយស្រូវវស្សាទាំងនោះក៏ត្រូវបានលិចលង់ខូចខាតដោយទឹកជំនន់ជាជំនន់មេគង្គក្តី និងជំនន់ទឹកភ្លៀងក្តី។ ប៉ុន្តែ នៅឆ្នាំនេះជំនន់ទឹកភ្លៀងបានវាយលុកស្ទើរគ្រប់ទីកន្លែងទាំងអស់ហើយឥឡូវនេះ ការចែកពូជស្រូវរបស់រាជរដ្ឋាភិបាលមិនជាយឺតនោះទេ។
លោកថ្លែងថា៖ «បើយើងពិនិត្យគ្រប់ទីកន្លែង ដែលខ្ញុំបានធ្វើដំណើរតាំងពីសៀមរាប បន្ទាយមានជ័យ បាត់ដំបង ពោធិ៍សាត់ កំពង់ឆ្នាំង ហើយម្សិលមិញកំពង់ធំ និងថ្ងៃនេះមកដល់ព្រៃវែង»។
ប្រជាពលរដ្ឋនៅក្នុងពិធីទទួលស្រូវពូជពីលោកហ៊ុន សែននៅខេត្តព្រៃវែង។ រូបថត SPM
លោក ហ៊ុន សែន បញ្ជាក់ថា៖ «យើងឃើញថា ឥឡូវនេះ ទឹកទើបនឹងដកទៅក្រោយភូមិ។ កន្លែងខ្លះត្រឹមតែ ១០០ ម៉ែត្រ ឬក៏មិនដល់ ១០០ ម៉ែត្រផងទេ គឺទឹកនៅទីនោះ។ ដូច្នេះស្រូវពូជដែលយកទៅនេះ គឺមិនជាចាំបាច់ត្រូវបូមទឹក ដើម្បីមកដាក់ដើម្បីរៀបចំសម្រាប់ការបង្កបង្កើនផល លើកលែងកន្លែងខ្លះវាទួលពេក ប៉ុន្តែជាទូទៅស្ថានភាពទឹកនៅពេលដែលទឹកសម្រក ស្រូវពូជបានទៅដល់ទីកន្លែងតែម្តង»។
លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានបញ្ជាក់ថា បន្ទាប់ពីបានចុះជួបសំណេះសំណាល សួរសុខទុក្ខ និងស្វែងយល់ពីកសិករ ចាប់តាំងពីក្រចេះ ត្បូងឃ្មុំ កំពង់ចាម សៀមរាប បន្ទាយមានជ័យរួចមក គឺនៅថ្ងៃទី ២៤ ខែតុលា មុនពេលចេញពីខេត្តបាត់ដំបង មកកាន់ខេត្តពោធិ៍សាត់ លោកមានឱកាសបានទៅទស្សនាឈ្វេងយល់អំពីខ្សែចង្វាក់ផលិតកម្មស្រូវអង្ករ នៅឯរោងម៉ាស៊ីនកិនស្រូវនៃក្រុមហ៊ុនបៃតងកម្ពុជា។
លោកបានសរសេរនៅលើហ្វេសប៊ុក កាលពីថ្ងៃទី ២៤ ខែតុលាថា បន្ទាប់ពីបានដើរទស្សនារំហូដំណើរការនៃរោងម៉ាស៊ីនកិនស្រូវតាំងពីដើមរហូតដល់ចប់រួចមក លោកបានជួបពិភាក្សាជាមួយលោក ភូ ពុយ អគ្គនាយកក្រុមហ៊ុនបៃតងកម្ពុជា តំណាងរោងម៉ាស៊ីនកិនស្រូវ ព្រមទាំងភាគីពាក់ព័ន្ធដទៃទៀត ដូចជាភ្នាក់ងារប្រមូលទិញស្រូវ និងអ្នកផលិតពូជស្រូវ សម្រាប់ផ្គត់ផ្គង់ទៅដល់កសិករជាដើម។
លោក ឌិត ទីណា សរសេរថា៖ «នៅក្នុងកិច្ចប្រជុំដែលមានរយៈពេលជាង ១ ម៉ោង លោកឧកញ៉ា ភូ ពុយ បានសម្ដែងសុទិដ្ឋិនិយម នៅពេលនិយាយដល់ផែនការផលិតស្រូវពូជដែលមានគុណភាព សម្រាប់ផ្គត់ផ្គង់ដល់កសិករឱ្យត្រូវនឹងតម្រូវការទីផ្សារ»។
លោករដ្ឋមន្ត្រីកសិកម្មថ្មីបន្ថែមថា៖ «ការស្វាគមន៍ក៏មានផងដែរ ពីសំណាក់ភាគីពាក់ព័ន្ធដទៃទៀត ក្នុងក្ដីសង្ឃឹមថា ផែនការយុទ្ធសាស្ត្រថ្មីនេះនឹងអាចជួយគាំទ្រខ្សែចង្វាក់ផលិតកម្មស្រូវឱ្យមានភាពរលូនជាងមុន ចាប់តាំងពីនៅវាលស្រែរហូតដល់ទីផ្សារតែម្ដង ធ្វើយ៉ាងណាជួយដល់ប្រជាកសិករឱ្យទទួលបានទិន្នផលស្រូវប្រសើរជាងមុន ទាំងគុណភាព និងបរិមាណ»៕
